«Arsenal» pleymeykeri Mesut Ozil The Times nashriga intervyu berish chog'ida o'zining hayot aqidalari, bolaligida eng yaxshi ko'rgan futbolchisi hamda kamtarlikni saqlab qolgan holda atrofidagilarga ko'maklashishga tayyorligi xususida gapirib berdi.
Mesut o'z hayot tarziga ega, bolaligida qanday o'rgatishgan bo'lsa, shunga asosan kun kechiradi, o'ynaydi. U hashamatdan yiroqda ulg'aydi, ammo hamisha oila a'zolarining mehriga to'ydi.
- Ota-onam meni yaxshi tarbiyalashdi, shu bois futbol o'ynashni boshlaganimda manmanlikka berilmadim, - dedi Ozil. - Ular menga kalondimoqlik salbiy odat ekanini uqtirib, barchaning birdek hurmatga loyiqligi, hamma bilan yaxshi munosabatda bo'lishni o'rgatishdi. «Sen futbolchi sifatida shuhrat qozonishing mumkin, ammo bu akang yoki singlingdan ustunsan, degani emas. Bir-biringizni hurmat qiling. Bir-biringizni qo'llang», deyishardi. Aynan shunday muhitda ulg'aydim. Madaniyatimizning o'ziga xosligidan dalolat bu.
****
- London ko'p jihatdan menga Berlinni eslatadi. Muxlislar ko'chada ko'rib qolishsa, dastxat so'rashadi, birgalikda suratga tushamiz. O'zim istagandek yashashga harakat qilaman: kino, restoranga boraman, do'stlarim bilan shahar aylanaman - oddiy hayot tarzini ma'qul ko'raman.
O'tgan yili Ozil nogiron bolalarni «Arsenal» o'yinlariga taklif qildi. Braziliyada jahon chempionati o'tayotgan pallada Amazonka yaqinidagi bemor kichkintoylarni davolash uchun germaniyalik shifokorlarga pul to'ladi. Dastlab 11ta operatsiya o'tkazildi, keyinchalik esa Mesut bunday tadbirlarni ko'proq uyushtirish taklifini o'rtaga tashladi. Shu tariqa yana 23 nafar bolaning hayoti tubdan o'zgardi. Endilikda «Ozil shifokorlari» Afrikada ishlashmoqda.
- Ehtiyojmandlarga ko'maklashishni yoqtiraman, ammo yordam qo'lini men cho'zganimni bilishlarini xohlamayman, - deydi Germaniya termasi a'zosi. - Odatda, bu haqda ko'p gapirmayman. Qilgan ishini minnat qilishdan yiroq insonlar orasida ulg'ayganman, kamtar bo'lish kerak. Maqsadim - bolakaylarga yordamlashish, ular bizning kelajagimiz. Bolaligim yodimda, menga ko'p narsa etishmasdi. Garchi och qolmasakda, kambag'allikda kun kechirganmiz. Kuniga 8-9 soat futbol o'ynardim. Maktabda darslar tugashi hamono maydonga shoshardim, u erda do'stlarim hamrohligida oqshomga qadar to'p surardik, mahalliy jamoa bilan shug'ullanardik. Mashg'ulotlardan so'ng odatda, yana o'ynardik. Zayniddin Zidan eng sevimli futbolchim edi. Xuddi u kabi fint ishlatishga intilardim. Frantsiyalik futbolchi juda kamtar va aqlli edi. Bir o'zi o'yin masalasini hal eta olardi. Ko'p harakatlarini takrorlab, unga o'xshashga harakat qilardim.
****
- Avvallari futbol ortidan pul topib, kun kechirish mumkinligi haqida o'ylamasdim. 15-16 yoshga to'lganimda, iqtidorli ekanimni aytishdi, ammo faoliyatimning muvaffaqiyat keltirishini tasavvur qilolmasdim. Menga shunchaki futbol o'ynash yoqardi. Keyinchalik esa sevimli mashg'ulotim ortidan pul topishim mumkinligini angladim. Bu - ajoyib.
****
- Odamlarning halol o'ynayotganim haqidagi gap-so'zlaridan quvonaman. Shu tariqa ulg'ayganman, keyinchalik ham bu holat o'zgarmaydi. Bolaligimda tosh bosgan maydonda o'ynardik, har safar yiqilganda jiddiy jarohat olish hech gap emasdi. Shu bois, simulyatsiya ishlatish haqida umuman o'ylamasdik. Endilikda esa maysada ham shunday davom etmoqda. Germaniyaning turli yoshdagi termalarida menga qarshi tez-tez qo'pollik ishlatishar, ammo aslo ranjimasdim. Hujumchi ortida o'ynarkansan, turli «podkat»larga tayyor turish lozim. Raqiblarni g'azab bilan emas, texnika evaziga aldab o'tishni ma'qul ko'raman. Agressiya - vaqtning behuda sarflanishi demak. Bor e'tiborni o'yinga qaratish lozim.
****
Joriy mavsum o'z hisobiga 16ta golli «pas»ni yozib qo'ygan Ozil frantsiyalik hujumchi Terri Anrining rekordi (20)ni yangilashga tayyor.
- Anrini ortda qoldirish haqida umuman o'ylamaganman, - deydi Mesut. - Bu rekorddan xabarim bor, ammo asosiy e'tiborim «Arsenal» muvaffaqiyatlariga hissa qo'shishga qaratilgan. Albatta, rekordchi bo'lish yoqimli, ammo baribir, muhimi - jamoa manfaati.
****
- Gol urish va samarali «pas» berishni yoqtiraman - har ikkisi foyda keltiradi. Harakatlarim orqali ishqibozlarga zavq ulashishdan rohatlanaman, lekin o'zim emas, «Arsenal» uchun o'ynayotganimni unutmasligimiz kerak.
Davomi InterFUTBOL gazetasi blogida.
— deya xabar beradi uff.uz nashri.