Bu shaxsiy maqola. O'tib borayotgan yilning eng muhim voqealarini o'nlik shaklida tuzib chiqdim. O'zimga yoqqan, o'zim e'tibor bergan va o'zimga ma'qul kelgan futbol hodisalarini yodga olganman, xolos. 10. Murabbiylar epidemiyasi.
Bu yil haqida gap ketadigan bo'lsa, bir qator tajribali murabbiylarning omadsizligi bilan esda qoladigan bo'ldi:
Anchelottidan boshlandi hammasi. Odatda, bunaqa ishlar Madriddan boshlanadiJ
Mourinoning ham 3 yillik missiyasi poyoniga etdi. Maurning “Chelsi”ni premer-ligadan tushirib yuborishini kutib o'tirishmadi haliyamJ
Lui van Gaal asri ham tugab borayotganligini ko'ryapmiz. Yangi yilda u ham boshqa jamoa qidirishi turgan gap. Biroq, gollandning qaerga borishini bilmaymizu, o'rnini Mourinoga bo'shatib berishi mumkinligidan o-o-ozgina xabarimiz bor har holda…
“Real”ga olingan Rafa Benitesning kursisi ham qimirlab turibdi. Muxlislar har kuni talab qilishmoqda uning ketishini. U ham yangi yilning ilk oyida ariza yozsa kerag-ov…
Pellegrinida ham shunaqaroq holat. “MS” sarflanayotgan pulga yarasha o'ynamayapti. Tabiiyki, uning boshiga “Bavariya”da zerikayotgan Pep Gvardiola kelsa kerak. Bu ham deyarli aniq bo'lib ulgurgan taxmin.
Yilning avvalida ham bizda murabbiy almashgandi. Bu haqda keyinroq, albatta.
9. Messining fantastik gollari.
Leonel Messining gollariga, ayniqsa, superreyd orqali amalga oshiradigan gollariga o'rganib ketganmiz. Lekin ikki yil qatorasiga “Oltin to'p”ni Ronalduga oldirib qo'ygan fenomen bu safar asosiy raqibiga hech qanday imkoniyat qoldirmadi. Keyingi yilning ilk oyi Messining ana shu to'pni qaytarib olishi bilan boshlanadi, albatta. Bunga esa u uch-to'rtta o'yinda ko'rsatgan fantastik harakatlari bilan erishdi, deb ayta olaman.
“Bavariya” darvozasiga urgan goli va Ispaniya chempionligini hal qiluvchi bahsdagi “slalom yurishi” yilning shedev gollari turkumiga kirishi bilan birgalikda, asosiy bahsda kimlar yukni ko'tarishi lozimligini esga solib qo'ydi. Messi terma jamoada ham shunday reydlar uyushtirdi Chilidagi musobaqada, biroq “Barsa”dagi faoliyati baribir uning “ko'ziri” bo'lib qolajak, shekilli. Besh-olti soniyalik harakatlari bilan Leo kim aslida kimligini eslatib qo'yaverdi hammaga. Hech qachon Messini o'zidan zo'r demagan Ronaldu ham oxiri bu yil tan oldi. Boshqa chorasi qolmadi. Bravo!
8. Chilining g'alabasi.
Messining omadsiz musobaqasi… To'g'ri, bir yil oldingidek bu musobaqa ham Argentina uchun ikkinchi o'rin bilan tugadi, buni yomon natija deb bo'lmas balki. Ammo, tan oling, Argentina o'tgan yili Germaniyadan engilgan edi. Bu safar Chilidan. Farqi bor-a?! Shu bois, argentinaliklar bu turnirni bemalol, katta harflar bilan OMADSIZ deb atasalar bo'ladi. Chili bu bellashuvda haqli g'alabani qo'lga kiritgani so'zimizni tasdiqlaydi. Penaltilar seriyasida gohida kuchsizlar ham engib ketadilar. Bu turnirda kuchlilar engdi, adolat qaror topdi. Dunyo yana bir grandni kashf etdi. Uning nomi ChILI edi. Bu yurt vakillari yulduzlar terma jamoasini mag'lub etib, keyingi musobaqalarda ularga beparvo bo'luvchilarni qattiq jazolashlarini eslatib qo'yishdi. Ogoh bo'ling-a endi, falon-falonlar!..
7. Levandovskiyning rekordi.
Levandovskiy degan yigit ikki yilda bir porlaydi. Porlagandayam “Real”ga 4ta gol urib tashlaydimi-e, 9 daqiqa ichida 5ta gol urib tashlaydimi-e, xullas, “gol jinnisi”ga aylanadi-qo'yadi. Keyingi yil davomida yuraveradi, hech narsa bo'lmagandek. To'g'ri, bu yil u Ginnes rekordlar kitobiga kirganidan keyin ham rosa gol urib yurdi. Ammo baribir o'sha odatni tark etmaydigandek tuyulaveradi – gol urmasdan ham yillab yura olish odati!
Ammo “Yuventus” xavotir olsa bo'laveradi. Fevralda Robert ko'pincha yaxshi formada bo'ladi.
6. “Barsa” 5 karra g'olib:
Yil Kataloniyaga bag'ishlandi!
O'tgan yil oxirlaridagi “Barselona”ning ahvoli yodingizdami? Jamoaga yangi murabbiy kelgan, jamoasini o'ynata olmayotgan paytlar edi. El klasikodagi Suares debyuti omadsiz boshlangan, xullas, o'rtamiyona klubga o'xshab borayotgandi “Barsa”. Enrike bilan Messi o'rtasidagi tushunmovchiliklardan so'ng esa, yangi murabbiyning klubni tark etishi haqidagi gaplar urchigandi, esingizda bo'lsa. Ammo Luis Enrike g'alati odam ekan. U hammasini to'g'rilay oldi. To'g'rilaganidayam, shu qadar to'g'riladiki, asti qo'yavering. Dastlab chempionatda g'olib bo'ldi. Keyin EChLni engdi. Superkubok sohibi bo'ldi. Oxiri haqli ravishda jahon chempioni degan nomni o'ziniki qilib oldi. Pepning davri qaytib kelgandek bo'ldi. Xavi-Inesta-Messi uchligi siymosi boshqa uchlikda – Messi-Neymar-Cuares uchligida namoyon bo'ldi. Bu “Barsa”ni kelayotgan yilda ham to'xtatib qolishning iloji yo'qqa o'xshaydi.
5. Kelishganlarni ushladik!
Ularni nima qilaylik endi???
Ha, jinoyatchilar go'yoinki ushlandi. Lekin nimagadir ijroga kelganda, oqsadik. Ayrimlar bu holni KUTILGAN VOQELIK deb atamoqdalar. Menimcha, bunisi kutilmagan edi. O'zi, oliy ligamizdagi kelishilgan o'yinni e'lon qilish ilk kutilmagan voqea bo'lsa, ijrosini asta-sekin “esdan chiqarib yuborish” ikkinchi kutilmaganlik edi. Hay, mayli, endi nima deymiz: Jurnalistning qo'lidan nima ham kelardi? Borini gapirdi, aytdi, ko'rsatdi, yozdi. Uyog'iga esa mutasaddilarimizga insof bersin. Agar bir ishni oxirigacha etkaza olmas ekanlar, boshlamasinlar edi. Boshladilarmi, mard bo'lib yakuniga etkazsinlar. Shu!
4. APLga nima bo'lyapti?
Men tanigan va bilgan APL bu yili chilparchin bo'lib ketgandek chamamda. Oldinlari ham dastlabki turlarda qandaydir “Sanderlend” yo Sautgempton” peshqadam bo'lib olardi, ammo 10-turdan keyin hammasi joyiga tushardi. Bu yil esa umuman bo'lakcha ishlar sodir bo'lmoqda. “Lester”ning oldinda yurganiga bitta “Chelsi”ni aybdor sanab bo'lmaydi, axir. Londonliklarda inqiroz ekan, boshqalar-chi? Ular nima qilishmoqda? Ayniqsa, “Arsenal”???
Bu dovdir jamoaning holati shunaqaki, u birinchi o'ringa ko'tarilishi mumkin holda ham 0:4ga engilib qo'yaveradi. Arsen Venger yuqoridagi murabbiylar epidemiyasiga kirmasa-da, uni ham qo'shib yuborish vaqti kelganini ta'kidlamoqda ba'zilar. Xullas, kuzatishda davom etamiz. Baribir “Lester”ning taxtda turishiga hech kim ishonmayapti. Raneri esa ishontirmoqda. Yil tugab borayotgan pallada, Klopp degan odam o'zgacha tush ko'rayotgan inglizlarni uyg'otishni boshladi: “Turinglar-e-e-e-ey!” (Uzr, nemischasini bilmaymanJ)
3. El klasiko tugadimi?!
Mana bunisi endi dahshat. APL-ku iziga tushib ketar, biroq Ispaniya premerosida “el klasiko”ning ma'nosi yo'qolsa, milliy chempionat tamom bo'ldi, deyavering. APLda “Chelsi” bo'lmasa, “Arsenal” bor, “MYu” bo'lmasa “MS” bor. “Liverpul” qaerdandir uyg'onib qoladi. Ammo sho'rlik ispanlarni bir o'yin ushlab tursa, ne ajab. Klasiko bahsida bir jamoa azaliy raqibining uyiga borib 4ta javobsiz gol urib kelsa, dodingni yana qaysi o'yinga aytasan??? Boshqa qaysi o'yinni ko'rish mumkin, bilmadim, ochig'i. Ha-ya, 10:2lar ham boru boshqa uchrashuvlarda, uzr, adashib ketibmanJ
2. O'zbekiston terma jamoasining 5ta g'alabasi.
APLinggayam, la-ligaganggayam, deymizu, sayohatimizni tugatib, jonajon O'zbekistonimizga qaytib kelamiz. Bizda o'tib borayotgan yil ajoyib g'alabalar bilan esda qoladigan bo'ldi. Babayanning terma jamoaga kelishi va qatorasiga 5ta o'yinda g'alabaga erishishini ochig'i, men kutmagandim. Ayniqsa, Toshkentdagi Shimoliy Koreya bilan bo'lgan o'yinning 3-daqiqasida umuman ishonmay qo'ygandim. Yutqazayotgandik-da!
Babayan terma jamoa bosh murabbiyi sifatida chiroyli rekord qayd etib, guruhda qolishi mumkin bo'lgan jamoamizni deyarli keyingi bosqichga olib chiqdi. Deyarli. Buyog'iga, kelayotgan yilda ikkita oson o'yinda muvaffaqiyatga erishishimiz qoldi, xolos. Keyin esa og'ir bosqich. Saralanganlar bilan o'ynashimizga to'g'ri keladi. Har doim mushkulot tug'diradi bu bahslar. Ammo baribir umid qilib qolaveramiz. Umid qilamizki, keyingi yillar sarhisobi qilinayotganda, terma jamoamiz muvaffaqiyati yana va yana yuqori o'rinlarda esga olinajak. Ishonib qolamiz.
1. Eng muhimi.
Eng muhim voqeaga etib keldim. Men uchun eng muhimi – yuqorida nomi qayd etilgan o'yinlaru hodisalarni O'Z UYIMDA KO'RGANIM, UYIMIZ TO'RIDA OSIG'LIK TURGAN TELEVIZORIMIZDA TOMOShA QILGANIM, STADIONGA BORIB-DA KUZATGANIMDIR!!! Bundan ortiq baxtni bilmagan edim olamda. Tushundingiz deb o'ylayman meni?!
Yuqorida aytib o'tdimu, o'ntalik shaxsiy, deb. O'zimga tegishli, deb. Shuning uchun birinchi o'rinda boshqa qandaydir futbol hodisasini yoki qaysidir shedevr golni kutgan muxlislardan uzr so'rayman. Umidlari oqlanmagani uchun. Ammo keyingi yil, nasib qilsa, boshqacharoq o'ntalik tuzamiz, albatta. Evropa chempionati turibdi oldinda. EChLlar, termamiz o'yinlari. Xullas, ko'rishguncha. Xayrulla Hamidov
— deya xabar beradi uff.uz nashri.