«Paxtakor» moliyaviy qiyinchiliklarga qaramay, bu yil ham chempionlikni qo'lga kiritdi. Shuning barobarida «sherlar» o'z unvonlarini munosib himoya qildilar. Ayni payt futbolchilar ta'tilda. Tez orada yangi mavsumga tayyorgarlik boshlanadi.
Shonli tarixga ega klubni oldinda yanada qiyin kechishi kutilayotgan yangi mavsum kutib turibdi. Turli gap-so'zlarga qaraganda, chempion jamoani ayrim etakchi futbolchilar tark etishadi. Deylik, Igor Sergeevga «Sanfrechche Xirosima» jamoasi qiziqmoqda. Terma jamoamiz markaziy himoyachisi Egor Krimetsning esa o'ziga yaxshi tanish bo'lgan Xitoy chempionatiga yo'l olishi kutilyapti. Jamoa sardori Kaxi Maxaradzening ham «Paxtakor»dan ketishi haqida gap-so'zlar tarqaldi. Biz Gruziyada hordiq chiqarayotgan Kaxi bilan bog'lanib, ayni mavzuda intervyu oldik.
- Kaxi, avvalo, sizni chempionlik bilan tabriklaymiz. Suhbatimizni mavsum yakunlari haqidagi mulohaza va taassurotlaringiz bilan boshlasak...  
- Tabrik uchun rahmat. Biz uchun o'ta murakkab va qiyin mavsum bo'ldi. Barcha yo'nalishda qiyinchilikka duch keldik. Shunga qaramay, katta matonat namoyish etib, yakunda chempionlik unvonini saqlab qoldik. Qaysidir ma'noda bu galgi chempionlik mo''jiza evaziga qo'lga kiritildi.
- Chempionlik poygasida hal qiluvchi ahamiyat kasb etgan eng qiyin o'yinlarni ayta olasizmi?
- Bu yil ham «Navbahor» va «Mash'al» jamoalariga qarshi safar o'yinlarida qiyinchilikka uchradik. Menimcha, Namangan va Muborakdagi g'alabalar evaziga yana chempionlik shohsupasiga ko'tarildik.
- Qarshida «Nasaf» bilan bo'lib o'tgan 29-tur uchrashuvi-chi? Bu o'yin­ni esdan chiqardingizmi?
- Yo'q, albatta. Aynan Qarshidagi g'alabadan so'ng chempion bo'lishimiz deyarli oydinlashdi. O'z o'yinimizni namoyish eta olsak, safardan g'alaba bilan qaytishimizni bilardik. Zero, «Paxtakor»ning potentsia­li juda yuqori. Futbolchilar o'z imkoniyatlarini to'liq namoyon etsalar, jamoamizni uncha-muncha klub engolmaydi. «Paxtakor» - bugungi kunda O'zbekistonning eng kuchli jamoasi. Bu isbot talab qilmaydigan haqiqat. Kezi kelganda shuni aytishim kerak, ayrimlar tomonidan «Paxtakor» o'yin­larni sotib oladi» qabilida aytilayotgan gap-so'zlar safsata, bo'htondan boshqa narsa emas. Buni ishonch bilan aytaman. Agar pul bo'lganida,  birinchi navbatda, biz - futbolchilarga berilardi. «Paxtakor» chempionga xos o'yin namoyish etmadi, u bunga munosib emas», degan gaplarga ham umuman qo'shilmayman. O'yin hamisha unutiladi, natija tarixda qoladi. Qolaversa, oliy liganing 15ta jamoasi ham «Paxtakor»ga qarshi tish-tirnog'i, 200 foiz kuch bilan maydonga tushadi. Bu gapimni inkor etadiganlar o'yinlarimiz videoyozuvini ko'rib chiqishsin.
- Xo'sh, «Metallurg»ga qarshi kechgan o'yin haqida nima deysiz?
- Ochig'ini aytaman, biz so'nggi daqiqalarga qadar g'alaba uchun o'ynadik va buning uchun yakunda taqdirlandik. Ha, ko'pchilik o'yin oxirida belgilangan 2ta penaltiga e'tiroz bildirdi. Lekin ikki vaziyatda ham jarima maydoni ichida qo'pollik ishlatilgandi-ku. Evropa futboliga qarasangiz, ko'plab o'yinlar taqdiri so'nggi daqiqalarda hal bo'ladi. Bu futbol, uni shunday kutilmagan natijalar, oldindan aytish mushkul holatlar uchun ham yaxshi ko'rishadi. Yana bir bor qaytaraman, «Paxtakor» hech qachon kelishilgan o'yin­larda ishtirok etmagan va ularni sotib olmaydi ham. Biz haqli ravishda chempion bo'ldik. «Toza» o'ynamaganimizda, bunday natijalarga erisholmasdik. Eng muhimi, uzoq muddat maosh olmay turib ham, ko'zlangan maqsadga erishish mumkinligini, hammasini pul hal qilmasligini isbotladik. Deylik, men oxirgi marta qachon maosh olganimizni eslolmayman. Aslida bizning chempion yigitlarimizga haykal qo'yish kerak.
- O'zbekiston kubogi yarim finalida «Bunyodkor»ga imkoniyatni boy berdinglar. Ko'pchilik «Paxtakor»ning har ikki uchrashuvda yutqazishini kutmagandi...
- Menimcha, final yo'llanmasi taqdiri birinchi o'yindayoq hal bo'lgandi. Aslida o'sha, o'z maydonimizda o'tkazilgan uchrashuvni yirik hisobda foydamizga hal qilishimiz kerak edi. Afsuski, vaziyatlardan foydalanoldik. Adashmasam, o'sha bahsda raqib darvozasi tomon 24-26 marta aniq zarba berdik. Lekin omad kelmasa qiyin ekan. Agar vaziyalarning yarmidan samara chiqarganimizda ham, final masalasini deyarli hal qilib qo'yardik. Mehmonlar esa 4ta xavfli hujumning 3tasini golga aylantirishdi. Bilmadim, balki O'zbekiston kubogidan chiqib ketganimiz bizni yanada kuchaytirgandir...
- Umuman, oliy liga saviyasi haqida qanday fikrdasiz?
- Chempionat saviyasi oshayotgani ko'zga tashlanmoqda. Mana, chempionlik masalasi so'nggi turda hal bo'ldi. Ligani tark etadigan jamoa nomiga ham aynan 30-turda oydinlik kiritildi. Oxirgi turgacha oliy ligada qolishi dargumon bo'lgan «Buxoro» birdaniga 2 pog'ona yuqoriladi. Agar «Dinamo» so'nggi daqiqalarda to'p o'tkazib yubormaganida, oliy ligani «So'g'diyona» tark etardi. Shuning o'zi chempionat saviyasi oshib borayotganidan dalolat.
- Endigi rejalar qanday?
- Hozircha aniq gap aytolmayman. Ayni payt oilam davrasida hordiq chiqaryapman.
- «Paxtakor» bilan shartnomangiz yakuniga etdi. Kelishuvni uzaytirasizmi?
- Barchasiga yil oxirida oydinlik kiritamiz. Ayni payt bu haqda o'ylayotganim yo'q.
Davomi InterFUTBOL gazetasi blogida.
— deya xabar beradi uff.uz nashri.