Bevosita futbolga oid xabarlarga o'tishdan oldin e'tiboringizga Shvetsiya poytaxti haqida ikki og'iz so'z yuritib ketishni lozim topdik. Zero, u haqida ko'p narsalarni o'zbekistonlik ishqibozlar bilib olishlari mumkin bo'ladi.
Demak, Stokgolm...
Shahar bundan 700 yil avval barpo qilingan bo'lib, bugun u sovuq Boltiq bo'yi daryosi qoshidagi 14ta orollardan iborat. Ushbu orollarni esa, bir-biri bilan jami 57ta ko'prik bog'lab turadi. Shahar xuddi boshqa Evropa megapolislari kabi ajoyib muzeylarga ega. Aholisi bizdek mehmondo'st. Ko'chalarda shirinliklarga boy kafelar, mahalliy dizaynerlarning do'konlari va qimmatbaho mehmonhonalari to'lib yotibdi. Bu bilan shahar sayyohlarni o'ziga jalb qila oladi.
Uning qoq markazida Shimoliy Evropadagi O'rta asrdan qolgan ikki eng mashhur tarixiy obidalar bor. Bular - "Gamla-Stan" ma'nosi eski shahar deganini anglatadi va Riddarxolmen - ritsarlar oroli.
Storstockholms Lokaltrafik shirkati shaharda harakatlanadigan barcha jamoat transportlari uchun mas'ul hisoblanadi. Stokgolmdagi barcha transport tizimi uchta xududga bo'lingan bo'lib, yagona chipta qoidasi amal qiladi.
Xuddi Moskvadagi kabi Stokgolm metrosining uzunligi 110kmni tashkil qiladi. Uni benihoya er osti muzeyiga o'xshatish mumkin.
Men bu erda bir guruh o'zbekistonlik ishqibozlarni uchratdim. Ular ertaga alabatta "Manchester Yunayted"ga ishqibozlik qilishlari haqida gapirib berishdi. Ular bilan jonajon O'zbekistonimiz bayrog'i ostida rasmlarga tushdik.
Shahar aholisining kayfiyati a'lo darajada. Ular futbolsiz ham o'z yo'nalishlarida davom etishmoqda. Ko'rib turganingizdek, ko'chalar toza va ozoda. Eng muhimi bu shahar O'rta asrlardan qolgan o'z g'ururini hammaga ko'z-ko'z qilayotgandek tuyuladi.
Mamlakatning iqtisodiyoti gullab yashnagan. Ijtimoiy himoya borasida bo'lsa butun dunyoda etakchilardan hisoblanashadi. Ko'plab davlatlardan kelgan tadbirkorlar shu erlarda tijorat ishlari bilan shug'ulanishadi. Shvetsiyaga hali yoz fasli to'la kirib ulgurmagan. Havo harorati biroz pastroq. Lekin futbol o'ynash uchun ideal tarzda.
Hozircha, shunaqa gaplar. Men media-markazga qarab yo'lga tushdim. Qolganini keyinroq gaplashamiz. San'at Sharipov, Stokgolmdan
UFF.uz sayti uchun maxsus
— deya xabar beradi uff.uz nashri.