“Andijon” jamoasi ham yangi mavsumga tayyorgarlikni boshladi. 22 dekabr kuni yig'ilgan “burgutlar” shu kuni Sho'rbuloq dahasidagi futbolga ixtisoslashtirilgan maktab internatining sun'iy qoplamali maydonida birinchi mashg'ulotni o'tkazdilar.
Birinchi kungi mashg'ulotda 25 nafar futbolchi ishtirok etdi. Bulardan 5 nafarini darvozabonlar tashkil qildi. Tarkibda Lochin Dolimov, Eldor Isaboev, Shukur Jumaboev, Davron Tursunov, Asror Rahmonov, Tursunboy Xusanov, Farhod Bekmurodov kabi futbolchilar yig'inning dastlabki kunidan jamoada paydo bo'lishdi. Shuningdek, birinchi liga vakili “UzDongJu” jamoasidan Alisher To'xtasinov, Aziz Qayumov, Davron Jo'raqulov, Akbar Xodjaev hamda yana bir qator yosh o'yinchilar qo'shilib ko'rikdan o'tkazilyapti.
Bugundan mashg'ulotlarga Javlon Guseynov ham qo'shildi. Mashg'ulotlarni Nozim Mullaoxunov bilan Vitaliy Legay birgalikda olib borishyapti. Darvozabonlar bilan esa Hamid Zokirov shug'ullanmoqda.
“Andijon”ning dastlabki yig'ini bir haftaga yaqin davom etadi. Klub birorta futbolchi bilan hali rasman xayrlashgani yo'q.
— deya xabar beradi uff.uz nashri.