«Bunyodkor» yakuniga etgan mavsumda ham xuddi o'tgan yilda bo'lgani kabi sovrinsiz qoldi. «Qaldirg'ochlar» O'zbekiston kubogi finalida «Nasaf»ga imkoniyatni boy berishdi. Chempionatni esa 4-o'rinda yakunlashdi. Birgina yupanch bo'ladigan holat - jamoa o'rinbosarlari yoshlar ligasida chempionlik shohsupasiga ko'tarilishdi.
Hikmat Ergashev shogirdlari 64 ochko bilan mavsumni yakka peshqadam sifatida yakunlashdi. «Bunyodkor» o'rinbosarlari 30ta uchrashuvdan 20tasida zafar quchishdi. To'rtta bahsda durang o'ynab, 6ta uchrashuvda mag'lubiyat alamini tatib ko'rishdi. To'plar nisbati - 69-28. Ular eng yaqin ta'qibchilari «Paxtakor»ni 4 ochkoga ortda qoldirishdi. «Sherlar»dan shuncha ochko kam jamg'argan «Mash'al» esa kuchli uchlikka yakun yasadi. Biz mavsum taassurotlari bilan tanishish maqsadida Hikmat Ergashevdan intervyu oldik.
- Hikmat aka, avvalambor, siz va shogirdlaringizni erishilgan muvaffaqiyat bilan tabriklayman. Umuman, mavsum taassurotlari qanday bo'ldi?
- Tabrik uchun rahmat. Mavsum qiziqarli o'tganligini so'nggi tur uchrashuvlari ham ko'rsatib turibdi. Har bir jamoa yoshlari qiziqarli, tezkor, hujumkor, tajovuzkor o'yin namoyish etishdi. Albatta, barcha jamoalar tarkibida iste'dodli yoshlar borligi biz murabbiylarni quvontirdi. Ayniqsa, chempionlik uchun kurash qizg'in kechdi. Bir «Paxtakor», bir biz birinchi o'ringa chiqib oldik. Shukrki, yakunda shohsupaning eng yuqori pog'onasida qolish bizga nasib etdi.
- Bunday olib qaraganda oson o'yinning o'zi yo'q. Shunday bo'lsada, sizning jamoangiz uchun qaysi o'yinlar nisbatan qiyinroq kechdi?
- O'zingiz aytganingizdek, oson o'yinning o'zi bo'lmadi. Quyi pog'onalarda borayotgan jamoalar ham bizga jiddiy tarzda tashvish tug'dirishdi. O'z maydonimizda «Paxtakor» bilan bo'lib o'tgan o'yin juda ham qiziqarli, gollarga boy kechdi. Keyin oxirgi turdagi chempionlik masalasini hal qilib bergan o'yin ham oson bo'lmadi. Hisobga qarab «Bunyodkor» oson g'alabaga erishibdi, deyish mumkin. Lekin aslo bunday emas. Chempionat oltin medallari o'rtaga qo'yilgan, asablar taranglashgan paytdagi o'yin u qanday saviyadagi jamoaga qarshi o'tkazilishidan qat'iy nazar qiyin bo'ladi. «Qo'qon-1912» o'rinbosarlari bilan bo'lib o'tgan uchrashuv ham bundan mustasno emas. Qo'qonlik futbolchilarga bu o'yin kerak emasdi. Qaysi ma'nodaki, uchrashuv natijasi ular uchun amalda hech narsani o'zgartirmasdi. Bunday holatlarda raqib jamoa bosimsiz o'ynaydi va ularning o'yini ham qovushaveradi. So'nggi turda 4:0 hisobida g'alaba qozonib, yoshlar ligasi g'olibi bo'lganimizdan xursandmiz. Bir so'z bilan aytganda, chempion va kumush medal sohiblarining so'nggi turda aniqlangani bu yilgi mavsumning saviyasidan darak beradi.
- O'rinbosarlar jamoasi asosiy tarkibga futbolchilarni etkazib berishga xizmat qiladi. Shu ma'noda, bu yil yoshlar ligasi o'yinlarida o'zlarini ko'rsatgan qaysi futbolchilarni «Bunyodkor»ning asosiy jamoasi murabbiylariga tavsiya qilgan bo'lardingiz?
- Bunday futbolchilar talaygina. Ulardan Mirjamol Qosimov, Nodir Mavlonov, Javohir Qahramonov bemalol oliy ligada ham o'ynay olishadi. Bu futbolchilar asosiy tarkibga ham chaqirilib, mashg'ulotlarda ishtirok etishgan. Endi kimni asosiy tarkibga chaqirishni bosh murabbiyning o'zi hal qiladi. Asosiy jamoa murabbiylari doimiy ravishda o'yinlarimizga kelib, futbolchilarni kuzatishadi.
- Yoshlar ligasining saviyasini qanday baholaysiz?
- 1-liga bilan taqqoslasak, ba'zi o'yinlari undan kuchli va qiziqarli ruhda o'tadi. Bu ayni haqiqat. Yoshlar o'zlarini ko'rsatish uchun astoydil harakat qilishadi. Bunday o'yinlar orqali ular o'sishga erishishadi.
- Hakamlik saviyasi haqida nima deya olasiz? Yosh futbolchilarni hozirdanoq «sindirib» qo'yishmayaptimi?
- Ochig'i, hakamlik masalasida gapirishni istamayman. Ularning harakatlarini baholaydigan nazoratchilar bor. Lekin ayrim o'yinlarga yuqori saviyali hakamlarni tayinlashyapti.
Davomi InterFUTBOL gazetasi blogida.
— deya xabar beradi uff.uz nashri.