Jahon chempionati-2018 ikkinchi saralash bosqichi, 5-tur o'yinlari doirasidagi Baxrayn – O'zbekiston uchrashuvidan keyin jamolar bosh murabbiylari ishtirokida matbuot anjumani o'tkazildi. Uning ikkinchi qismida Baxrayn terma jamoasi bosh murabbiyi Serxio Batista ishtirok etdi.
“Bugungi uchrashuvning birinchi bo'limida terma jamoamiz o'zining rejasi asosida harakat qildi – deya so'z boshladi Serxio Batista. – Lekin ikkinchi bo'limda ko'p narsa o'zgarib ketdi. Natijada biz yirik hisobda mag'lub bo'ldik. Albatta, bu natijadan hafsalamiz pir bo'ldi. Ammo bu bilan hayot to'xtab qolmaydi. Biz oldinga intilishda davom etamiz. Bu saralash bosqichi Osiyo va Jahon chempionatlari uchun umumiy. To'g'ri, bizda Jahon chempionati uchun kurashda imkoniyat keskin pasayib ketdi. Biroq hali Osiyo chempionati final bosqichida qatnashish uchun imkoniyatimiz saqlanib qolingan. Biz undan foydalanish uchun bor imkoniyatlarmizni ishga solamiz”, — dedi Baxrayn terma jamoasi bosh murabbiyi.
— deya xabar beradi uff.uz nashri.