Bir yil avval «Rostov» Rossiya premer-ligasida «jon» saqlab qolish uchun kurashayotgan, jamoa boshqaruvi xushchaqchaq Igor Gamula qo'lida edi. Ammo keyinchalik Qurbon Berdiev Rostovga tashrif buyurdi-yu, qisqa vaqtda vaziyatni tamomila o'zgartirib yubordi. Demak, quyida «Rostov» klubining mavsum-2015|2016ni kuchli to'rtlikda yakunlashi mumkinligi xususida so'z yuritamiz.
Raqamlar
Ha, muqaddima aynan raqamlarga bag'ishlanadi. Aytishadi-ku, statistika hammasidan xabardor! Xo'sh, beg'araz sonlar nimadan dalolat bermoqda? «Rostov» o'tgan mavsum qishki tanaffusga elitada «jon» saqlab qolish uchun kurashayotgan jamoa sifatida yo'l oldi. Dastlab Miodrag Bojevich, so'ngra Igor Gamula ustozligida to'p surgan futbolchilar harchand urinishmasin, 11tadan ko'p ochko jamg'ara ololmadilar. Klub yoz-kuz davrida ikkita g'alabani qo'lga kiritib, 5 marta durang qayd etdi. Mavsumning ikkinchi qismi ham aytarli o'zgarishsiz kechdi. Xullas, «Rostov» chempionat yakunida umumiy hisobda 29 ochko to'plab, 14-o'rinni egalladi va o'tish o'yinida qatnashishga majbur bo'ldi. Ya'ni jamoa 7ta bahsda zafar quchib, 8 marta raqiblari bilan murosa ko'chasini tanladi. O'sha mavsum rostovliklar himoyadagi noshud harakatlari bilangina e'tiborga tushdilar. Deylik, to'plar nisbati dahshatli ko'rinish oldi - 27:51. Shu tariqa «Rostov» chempionatda eng ko'p to'p o'tkazib yuborgan klubga aylandi (1ta uchrashuvda o'rtacha 1,7ta gol). 0:5, 0:6, 3:7 hisobidagi mag'lubiyatlar odatiy hol sifatida qabul qilindi. Xullas, xokkeycha hisoblar...
Hozir esa holat umuman boshqacha. «Rostov» qishki ta'tilga chempionatning ikkinchi jamoasi sifatida yo'l oldi. Boz ustiga, rostovliklar ayni payt peshqadam - TsSKAdan 3 ochko ortda qolishyapti, xolos. Qurbon Berdiev shogirdlarining hisobida 34 ochko bor. Ular 10ta o'yinda raqiblarini engib, 4tasini durang bilan yakunlashdi. Bundan ko'rinadiki, «Rostov» yarim mavsumda butun avvalgi chempionatdagi natijasini yaxshilab, hattoki, g'alaba qozonish borasida ham ijobiylikni ta'minladi. Ayni damda evrokuboklar hududidan chiqib ketmaslik uchun jamoa zaxirasida 4 ochko mavjud.
Qurbon Berdiev
«Rostov» g'alabalarining bosh sababchisi, jamoani jar tubidan qutqarib, yuksak cho'qqilar sari etaklagan shaxs aynan shu mutaxassis hisoblanadi. Qurbon Bekievich ajoyib futbolchi bo'lgan, murabbiylik faoliyatini esa sobiq ittifoq davridayoq boshlagan. Ammo futbol jamoatchiligi uni asosan «Rubin»ga ustozlik qilgan pallalardagina tanidi. E'tiborlisi, joriy mavsum boshlanguniga qadar hamma uni «Bitta jamoa murabbiyi» sifatida yodga olardi. Ayrim fikrlarga ko'ra, Qozon klubining etakchilardan biriga aylanishiga shunchaki, ba'zi omadli omillar sabab bo'lgan, bosh murabbiy esa «Rubin», deb nomlanuvchi o'ziga xos zanjirning bir halqasi, xolos emish. Lekin shu halqalarni aynan Qurbon Berdiev jamlaganini unutmaslik lozim. Kelajakdagi yutuqlar poydevorini aynan u qo'ydi-ku! Mana, ushbu mutaxassis Rostovdagi faoliyati davomida ham mohir bunyodkor, muvaffaqiyatlar ijodkori ekanligini isbotlayapti. Buni anglash uchun «Rostov» hamda Berdievsiz qolgan «Rubin»ning hozirgi holatiga nazar tashlashning o'zi kifoya.
Qurbon Bekievich «Rostov» tarkibini shakllantirish uchun ancha kam vaqt sarfladi. Uning Qozondagi murabbiylik izlanishlarini diplom ishi yoki dissertatsiya yoqlashga qiyoslash mumkin. Chunonchi, uni «yozish» uchun mutaxassisga nisbatan ko'proq muddat kerak bo'lgandi. Ammo Berdiev ishlab chiqqan modelning ish berishi oydinlashgach, uni boshqa jabhalarga ham osonlikcha tatbiq etish imkoni tug'ildi. Tabiiyki, birgina cheklov bilan: uslub texnikasining siri faqat asoschining o'zigagina ayon edi.
Yarim yillik moslashuv davri, bitta butun boshli mavsum, aniq selektsiya, Sezar Navas singari qahramonlar, Dmitriy Poloz kabi iqtidorli yoshlar - shu tariqa muvaffaqiyat qolipi tayyorlandi. Albatta, bugungi «Rostov» hozircha biroz sayqallangan «nusxa», xolos. Uning Rossiya premer-ligasi chempionligini nishonlashi yoki ChL yo'llanmasini qo'lga kiritishini oldindan taxmin qilish qiyin. Ammo premer-ligani kuchli to'rtlikda yakunlashi uchun imkoniyatlari etarli.
«Rubin»ning yangi modeli
«Rostov»da tanlangan uslub haqida gapirsak, u XXI asrning dastlabki 10 yilligi yakunlarida «Rubin» namoyish etgan o'yinning haqiqiy nusxasidir. Eslang, qozonliklar 2 marta «oltin» yutishdan tashqari, «Barselona», «Inter» hamda «Atletiko» singari kuchli klublarni mag'lub etishgandi. Keyinchalik jamoa hujumkorlik borasida inqilob yasashni boshlagandek ko'rindi-yu, ammo yangi loyihani oxiriga etkazish Berdievga nasib qilmadi. Qurbon Bekievich Rostovda bularning baridan voz kechib, eski va qadrdon himoyaviy uslubni ma'qul ko'rdi. O'yindagi maksimal xotirjamlik, butun jamoaning himoyadagi aniq harakatlari va shundan so'nggina oldinga intilish... Bu erda asosiy urg'u standart vaziyatlar va qarshi hujumga qaratiladi. Natija o'zini uzoq kuttirib qo'ymadi. «Rostov» chempionatning dastlabki 18ta turida 16ta to'p o'tkazib yubordi, bu premer-ligadagi eng yaxshi ko'rsatkichdir. Boshqa tomondan, Berdiev jamoasi atigi 23ta gol urib, mahsuldorlik bobida chempionatning atigi 9-ishtirokchisi bo'lib turibdi. Ammo bu endi boshqa masala.
Mazkur vaziyatdan birgina xulosaga kelish mumkin - o'z darvozasi oldida o'ynash falsafasi samara keltirmoqda. «Rostov»ning himoyadagi o'yini futbolchilarning individual harakatlari jamlanmasidan ham ko'proq narsani anglatmoqda. Umuman, jamoaning bahorda yanada barqaror o'yin ko'rsatishiga xalal beruvchi hech qanday asos yo'q.
Davomi InterFUTBOL gazetasi blogida.
— deya xabar beradi uff.uz nashri.