Qatarning Doha shahrida Yaman hamda O'zbekiston milliy terma jamoalari o'rtasidagi JCh-2018 saralash uchrashuv boshlanish arafasida. Biz ushbu sahifa orqali o'yinning tafsilotlari borasida ma'lumot berib borishga harakat qilamiz. Ishonamizki, terma jamoamiz kerakli natijani qo'lga kiritadi. Tarkiblar bilan tanishing:
O'zbekiston: Aleksandr Lobanov, Vitaliy Denisov, Egor Krimets, Anzur Ismoilov, Islom To'xtaxo'jev, Odil Ahmedov, Aziz Haydarov, Sardor Rashidov, Stanislav Andreev, Server Jeparov, Igor Sergeev. ***** 0'. Avvalgi o'yindan bitta farq qiladigan tarkibni ko'rdik. Ya'ni, Bikmaev o'rnida Andreev harakat qiladi.
0'. Demak boshladik. Madhiyalarimiz baralla kuylandi, barcha futbolchilar davra bo'lib, murabbiydan so'nggi ko'rsatmalarni olishdi. Bu yog'iga hammamizga omad.
0'. O'yin bir daqiqa sukut saqlash bilan boshlandi. Frantsiyadagi mudhish voqeada halok bo'lganlar yodga olindi.
1'. Uchrashuv boshlandi. To'ni o'yinga Yaman kiritdi. Shunga qaramay bizning shunqorlar ilk daqiqadayoq hujumga o'tishning uddasidan chiqa oldilar. Faqat shu ishni sal tezroq qilish kerak.
3'. Raqib darvozasi tomon ilk zarbani Sergeev berdi. Igorning boshi bilan bergan zarbasi haddan tashqari aniq chiqdi. Shu qadar aniqki, to'g'ri darvozabonning qo'liga bordi.
8'. Goooollll
8'. Aziz Haydarov jarima maydonchasiga kirar kirmas, darvoza tomon zarba berdi. Garchi zarba u qadar kuchli bo'lmasada, darvozabon uchun ancha noqulay bo'ldi va o'yinda hisob ochildi - 0:1.
10'. O'yinda ustunlik biz tomonda. Yamanliklar maydon markazidan o'tsa, o'zini baxtli his qilmoqda.

13'. Sardor Rashidov hujum tashkil qilish uchun ajoyib imkoniyatga ega bo'lgan edi. Ammo bundan foydalana olmadi.

15'. Igor Sergeevga nisbatan qo'pollik qilishdi, yaxshi hamki hujumchimiz jarohat olmadi.

18'. Sardor Rashidovning faolligi evaziga hujum tashkil qilindi. Ammo qanotdan uzatilgan to'pni raqib darvozaboni egallab oldi.

21'. Aziz Haydarov to'pni to'g'ri raqibga uzatib berdi. Ammo yamanliklar "sizu biz" qilib, hujumga o'tamiz deguncha, himoyachilarimiz joyiga qaytib ulgurdi.

23'. Yaman darvozasi oldida burchak to'pi amalga oshirildi, ammo natijasiz. Umuman, o'yin biroz zerikarli ko'rinish olgan, hujum qilish uchun imkoniyat ko'p, ammo undan foydalanilmayapti.
23'. Biz esa bu orada vaqtni yo'qotmay, boshqa o'yinlar natijasiga nazar tashlamoqchimiz. Aytishlaricha, Qirg'iziston Iordaniyani 1:0 hisobida yutganmish. Hozir tekshirib ko'ramiz.
26'. Biz narigi o'yin natijasiga qaraguncha, Yaman bir marta Lobanov darvozasi oldigacha borishga ulgurdi. Ammo bundan hech narsa chiqqani yo'q. Haya, Qirg'iziston rostan ham Iordaniyani 1:0 hisobida yutibdi. Yagona golni 48 daqiqada Zemlyanuxin kiritgan. Qoyil!
28'. Yaman Lobanov darvozasi tomon chamasi 26 metrlardan jarima zarbasini amalga oshirdi. Zarba jonli devordan nariga o'tgani yo'q.

31'. Gooollll!!!

31'. Siz va biz ko'p va xo'p tanqid qilgan Andreev, ha, o'sha Stanislav Andreev ajoyib tarzda qarshi hujumga o'tib ketdi va to'pni Odil Ahmedovga etkazib berdi. U yog'i esa ma'lum, Ahmedov o'zining odatiy o'yinini, ya'ni, o'sha Andreevning eng yaxshi o'yinidan ham bir necha barobar kuchliroq bo'lgan odatiy o'yinini ko'rsatdi va to'pni Server Jeparovga etkazib berdi. Jeparov esa uzoqdan kuchli zarba bilan hisobni oshirdi - 2:0.

40'. Sardor Rashidovning uzoqdan yo'llagan kuchli va xavfli zarbasini darvozabon bartaraf etdi. Burchak to'pidan esa an'anaviy tarzda bir ish chiqqani yo'q.
44'. Odil Ahmedovning uzoqdan yo'llagan kuchli va xavfli zarbasini darvozabon bartaraf etdi. Sharh bir xil ko'rinish olmayaptimi? Boriyam shuda.
45'. Birinchi bo'limga 1 daqiqa qo'shib berildi.
45'. Birinchi bo'lim tugadi.
46'. O'yin boshlandi. Boshlandiyu, Server Jeparov yiqitildi. Jarima zarbasi...
46'. Sardor jarimadan kuchli zarba yo'lladi. Ammo darvozabon yana qaytardi.
48'. Endi Stanislav Andreevni yiqitishdi. Ammo jarima zarbasidan yana bir ish chiqmadi. To'p uzoq aylanib yurgach, amallab zarba berishdi, ammo yana darvozabon o'z o'rnida.
49'. Gooollll!!!
50'. Stanislav Andreev bosh bilan hisobni oshirdi. Oshirdiyu, o'rnini Jasur Hasanovga bo'shatib berdi. Haya, gol urilgan lahzada to'pni unga Odil Ahmedov etkazib bergan edi.
56'. Sharhlovchi Zafar akaning aytishicha, Yaman to'pni o'z nazoratiga olgan emish. Qarshi emasmiz, qo'shilamiz. Masalan, Yaman hozir gol urishi mumkin edi, o'sha biz tanqid qilgan Lobanov qutqardi...
62'. Kutib oling, chapak chaling - Jeparovning o'rniga Geynrix maydonga tushdi.
68'. Geynrix bir amallab, qoqilib-suqilib o'ziga kelgan to'plarni arang boshqalarga o'tkazib yubormoqda. Ammo bu u yomon o'ynayapti degani emas. Biz yaxshi bilamiz, u aynan shunday o'yini bilan gollar urib ketadi...
70'. O'yin ancha zerikarli kechmoqda. Biznikilar to'pni o'zaro oshirish bilan, Yaman esa qarshi hujum uyushtira olmaslik bilan band...
74'. Lobanov darvozasi tomon aniq zarba yo'llandi. Ammo bu to'pni o'tkazib yuborish juda qiyin edi, o'ta kuchsiz tepilgandi. Darvozabon to'pni egallab oldi...

76'. Sardor Rashidovni bir himoyachi ortdan tortdi, boshqasi esa sal qolsa quchoqlab olardi. Hakam jarima zarbasi belgiladi, ammo yana o'sha darvozabon to'pni qaytardi.
77'. Endi Yaman xavfli hujum tashkil qildi. Ismoilov bilan Lobanov amallab uni bartaraf etishdi.

79'. Lobanovga tasanno. Darvozabon darhaqiqat xavfli vaziyatni o'z vaqtida darvozani tashlab chiqib, bartaraf eta oldi.
80'. Rashidov o'rniga Fozil Musaev tushirildi. Kutilgan o'zgarish. Har holda hech bo'lmaganda Fozil juda kutgan bo'lsa kerak...

— deya xabar beradi uff.uz nashri.