Hurmatli, O'zbekiston olimpiya terma jamoasi futbolchilari va murabbiylar shtabi!
Avvalgi ikki o'yindagi hayajonlar bosilib, yuzaga kelgan nafrat ortga chekinib, reallik sari tobora yaqinlashyapsiz va yaqinlashyapmiz. Aslida nima qilib qo'yganingizni sekin-asta endi anglay boshlaysiz...
Bugun guruhning uchinchi - sizlar uchun esa, oxirgi o'yinida maydonga tushasiz. Shu bilan Toshkentga qaytasiz. Yana hayot o'z izida davom etadi. Olimpiya termasining muvaffaqqiyatsizligidan oddiy ishqiboz o'lib qolmaydi yoki bu bilan hayot to'xtab qolmaydi. Nimaiki qilgan bo'lsangiz - barchasi o'zingiz uchun, shaxsiy obro'ingiz uchun qildingiz. Endi shu ekkan "daraxtingiz"ning mevasini o'zingiz olasiz.
Balki, qaysilaringizgadir milliy terma jamoa eshiklari butunlay yopilar. Kimning nomi shu bilan esdan chiqar, muxlislar boshqa eslamas. Baxti chopganlar milliy termadan taklif olar... Lekin, bularning barchasi endi kelajakda. Hech biringizga mamlakatimizning bosh jamoasidan muqarrar joy kafolatlanmagan.
Bugun Yaman bilan o'ynaysiz.
Ularni, yirik hisobda yutib qo'ymang. Keraksiz gollarni hech kim qabul qila olmaydi. Sizning vaziyatingizda ENG to'g'ri ish - bugun chiroyli o'ynash!
Yo'q, gollarni qatorlashtirish shartmas. Bitta narsani iltimos qilamiz: sherigingizga to'g'ri uzatma ("pas") bering. Sizlar hattoki oddiy to'g'ri "pas" tashlashni bilmasligingizni hamma ko'rdi. Ukajonlar, bugun faqat bir-biringizga to'g'ri uzatma bering. Ortig'ini bizga kerakmas.
Hozirgi zamonaviy futbol shuni ko'rsatyaptiki, maydonga aqlli futbolchilar tushishi kerak. Balotelliga o'xshagan "xomkalla" futbolchi bo'lmang, garchi zarbangiz kuchli bo'lsa ham.
Maydonda Fabregas, Modrich, Pirlo, Inesta, O'zillar kabi fikrlang. Sherigingizga ANIQ uzatma berishni o'rganing. Gol o'z-o'zidan keladi. Ha, gol o'z-o'zidan keladi.
Futbol judayam oddiy o'yin. Bilasizmi, qaysi basketbol jamoasi g'alaba qozonadi? Sheriklariga to'pni qo'li bilan aniq otib beradigan jamoa hamisha g'olib chiqadi. Futbolda ham shunday. Oyog'ingiz bilan uzatmani to'g'ri bering. Bo'ldi!
Agar, shuni ham eplay olmasangiz - futboldan keting. Yiqqan pullaringizni tadbirkorlikka yo'naltiring. Tirikchiligingiz o'tadi. Futbolni tashlang, o'rningizni aniq "pas" beradiganlarga bo'shating.
Yana bir jihat: bu murabbiylarning xatosi - katta musobaqa paytida Internet va har xil ijtimoiy tarmoqlarni unuting. U erlarga kirmang! Xayolingiz tayyorgarlik va o'yinda bo'lsin. Faqat ota-onangiz bilan muloqot uchun Internetdan foydalaning.
Murabbiylar shtabi, sizni bu narsadan cheklamasdan xato qildi.
Murabbiylar shtabiga shuni ma'lum qilamiz: bugun asosiy tarkibda Temur Hakimovni tushiring! Igor Sergeevdan sardorlikni oling! Boshqa futbolchiga bering, sardorlikni. Yulduzlik kasaligi chalingan futbolchilarni ko'rdik.
Gollivudlik Mel Gibson o'ynagan "Sheryurak" filmini yaxshi bilasiz. Uilyam Volles shotlandiyaliklarga "Siz hozir ketib, balki o'lmay qolarsiz. Ma'lum muddatgacha. Ammo, bir kun kelib, o'z umringiz bilan o'layotgan paytingizda to'shakda yotib - shu kun uchun butun yashagan umringizni berishga rozi bo'lasiz. Ha, agar imkon bo'lganda o'sha kunga qaytib, inglizlarni yakson qilardingiz - hozirga o'xshab "tumtaraqay" qochmasingiz", deydi.
Sizda ham taxminan shunday bo'ladi. Aminmizki, vaqt o'tib mana shu ikki o'yinni (Janubiy Koreya va Iroq) qaytarishni istaysiz va shunday bo'lganda ularning er tishlatishga tayyor bo'lasiz. Qaytganida boshqacha o'ynardingiz. Ammo ...
Ammo, endi kech bo'ldi. Bu gaplarni sizga murabbiylar shtabi Iroqqa qarshi o'yin oldidan aytishi kerak edi.
Oldingizda, sal bo'lsa ham nomingizni oqlaydigan va engil nafas olib, yurtingizga qaytadigan kichkinagina "imkoncha" bor. Bu - bugun Yamanni chiroyli qilib yutish! Katta hisob bo'lishi shartmas. Shunchaki, to'g'ri "pas" berib, gollar uring. Ortig'i bizga kerakmas. Muxlislar hammasini unutishadi va sizni yana suyub qolishadi.
Bu gaplardan qanchalik xulosa chiqarasiz - bu sizning ishingiz. Sizsiz ham muxlisning hayoti davom etadi.
Boring, Yamanni hech bo'lmasa o'zingiz hamda yaqinlaringiz isnotda qolmasligi uchun yutib bering! Chiroyli qilib! Lozim topsangiz, matbuotda uzr so'rab qo'ying!
— deya xabar beradi uff.uz nashri.