2009 yildan beri Muborakning “Mash'al” klubida faoliyat yuritib kelgan Sherzod Fayziev bundan buyon “Lokomotiv” sharafini himoya qiladi. Fevralda 24 yoshni qarshi oladigan himoyachi ham markaziy himoyada, ham qanotda birdek harakata qila oladi. Uning aynan universalligi jamoamiz murabbiylariga qo'l keldi deya olamiz.
Sherzod Fayziev “Lokomotiv” bilan shartnoma imzolagach, o'z fikrlarini bildirdi: “Lokomotiv”ga o'tganimdan xursandman. Bu men uchun oldinga tashlangan qadam bo'ldi. “Lokomotiv” Osiyo chempionlar ligasida ishtirok etadi, qolaversa O'zbekiston chempionati va Kubogida faqat g'oliblik uchun kurashadi. Albatta, har bir futbolchi shunday kuchli jamoa safida to'p tepishni ma'qul ko'radi. O'ylaymanki, men ham yangi jamoam safida o'zimni ko'rsatib keta olaman va buning uchun bor kuchim bilan harakat qilaman”.
“Shu o'rinda “Mash'al” futbol klubi rahbariyati, bosh murabbiy Aleksandr Xomyakov hamda katta murabbiy Dilyaver Vanievlarga alohida minnatdorchilik bildiraman. Chunki futbolchi bo'lib shakllanishimda ularning mehnati katta va buni hech qachon unutmayman. Shuningdek, muboraklik muxlislarga ham katta rahmat aytaman”.
— deya xabar beradi uff.uz nashri.