O'zbekiston milliy terma jamoasi bosh murabbiyi Samvel Babayan Bahreynga qarshi kechgan uchrashuvdagi g'alabadan so'ng matbuot anjumanida ishtirok etib, bahreynlik jurnalistlar savollariga javob qaytardi.
- O'yin haqidagi fikrlaringizni bildirib o'tsangiz. Ayniqsa ikkinchi bo'lim haqida nima deya olasiz? Qanday qilib to'rtta gol kiritishning uddasidan chiqa oldingiz?
- Men avvalo o'zbek futbolining barcha muxlislarini ushbu g'alaba bilan muborakbod etmoqchiman. Biz yigitlar bilan ushbu g'alabani haqiqiy muxlislarga bag'ishlamoqchimiz. Ular biz uchun astoydil ishqibozlik qilmoqdalar va yangi g'alabalarga undamoqdalar. O'yinga keladigan bo'lsak, birinchi bo'limda ham o'yinni nazorat qilib turgan edik, ikkinchi bo'limda shunchaki vaziyatlardan foydalana oldik, xolos. Biz bugun juda yaxshi tashkil etishgan jamoani ko'ra oldik. Bizning vazifamiz - har bir uchrashuvda mana shunday natijaga erishib, jamoa oldiga qo'yilgan maqsadga erishish.
- Birinchi bo'limda Bahreyn terma jamoasining kamchiliklarini bilib olib, ikkinchi bo'limda taktikangizni o'zgartirgan ko'rinasiz. Tanaffus vaqtida futbolchilaringizga qanday ko'rsatma berdingiz?
- Avvalo biz o'yin oldidan o'z rejamizga ega edik va bu rejaga oxiriga qadar amal qildik. Taktikani o'zgartirishga kelsak, yana bir bor takrorlayman, biz birinchi bo'limda ham o'yin nazoratini o'z qo'limizda ushlab turgan edik. Ikkinchi bo'limda ham yigitlar berilgan ko'rsatmalarni intizom bilan bajarishda davom etdilar. Ularning har birining oldida o'zi bajaradigan vazifa aniq qilib qo'yilgan edi. O'yinimizda nima o'zgarganini esa aytishni istamayman. Chunki biz hali Bahreynga qarshi yana maydonga tushishimiz lozim.
- Bahreyn terma jamoasi Yamanga qarshi kechgan uchrashuvni juda yaxshi o'tkazgan va 4:0 hisobida g'alabaga erishgan edi. Bugun esa sizning jamoangiz g'olib chiqdi. Nima deb o'ylaysiz, bu o'yinni Bahreyn boy berdimi yoki sizning jamoangiz g'alabani tortib olishga muvaffaq bo'ldimi?
- Agar bugun Bahreyn terma jamoasi kuchsiz o'yin namoyish qildi, desak, adolatsizlik bo'lar edi. Aslida Bahreyn terma jamoasi KXDRga qarshi kechgan uchrashuvda ham ajoyib o'yin namoyish qilgan va mag'lubiyatga haqli emas edi. Yamanga qarshi kechgan bahs haqida ham iliq fikr bildirish mumkin. Menimcha bugungi natijaga sabab shundaki, biz Bahreynga eng kuchli jihatlarini namoyish etish imkonini bermadik. Raqib hujumda erkin harakat qila olmadi va gol ura olmadi. Bizning hujumdagi futbolchilarimiz ham yaxshi klublarda o'ynaydilar va borgan sari o'zaro bir-birini yaxshi tushunib bormoqdalar. Bu esa kerakli natijaga erishish imkonini berdi. Foto manbasi: the-uff.com
— deya xabar beradi uff.uz nashri.