Xabaringiz bor, “UzReport TV” telekanali Angliya Premer-ligasi hamda Evropa Chempionlar ligasi o'yinlarini namoyish etib kelmoqda.  Mazkur musobaqalardan o'rin olgan uchrashuvlarni sharhlab borish uchun “NTV Plyus” telekanalining mashhur sport jurnalistlarini taklif qilish odat tusiga kirgan. Shu vaqtga qadar telekanalimizda futbol uchrashuvlarini Aleksandr Shmurnov, Georgiy Cherdantsev, Denis Kazanskiy kabi taniqli jurnalistlar sharhlashdi. Angliya Premer-ligasining 22-turidan o'rin olgan o'yinlarni sharhlab borish uchun “NTV Plyus”ning yana bir taniqli sharhlovchisi – Aleksandr Elagin telekanalimizga taklif etildi. Aleksandr Elagin 1953 yilda tug'ilgan bo'lib, Moskva Davlat Universitetining Jurnalistika fakultetini bitirgan. Sharhlovchilik faoliyatini 1997 yilda “Ren TV” telekanalida boshlagan bo'lib, 2009 yildan buyon “NTV Plyus” telekanalida ishlab kelmoqda. Taniqli sharhlovchi jahon futbolida “Manchester Yunayted” klubiga, Rossiyada esa “Dinamo” Moskva jamoasiga muxlislik qiladi. A.Elagin sharhlovchilik bilan birga, futbol sohasiga oid materiallar muallifi hamdir. Jumladan, “Futbol bo'yicha Evropa chempionatlari tarixi: 1960-2004” («Istoriya chempionatov Evropii po futbolu: 1960—2004») nomli kitobi Aleksandr Elagin qalamiga mansub.
— deya xabar beradi uff.uz nashri.