2016 yilning 25 yanvar – 3 fevral kunlari Hindistonning Dehli shahrida o'q otish bo'yicha Osiyo chempionati o'tkaziladi.
Mazkur musobaqada qit'aning eng kuchli sportchilari aniqlanishi bilan birga shu yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari ham o'ynaladi. Bu esa o'z navbatida har bir bahsni yanada murosasiz kechishidan dalolat beradi.
Osiyo chempionatida Vatanimiz sharafini jami 10 nafar sportchimiz himoya qiladi.
Jumladan, sport miltig'idan o'q otish bo'yicha o'tkaziladigan musobaqalarda Vadim Skorovarov, Sakina Mamedova, Margarita Orlova, Mariya Filimonova va Saidxon Sayfutdinov ishtirok etsa, to'pponchadan o'q otish bahslarida Vladimir Svechnikov, Lenara Asanova, Muslima Yo'ldosheva, Artem Chernishev hamda Enver Osmanov yurtimiz sharafini himoya qiladilar.
Osiyo chempionatida ishtirok etadigan terma jamoamiz a'zolari 16 yanvar kuni Dehli shahriga yo'l oladilar.
Biz esa o'z navbatida hamyurtlarimizga bo'lajak mas'uliyatli musobaqada ham omad va zafarlar tilab qolamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.