Sobiq ittifoq parchalangach, barcha mustaqil davlatlar o'z milliy chempionatlarini o'tkaza boshladilar, shu jumladan biz ham. O'rta avlod muxlislari yaxshi bilishadi, sobiq ittifoq chempionatining yuqori ligasi o'sha davrlarda “Viisshaya liga” ya'ni “Oliy liga” nomi bilan yuritilgan.
O'z mustaqilligini qo'lga kiritgan davlatlar milliy chempionatlarini o'tkazishar ekan, yuqori ligasini turli xil jarangdor nomlar bilan belgilab oldilar. Xayratlanarlisi, o'z milliy futboli taraqqiyotini belgilab olgan o'zbek futboli yuqori ligasini xali xamon eskitdan qolgan, siyqasi chiqqan nom bilan atamoqda.
Zamonamiz o'zgarib kundalik xayotimizga bir-biridan ajoyib, zamon bilan xamnafas bo'lgan so'zlar kirib kelmoqda. Yuqori ligamizni jarangdor, milliylik bilan uyg'unlashgan zamonaviy, xali xech kimda ishlatilmagan so'z bilan yuritsak bo'lmaydimi?
Xorijiy davlatlarning yuqori ligasiga e'tibor qaratsangiz ularning nomiga xavasingiz keladi. Angliya, Rossiya va Ukrainada “Prem'er liga”, Turkiya va Gretsiyada “Super liga” Ispaniyada “La liga”, Italiyada “A seriya”, Germaniyada “Bundesliga”, Qatarda “Yulduzlar ligasi”, Yaponiyada “Jey” va Koreyada “Key”ligalari.
Oramizda nom xech narsani anglatmaydi deydigan muxlislarimiz ham uchrab turadi. To'g'ri birinchi navbatda milliy chempionatimiz saviyasini ko'tarishimiz kerak, bu barchamizga oydek ravshan. Lekin xalqimizda ismi jismiga mos bo'lsin degan ajoyib naql bor.
Balkim biz xam Rossiya va Ozarbayjonga o'xshab yuqori ligamizni “Prem'er liga” yoki Turkiya va Gretsiyadagi kabi “Super liga” deb nomlarmiz, o'ylaymizki bu borada mutaxassislarimiz tegishli ishlarni amalga oshiradilar. Zero, deyarli xech qaysi davlatda ishlatilmaydigan, sobiq ittifoq davrini eslatuvi nomdan biz bugun butunlay voz kechishimiz kerak.
Xayrullo VASIEV blogidan olindi.
— deya xabar beradi uff.uz nashri.