Qatar poytaxti Doha shahrida boks bo'yicha kattalar o'rtasida o'tkazilayotgan jahon chempionatida kecha ringga ko'tarilgan 5 nafar bokschimizdan to'rttasi navbatdagi g'alabalarni qo'lga kiritib, chorak final yo'llanmasiga ega bo'ldilar.
Dastlab Murodjon Axmadaliev (-56 kg) ushbu vazn toifasida birinchi raqamda saralangan qozog'istonlik Qayrat Eralievni 3:0 hisobida mag'lub etdi. Ushbu g'alaba qolgan sportchilarimizni yanada ruxlantirib yubordi va hamyurtlarimiz birin-ketin raqiblarini enga boshlashdi.
Jumladan, Fazliddin G'oipnazarov (-64 kg) mezbonlar vakilini birinchi raunddayoq nakautga uchratgan bo'lsa, Bektemir Meliqo'ziev frantsiyalik Kristian Assomodan 2:1 hisobida ustun keldi. Yuqori vazn toifasida Vatanimiz sharafini himoya qilayotgan Rustam To'laganov ham Yangi Zelandiya vakili Devid Niik ustidan 3:0 hisobida ishonchli g'alabani qo'lga kiritdi. Kecha bo'lib o'tgan bahslarda faqatgina Xasanboy Do'stmatov ozarbayjonlik Rufat Xuseynovga 1:2 hisobida imkoniyatni boy berdi.
Shu tariqa, jahon chempionatiga yo'l olgan 9 nafar charm qo'lqop ustalarimizdan 4 nafari chorak finalga chiqishdi. Bugun yana 4 nafar bokschimiz chorak final yo'llanmasi uchun ringga ko'tariladilar.
Xususan, Shaxobiddin Zoirov (-52 kg) xitoylik Xu bilan, Elnur Abduraimov (-60 kg) Yangi Zelandiya vakili Chad Milnes bilan, Elshod Rasulov (-81 kg) turkiyalik Karlidag bilan, Bahodir Jalolov (+91 kg) esa Linier Pero (Kuba) bilan bahs yuritadilar. Barcha sportchilarimizga bo'lajak bahslarda ham omad va zafarlar tilab qolamiz. Shavkat Jalilov
Manzil: O'zbekiston Milliy Olimpiya qo'mitasi matbuot xizmati

— deya xabar beradi uff.uz nashri.