O'tgan hafta oila a'zolarimiz bilan “oynai jahon ” orqali millionlar o'yini haqidagi “Bekxemdek o'yna” filmini tomosha qildik. To'g'risi, to'p o'yiniga bog'liq ajoyib voqealar tasvirlangan asar barchamizda zo'r taassurot qoldirdi.. Film Gollivud yulduzlaridan biri Kira Naytli futbolchi qiz rolini ijro etgan muhabbat, umuminsoniy tuyg'ular va irqiy muammolarni o'z ichiga olgani bois, keng ommani jalb qila oladigan darajada ta'sirli suratga olingan ekan. Menimcha, mana shunday filmlar yoshlar o'rtasida futbol yana asosiysi - sog'lom turmush tarzini  targ'ib qilishi, aniq. Yoshligimizda gurji kinochilarining futbol haqidagi - “Birinchi qaldirg'och” filmini qayta-qayta ko'rib, zerikmas edik...
Kino san'atining kuchi    
Taniqli insonlardan biri: “Kino insonni orzular sari etaklaydi” degan ekan. Bu - rost gap. Ilgari uchuvchilar bosh qahramon bo'lgan kartinalar ko'p bo'lar edi, shuning uchun maktabda - “Kim bo'lsam ekan?” mavzusidagi insho yozgan bolakaylarning teng yarmi ulg'ayganida uchuvchi yoki fazogir  bo'lishni orzulagan.  Inson xarakteri o'zi shunday yaratilgan, menimcha. U kimni ko'klarga ko'tarishsa, o'sha kasb egasini o'ziga kumir qilib oladi va xuddi u singari  bo'lishga intiladi. Ayniqsa, yoshlar ruhiyatiga kinoning ta'siri juda katta. Ming izlamaylik, zamonaviy kinoqahramonlarimiz ichidan  o'rnak bo'la oladigan sportchilarni topa olmaymiz. Barmoq bilan sanarli darajada bo'lishi mumkindir, biroq ancha vaqtlardan beri o'zbek kinosida  tomoshabinlarni lol qoldiradigan sportchi obrazi yaratilgani yo'q.
Menimcha, tomosha san'atining barcha turlari insonda kelajakka bo'lgan ishonch tuyg'usini uyg'otishi kerak. Gruzinlarning o'sha mashhur “Birinchi qaldirg'och” kinosi olinganidan so'ng yoshlar o'rtasida  futbolning  ommaviyligi kuchayib ketgan va oradan olti yil o'tib, “Dinamo”(Tbilisi) o'z tarixida yagona bo'lib turgan Evropa kubogini qo'lga kiritgan ekan.        
O'zbekona futbol filmini kutyapmiz
Afsuski,  ayni paytda ijod qilayotgan kinoijodkorlarimiz  dunyoda birinchi raqamli sport turiga hali murojaat qilgani yo'q. Bir vaqtlar tasvirga tushirilgan “Uchrashuv” qisqa metrajli filmini hisobga olmaganda zamonaviy  rejissyorlarimiz  hozircha muhabbat va oilaviy mojarolar haqida filmlarni suratga olishga zo'r berishgan. Axir,  “Suyunchi” va “Yor-yor”dagi futbol mavzusi joy olgan epizodlar barchamizni yod bo'lib ketgan-ku. Adashmasam, bundan bir necha yillar oldin terma jamoamizning 1994- yildagi Osiyo o'inlaridagi g'alabasiga bag'ishlangan kinofilm olingan edi. Lekin, kinoasar tomoshabinlarning sevimli filmiga aylanmadi.  
Termamizni noyabr oyida bo'lib o'tgan o'yinida “Paxtakor” stadioni tomshabinlar bilan to'ldi. Mana shu singari bahslarda bemalol toza kadrlarni suratga olish mumkin. Chunki, hozirgi tomoshabin juda zukko. U soxtalikni yoqtirmaydi. Demak, o'z qahramonlarini kutayotgan o'zbek kinoshinavandalari uchun hissiyotlarni to'la aks ettira oladigan hayotiy sport mavzusidagi kinoasarlari zarur.
O'zbek kinosida o'z ishini ustasi bo'lgan stsenariychi, rejissyor va aktyorlarning ko'pligiga esa shubha yo'q. Bu mavzuga yana qaytamiz... Elmurod ERMATOV, Andijon  
— deya xabar beradi uff.uz nashri.