Poytaxtimizdagi “O'zbekiston” sport saroyida dzyudo kurashi bo'yicha o'tkazilayotgan Gran-Pri turnirida vazni -73 kg.bo'lgan polvonlar bellashuvida g'olib va sovrindorlar nomi ma'lum bo'ldi.
E'tiborlisi, ushbu vazn toifasida oltin medalni hamyurtimiz Mirali Sharipov qo'lga kiritdi. Terma jamoamizning etakchi sportchilaridan biri hisoblangan Mirali Sharipov saralash bellashuvlarida Belarus, J.Koreya va Germaniya terma jamoasi a'zolarini mag'lub etib, yarim finalda KXDR vakilini, hal qiluvchi final bahsida esa portugaliyalik Nuno Saraivani engdi.
Ushbu vazn toifasida bellashuvlarga kirishgan yana bir yurtdoshimiz G'iyosjon Boboev esa saralash bosqichida Serbiya, Xitoy va BAA vakillaridan ustun keldi va yarim finalda portugaliyalik Nuno Saraivaga imkoniyatni boy berdi. Uchinchi o'rin uchun kechgan bahsda germaniyalik Igor Vantkeni enggan G'iyosjon Boboev bronza medali sohibi bo'ldi.
Ayni paytga kelib terma jamoamiz hisobida 1 ta oltin, 1 ta kumush va 2 ta bronza medali mavjud bo'lib, hozircha hamyurtlarimiz umumjamoa hisobida dzyudo vatani vakillari yaponiyaliklardan keyin ikkinchi o'rinda borishmoqda. Shavkat Jalilov
Manzil: O'zbekiston Milliy Olimpiya qo'mitasi matbuot xizmati

— deya xabar beradi uff.uz nashri.