Ro'ziqul Berdiev - ancha og'ir-bosiq, mulohazali murabbiy. Ayniqsa, futbolchilari haqida gap ketganda, mudom ijobiy fikr bildirishga intiladi. Masalan, o'tgan hafta «Paxta­kor»ga qarshi kechgan bahsda yarim himoyachi Artur Gevorkyan ko'ngildagidek o'yin namoyish etolmadi. Ammo Berdiev uchrashuvdan so'ng tashkil etilgan matbuot anjumanida turkmanistonlik futbolchini jurna­list­lar xurujidan himoya qildi. Himoya qilish ham gapmi, murabbiyning javobi tanqidiy fikrlar yo'lini batamom to'sib qo'yadigan darajada keskin bo'ldi.
- Gevorkyanning yomon o'ynaganiga sabab - unda kichik jarohat bor edi. «Dinamo»ga qarshi kechgan bahsda shikastlanib, maydonni tark etgandi. Shunga qaramay, «Paxtakor»ga qarshi o'yinda jonbozlik ko'rsatdi. Bu jasorati tahsinga loyiq. Artur jamoamizning so'nggi mashg'ulotlarini o'tkazib yuborgandi. Faqatgina o'yindan bir kun oldin jamoa bilan umumiy guruhda shug'ullandi...
Berdievning bu gaplaridan so'ng Gevorkyanga yana qandaydir e'tiroz bildirish mumkinmi? Yuqorida ayt­ganimizdek, murabbiyning o'z shogirdlarini tez-tez himoya qilib chiqishiga ko'nikkandik. Ammo... «Nasaf» ustozi aynan «Paxtakor»ga qarshi kechgan o'yin­dan so'ng Shohruh Gadoev haqida mutlaqo boshqacha fikr­lar bildirdi. To'g'risi, buni ko'pchilik kutmagandi. Quyida mutaxassisning tezkor yarim himoyachi xususida nimalar deganiga e'tibor qaratsak.
- So'nggi o'yinlarda Gadoevni ko'p marotaba almashtirdik. Sababi - uning o'yinidan qoniqmayapmiz. Qaysidir muxlis Shohruhning o'yinini maqtayaptimi, demak o'sha ishqiboz futbolni yaxshi tushunmas ekan. Bilmadim, balki Gadoevning bizga e'tirozi bordir. Mabodo uni jamoamizda nimadir qoniqtirmayotgan bo'lsa, bemalol ketishi mumkin. Uning o'rniga boshqa futbolchi topamiz...
Bunisiga endi nima deysiz? Nega Berdievdek murabbiy o'z futbolchisi haqida bunday gaplar aytmoqda? Vaziyatning shunday tus olishiga sabab nima? Gadoev ustozining jahlini chiqaradigan darajada «qovun tushirdimikan?» Axir shu murabbiy emasmidi bir vaqtlari Shohruhga asosiy tarkib eshigini ochgan? Ro'ziqul Berdievning ikki yil muqaddam bergan intervyularidan birini yodga olaylik. O'shanda «Nasaf» ustozi katta futbolga kirishdan umidini uzib, o'zini boshqa kasbga urmoqchi bo'lgan Gadoevni maqsadidan qaytara olganini aytgandi. Murabbiyning ta'kidlashicha, Shohruhning asosiy tarkibda o'ynab ketishi uchun hatto Pereplyotkinsdek kuchli legionerning injiqliklarini rad etishga to'g'ri kelgan. Yaxshisi, murabbiyning bu boradagi fikrlari bilan o'zingiz tanisha qoling:
- «Nasaf» nima uchun yoshlarga katta e'tibor qaratmoqda? Chunki bizda kelajagi porloq, iqtidorli futbolchilar to'p surishmoqda, - degan edi Ro'ziqul Berdiev.
Davomi InterFUTBOL gazetasi blogida.
— deya xabar beradi uff.uz nashri.