Angliyaning “Chelsi“ jamoasi rahbariyati o'zining etakchi futbolchilarini saqlab qolmoqchi. Bu haqida The Telegraph nashri xabar tarqatdi. Jumladan, londonliklar yarim himoyachi Eden Azar va darvozabon Tibo Kurtua bilan yangi shartnomalar borasida muzokaralarni boshlagan. Manbada aytilishicha, “Chelsi“ Azar bilan o'tgan haftadayoq norasmiy muzokaralarni boshlagan. Belgiyalik o'yinchi yangi bitimga ko'ra, haftasiga 300 ming funt maosh olish imkoniga ega bo'ladi. Hamyurti Kurtuaga ham moliyaviy jihatdan anchagina foydali kelishuv taklif etiladi. Unga ko'ra, posboning hozirda 100 ming funtni tashkil qiluvchi maoshi kamida bir yarim baravar oshadi. Agar “Real” chindan ham e'tiborini “Manchester Yunayted” darvozaboni David De Xeaga qaratsa, “Chelsi“ Kurtuani qiyinchiliksiz saqlab qoladi. Qo'shib o'tish joiz, “ko'klar” ustozi Antonio Konte ham yangi shartnoma imzolashi kutilmoqda.
— deya xabar beradi uff.uz nashri.