Evropa milliy chempionatlarida mavsum yarmiga keldi, hisob. Shu vaqtda Sosser.ru sayti barcha top-birinchiliklarga alohida nazar solib, chempionlik uchun kechayotgan kurash shiddatini o'lchab ko'rishga urindi. Qaerdadir barchasi tobora oydinlashib bormoqda, ammo Italiya «A» seriyasi va Angliya premer-ligasidagi holat bo'yicha qandaydir xulosa chiqarish juda-juda qiyin.
Frantsiya - liga 1
Kurash shiddati: 1|10
Chempionlikka imkoniyat: «PSJ» - 99 foiz; boshqa biror klub - 1 foiz
Liga 1ning o'tgan mavsumida «intriga» uchquni sezilib turgandi. Harqalay, ikki «Olimpik» (Marsel va Lionniki) duranglar «sindromi»ga duch kelgan «gegemon» - «PSJ»ni uzoq vaqt pesh-qadamlik rutbasiga yaqinlashtirmagandi. Joriy mavsumda «xalq jamoasi» turli muammolardan jabr chekyapti, «to'quvchilar» esa garchi Matyo Valbuenani taklif qilgan bo'lsalarda, yaqqol kuchayishmadi. Boz ustiga, «Lion» Chempionlar Ligasida ko'p kuch yo'qotdi. Natija shuki, ayni paytga kelib, turnir jadvalida «PSJ»ning eng yaqin ta'qibchilari («Monako» va kamtarin «Anje» hamda «Kan») ancha ortda qolib ketishdi. Deylik, «Monako» 19 ochko, «Anje» esa naq 20 ochko kam jamg'argan. Xo'sh, umumiy holat shunday ko'rinish olgach, chempionlik masalasida yana nima deyish mumkin? O'zi shusiz ham Frantsiya chempionatida kim g'olib chiqishini osongina taxmin qilish imkoni bor edi. Xullas, yakunda «PSJ»ning ketma-ket 4-marta taxtga ko'tarilishiga umuman shubha yo'q. Boshqacha aytganda, Liga 1ning navbatdagi g'olibi 99 foizga aniq bo'lib ulgurdi. Endi ikkinchi davrada qolgan ishtirokchilar asosan sovrinli o'rinlar va yana qandaydir masalalarga oydinlik kiritishga urinishadi, xolos.
Germaniya - bundesliga
Kurash shiddati: 2|10
Chempionlikka imkoniyat: «Bavariya»-95 foiz; «Borussiya» D. - 3 foiz; boshqa biror klub - 2 foiz
Bundesligada ham Frantsiya chempionatidagi kabi holat. Ya'ni azaliy «diktator» o'z hukmini o'tkazishda davom etyapti. E'tibor qarating, «Bavariya» raqobat binoyidek ligada dastlabki 17ta o'yinda atigi 5 ochko yo'qotdi, xolos. Natijada tanaffusga Dortmund «Borussiya»sidan 8 ochko o'zib ketgan holda chiqib ketdi. To'g'ri, bu yil qayta «uyg'ongan» «Borussiya»ning oxirigacha raqobat taqdim etishi kutilyapti. Ammo tan olaylik, 8 ochkolik farq oz emas. Boz ustiga, «Bavariya» himoyasi metindek ko'rinmoqda. Axir myunxenliklar 17ta o'yinda atigi 8 marta gol qo'yib yuborishdi. Ha, Tomas Tuxel «Borussiya»ga o'sha biz bilgan shiddatni qaytaryapti. Ammo Xosep Gvardiola jamoasi baribir, o'zini keng ummondagi akuladek his qilyapti. «Gollivud» FKga qi-yinchilik tug'dirishi taxmin qilingan yana bir klub - «Volfsburg» esa turnir jadvalining o'rtalaridan sal yuqoriroqda boryapti. Xulosa shuki, «Bavariya» ham xuddi «PSJ» kabi qatorasiga 4-marta oltin medal yutishga shaylanmoqda. Ha, uning imkoniyati Parij klubinikidek o'ta yuqori emas, ammo baribir, juda yaxshi. Aytgancha, myunxenliklar yakunda hozirgi mavqelarini boy bermasalar, o'ziga xos natijani nishonlashadi. Aniqroq aytsak, «Bavariya» o'z tarixida bundesligada hali biror marta ketma-ket 4 karra chempion bo'lgan emas.
Ispaniya - primero
Kurash shiddati: - 6|10
Chempionlikka imkoniyat: «Barselona» - 55 foiz; «Real» - 40 foiz; «Atletiko» - 5 foiz
«Real»dagi murabbiylar almashinuvi primeroda kurashning keskinlashuviga xizmat qilmadi. To'g'ri, turnir jadvalidagi holat nuqtai nazaridan olsak, chempionlik uchun oxirigacha kurash borishi mumkin. Ammo «Santyago Bernabeu»dagi «El-klasiko» natijasiga qarasak, «Real»da muammolar ko'pligi oydinlashadi. Ayni payt ayrimlar hattoki, qaltis hazillashishni boshladilar: «Qirollik klubi» chempion bo'lish uchun Kataloniya mustaqillik harakatini qo'llab-quvvatlashi kerak». Harqalay, Luis Enrike jamoasida barchasi yaxshi ketyapti. Ayniqsa, Messi, Neymar va    Suaresdan iborat trio yanada faolroq ko'rinmoqda. Bu vaqtda «Real» Rafael Benitesning yakuni yo'q uslublariga moslashish bilan ovora. Ha, «Atletiko»ni ham unutmaslik lozim. «Matraschilar» o'z uslubilariga sodiq qolgan holda, yo'llarida tekis harakatlanishmoqda. Ammo ichki salohiyat, potentsial imkoniyatga ko'ra, «Atletiko»ning oxirigacha «Barsa» va «Real»ga teng kelishi qiyin-ov. Zero, Diego Simeone jamoada keng ko'lamli qayta qurish ishlarini boshlab yuborgan. Bu eng muhim pallada ikki grand foydasiga xizmat qilishi mumkin. Demak, primero toji uchun asosiy kurash «Barselona» va «Real» o'rtasida davom etsa, ajabmas.
Davomi InterFUTBOL gazetasi blogida.
— deya xabar beradi uff.uz nashri.