Evrofutbol bag'ri juda keng. Xususan, kuchli 5ta chempionatda ham turli mamlakatlar vakillarini etarlicha uchratish mumkin. Hozirgi kunda hattoki, xaritadan topish mushkul bo'lgan ekzotik davlatlar futbolchilari ham top-ligalarda javlon urishmoqda.
Mana, quyida Evropaga eng ekzotik o'lkalardan «tashrif buyurgan» legionerlar bilan tanishishingiz mumkin. «Tashrif buyurgan» iborasini qo'shtirnoqqa olinganiga sabab shuki, ro'yxatga tushgan ba'zi futbolchilar aslida «ko'hna qit'a»da tug'ilganlar, ammo qaysidir asosga ko'ra, terma jamoalar miqyosida unchalik tanilmagan mamlakatlar uchun to'p surishadi.
Kuko Martina (Kyurasao)
Klubi: «Sautgempton»
Yoshi: 26
Pozitsiyasi: o'ng qanot himoyachisi
To'liq ismi Ru-Endri Aurelio Jan-Karlo bo'lgan futbolchini sharhlovchilar ziqnalik qilib, shunchaki, Kuko nomi bilan siylashgan. U aslida Rotterdamda tug'ilgan, ammo Gollandiyaning biror yosh toifasidagi terma jamoasida o'ynagan emas. «Feyenoord» tarbiyalanuvchisiga jonajon klubida ham joy topilmadi. Natijada katta futbolga Gollandiya ikkinchi divizionida qadam qo'ygan Martina sekin-asta o'sib, «Tvente»da o'ynash darajasigacha etdi. Yozda esa 2 yillik shartnoma asosida «Sautgempton» safiga qo'shildi. Himoyaning deyarli barcha pozitsiyalarida to'p surish salohiyatiga ega futbolchi, ayniqsa, raqib hujumini buzishga usta. Ammo Ronald Kuman jamoasida hozircha uncha ko'p maydonga tushmayapti. Lekin Kyurasao milliy jamoasidagi faoliyati juda yaxshi davom etyapti. Martina 2011 yildan buyon ushbu ekzotik mamlakat jamoasi safida 19 marta maydonga tushishga ulgurdi.
Stiv Elana (Martinika)
Klubi: «Lill»
Yoshi: 35
Pozitsiyasi: darvozabon
Elana Frantsiya oliy ligasida ilk marta 2004 yili «Kan» klubi tarkibida ko'rinish berdi. O'shanda uning klubi kuchlilar qatorida qolish vazifasini uddalay olmadi va darvozabon bitta quyi divizionga yo'l oldi - «Brest»ga. Qora tanli golkiper bu klubda naq 7 mavsum faoliyat yuritib, ozmi-ko'p tajriba va obro' orttirdi. Xizmatlariga yarasha, «Lill»dan taklif oldi va Mikael Landro o'rinbosari bo'lishga rozilik bildirdi. Oradan ma'lum vaqt o'tgach, Stiv klubda hattoki, 1-raqamli darvozabonga aylandi. Ammo «Lill» nigeriyalik Vinsent Enema bilan shartnoma tuzgach, u yana zaxirachi roliga ko'nikdi. E'tiborlisi, Elana 34 yoshga to'lganidan keyingina xalqaro faoliyatini boshladi va bir yil davomida Martinika milliy jamoasida 6ta o'yin o'tkazishga ulgurdi.
Ali Adnan (Iroq)
Klubi: «Udineze»
Yoshi: 21
Pozitsiyasi: chap qanot himoyachisi
Iroq - albatta, Martinika yoki Kyurasao emas, biroq jamoatchilik bu mamlakat fuqarosini top-chempionatlarda ko'rishga hali odatlanmagan, baribir. Adnan 2013 yili o'z mamlakati yoshlar terma jamoasi bilan kichik JChda ishtirok etdi. Iroqliklar o'shanda 4-o'rinni egallashdi. Yil yakunida Ali Adnanni Osiyoning eng yaxshi yosh futbolchisi sifatida e'tirof etishdi. Uni hattoki, «Osiyolik Beyl», - deya ta'riflay boshlashdi. Yosh futbolchi bunday muvaffaqiyatlardan so'ng darhol evrofutbolga yuzlandi. Aniqrog'i, «Bag'dod» klubidan Turkiyaning «Rizespor» jamoasiga o'tib, oxirgi 2 mavsumda uning asosiy o'yinchilaridan biriga aylandi. Yozda esa, iqtidorli iroqlik «Udineze» safiga qo'shildi. Udineliklar bir-ikki yildan so'ng uni qaysidir kuchliroq klubga binoyi narxda pullashsa, ajabmas.
Marsel Byuxel (Lixtenshteyn)
Klubi: «Empoli»
Yoshi: 24
Pozitsiyasi: markaziy himoyachi
Byuxel yoshligida amaldagi tizimga qarshi chiqmadi. Ya'ni lixtenshteynlik ko'plab o'yinchilar kabi katta futbolga Shveytsariya klubida qadam bosdi. Aytish joiz, unga «Sankt-Gallen» jamoasidagi faoliyat juda qo'l keldi. Albatta, bunda mahorati ham asqotdi. Xullas, Byuxelning katta futboldagi debyut mavsumi yakunlanmay turib, «Siena» (Italiya) klubi unga xaridor bo'ldi. To'g'ri, Marsel 2010 yili ushbu jamoa bilan to'laqonli shartnoma tuzgan bo'lsada, uning tarkibida biror marta o'ynamadi. 3 yil davomida ijara kelishuvlari asosida izg'iganidan keyin esa, kutilmaganda Toskaniya klubini «Yuventus» bilan almashtirdi. Ha, ha, Turinning «Yuventus» jamoasi a'zosiga aylandi.
Tabiiyki, uning hozircha «Yuve» asosiy tarkibidan joy olishi juda qiyin. Shuning uchun, himoyachini yana ijara bo'yicha quyi divizionga yuborishdi. Yozda esa, turinliklar uning huquqini vaqtincha «Empoli»ga berishdi. Shunday qilib, Byuxel Italiya «A» seriyasida ham debyut qilib, hattoki, «Roma» darvozasiga gol urdi. Lixtenshteyn milliy jamoasiga ham aynan shu yildan e'tiboran jalb etilyapti. Hozircha 2ta uchrashuvda mamlakati sharafini himoya qildi.
Davomi InterFUTBOL gazetasi blogida.
— deya xabar beradi uff.uz nashri.