Ayrimlarning jilmaymasligini to'g'ri tushunish mumkin. Shunchaki ularga kulish yarashmaydi. Mattias Ginter xuddi shu toifa kishilardan. Umuman olganda, so'nggi paytlarda 2014 yilgi jahon chempioniga xush kayfiyat baxsh etadigan voqealar kam uchrayapti. Ham markaziy himoya, ham tayanch chizig'ida ko'ngildagidek o'ynay olmadi, uning boshqa jamoaga ijaraga berilishi haqidagi gap-so'zlar esa omadsiz seriyaning uzviy davomiga aylandi.
Tomas Tuxel Dortmundning «Borussiya» klubiga kelgach, Ginter jamoa etakchilaridan biriga aylandi. Yangi bosh murabbiy Norvegiyaning «Odd» klubiga qarshi o'yinda Mattiasni o'ng qanot himoyasida sinab ko'rishga qaror qildi. Vaholanki, bu chiziq yosh futbolchi uchun mutlaqo begona edi. Shunga qaramay, u o'ziga bildirilgan ishonch­ni oqlab, yangi ampluada barqaror o'yin ko'rsata boshladi. Dastlab mazkur holat futbol jamoatchiligi orasida jiddiy qabul qilinmadi, lekin «Shalke» bilan o'yindan so'ng, Ginterning o'yini ochilayotganiga barcha ishondi.
Odatda, futbolning ayrim mayda jihatlari e'tibordan chetda qolib ketadi. Jahonning eng yaxshi skautlarining ta'kidlashlaricha, ularni har doim ham o'yinda eng ko'p aniq pas uzatgan o'yinchi qiziqtiravermas ekan. Aksincha, uchrashuvdan biroz oldin tashrif buyurib, o'yinchilarning mashg'ulotlari, mavjud holatga professional (yoki neprofessional) yondashuvlarini kuzatishga intilisharkan. Yuqorida aytganimiz - mayda jihat aynan «Shalke»ga qarshi bahsda e'tiborni tortdi. Bu payt­ga kelib «Borussiya» 3:1 hisobida oldinda borayotgandi. «Aut»dan to'pni o'yin­ga kiritishga shaylangan Mattias variantlarni chamalagach, qoshini chimirdi-da, Mats Xummelsga qaerda turishi joizligini uqtirdi. Ammo himoyadagi sherigining xayrixohlik bildirmaganini sezgach, to'pni Ilkay Gyundogan orqali o'yinga kiritishni lozim topdi.
Ayni shu pallada Ginter mutlaqo boshqacha ko'rinishda gavdalangandek tuyuldi. Uning yuz ifodasi hamon yosh bolalarnikidek, ammo vaziyatga umuman o'zgacha tarz­da yondashayotgani yaqqol sezilib turardi. Zero, ayni damgacha Mats Xummelsga nisbatan bunday munosabatga bo'lishga faqat Roman Vaydenfeller jur'at topa olgandi, xolos.
Jahon chempionatidagi g'alabadan so'ng bir yil mobaynida sarxush yurgan Ginterning mentalitetidagi o'zgarish uning ampluasini almashtirgan damlariga to'g'ri keldi. Mattias faoliyati davomida maydondagi o'rnini o'zgartirgan «Borussiya»ning uchinchi o'ng qanot himoyachisiga aylandi. Hozirga qadar shu kabi qismat Lukash Pishek hamda Erik Durmning boshiga tushgan, ularning har ikkisi dast­lab hujumda o'ynashgandi. Taktik tahlilning ashaddiy shinavandasi bo'lgan Tuxelning fikrini uqishga urinish befoyda, shu bois faqat faktlarga tayanamiz. Ginter «Frayburg»da oldinga intiluvchi himoyachi vazifasini a'lo darajada bajargandi. Aksariyat hujumlar u orqali boshlanar, o'zi ham to'p bilan maydonning raqiblar joylashgan qismiga o'ta olardi. Shu nuqtai nazardan, «Borussiya» uni sotib olish orqali Xummelsga munosib voris xarid qilgandek tasavvur uyg'otdi.
Biroq Yurgen Klopp davrida Ginterdan faqat mexanik funktsiyalarni bajarishda foydalanildi - to'pni egallab, uni yon-atrofidagi jamoadoshiga uzatish. Bu esa Mattias bergan paslarning aniqlik koeffitsientini ancha oshirib yubordi: «Bayer» bilan o'yinda 88 foiz, «Arsenal» bilan 95 foiz, «Shalke» bilan 91 foiz. Aleksandr Bubnov davrida ushbu ko'rsatkichga a'lo baho berilardi, ammo aniqlikdan tashqari boshqa jihatlarni ham yoddan chiqarmaslik kerak. Ginterdan eng asosiy «plyus»ini tortib olishgach, uning «minus»lari bisyor ekani ko'rinib qoldi - pozitsiyasini yo'qotgan yosh futbolchi ko'p hollarda raqiblar ortidan yugurgani bilan yodda qoldi, xolos.
Bugun Ginterning kuchli raqiblarga qarshi bahslardagi to'p uzatmalari aniqligi 80 foizdan oshmayapti - unga tavakkal qilish imkoniyati berildi. Aftidan, aynan shu omil «Borussiya»ning 28-raqamli futbolchisining qanotga o'tishiga turtki vazifasini o'tadi. Bu chiziqda yo'l qo'yadigan pozitsion xatolari markazdagidek jiddiy xavf tug'dirmaydi. Ginter unchalik tezkor emas, maydonda asosan katta qadam tashlash evaziga harakatlanadi. Bu «minus» ham o'ziga xos «plyus»ga aylandi: jamoadoshlari uni kamdan-kam hollarda tez yugurishga undashadi, endilikda Mattiasda mavjud holatni astoydil chamalab olishga imkon tug'ilmoqda. Keyinchalik ayon bo'lishicha, Ginter raqib darvozasi oldida pozitsiya tanlashda yaxshiroq ko'rindi: har ikki holatning birida u qulay vaziyatga chiqyapti. «Krasnodar» darvozasining ishg'ol qilinishi yuqoridagi fikrning yaqqol dalili (darvoqe, e'tibor bersangiz, qahramonimiz golni ortiqchatabassum va his-hayajonsiz nishonladi).
Tuxel strategiyasi to'pni raqib jarima maydonchasiga shunchaki uzatish bilan cheklanmaydigan aqlli qanot himoyachilariga iltifot vazifasini o'taydi. Roys, Mxitaryan, Kagava, Xofman - «Borussiya»ning o'ng qanot hujumidan kim o'rin olishidan qat'iy nazar, baribir, maksimal darajada markaz tomon harakatlanishadi. Shunday pallalarda raqib jamoaning qanot himoyachilari ularni qo'riqlash maqsadida markazga intilishlari natijasida qanotda ochiq joy paydo bo'ladi. Bundan esa Ginter va Shmeltser singari o'yinchilar unumli foydalanishga harakat qilishadi. «Bayer» «Borussiya» bilan o'yinda o'zgacha taktika qo'llashga urindi - Mattiasga qarshi dastlab yosh Vendell o'ynadi, Xofmanni esa markaziy himoyachi Papadopulos qo'riqladi. Bu reja mutlaqo samara bermadi: bechora braziliyalik futbolchi faoliyatidagi eng yomon o'yinlaridan birini o'tkazdi, uning qanoti poydevorigacha buzib tashlandi.
InterFUTBOL gazetasi blogidan olindi.
— deya xabar beradi uff.uz nashri.