"Borussiya" Dortmund sobiq ustozi Yurgen Kloppning "Liverpul" boshqaruviga tayinlanishi o'tgan haftadagi eng diqqatga molik voqealardan biri bo'ldi. Nemis mutaxassisi o'zining qiziqqon tabiati, shu bilan birga noyob murabbiylik iste'dodi bilan nom qozongan. Shubhasiz, uning APLda paydo bo'lishi ko'pchilik uchun kutilmagan hol bo'ldi. Sports.ru saytida e'lon qilingan maqolada Kloppning mersisayd klubidagi kelajagi bilan bog'liq bir qator tahminlar ilgari surilgan.
Muxlislar umidi
"Liverpul" rahbariyati Brendan Rojers bilan hamkorlikka nuqta qo'yib, birdaniga ikki muammoni hal etdi: birinchidan, FSG (Fenway Sports Group – klubning amerikalik xo'jayinlari) nihoyat 2010 va 2012 yillarda o'zlari shartnoma imzolashni istagan menejerga ega bo'ldi, ikkinchidan, muxlislar o'rtasida yuzaga kelgan norozilik kayfiyati "o'chirildi".
Hozirgi vaziyat ikkala tomon uchun ham foydali. Mavsum yakunida jamoa Chempionlar Ligasiga yo'l ola bilmasa hech kim Kloppdan xafa bo'lmaydi, aksincha jamoa kuchli to'rtlikka kirsa, ushbu natija 2013/14 yilgi ikkinchi o'rin bilan tenglashtirilishi mumkin.
"Liverpul"da hamisha murabbiy shunchaki oddiy murabbiydan ko'ra ko'proq mohiyat kasb etgan. Unga nafaqat shonli tarixga ega klubning, balki barcha muxlislar va butun boshli shaharning an'analari qo'riqchisi sifatida qaralgan. "Liverpul" muxlislaridek o'ta talabchan va qattiqqo'l ishqibozlarni topish amri mahol. Yaxshigina mablag' sarflayotgan mersisaydlik muxlislar "Norvich"ga qarshi 3 ta himoyachi bilan o'ynab bor-yo'g'i 1:1 qayd etadigan jamoani emas, qiziqarliroq o'yinlarni ko'rishni xohlashmoqda.
Menimcha, kimdir Rojersning tengi yo'q notiq ekani yoki uning matbuot anjumani betaraf omma uchun qiziqarli bo'lgani haqida iddao qilmasa kerak. Vaqt o'tgan sari uning o'yindan keyingi fikrlari hazil va memlar uchun yaxshigina turtki bo'lib xizmat qila boshlagandi.
Klopp bunday muammolarga duch kelmasligi aniq. Chunki futboldan biroz vaqt dam olgan nemis mutaxassisi omma e'tiborida bo'lish san'atini puxta o'zlashtirgan.
Transfer qo'mitasi bilan ishlash
FSG transferlar uchun javob beradigan malakali mutaxassislarga ega bo'lib, aslida u klubni yangi bosh murabbiy tayinlanishi bilan yuz berishi mumkin bo'lgan ommaviy tozalashlardan muhofaza qiladi.
Transfer qo'mitasi – yomon loyiha emas, aksincha ijobiy natija taqdim qilishi mumkin. Ammo "Liverpul" bilan bog'liq vaziyatda bunday fikr yuritib bo'lmaydi. Rojers 2012 yili dunyoning eng mashxur klublaridan birini qabul qilishi bilan tarozining minuslar pallasi og'ir keldi. Brendan har yangi mavsum boshida nazoratni yanada ko'proq o'z qo'liga olishni so'rar, aynan transferlardagi yakuniy qarorning etishmayotgani unga natija qayd etishida kamlik qilayotganini ta'kidlardi.
Kloppning foydasiga ishlaydigan bir jihat – uning xuddi shunga o'xshash qo'mita bilan muvaffaqiyatli faoliyat yuritgani. "Borussiya"da u bilan birga ishlagan odamlarning aytishicha, Yurgen haqiqatdan ham transferlarga aralashish va agentlar bilan muloqot qilishni yoqtirmaydi.
Germaniyadagi taniqli jurnalistlardan biri Rafael Xonigshteinga ko'ra, Klopp davrida "Borussiya"ga kelgan yangi o'yinchilarning 90 foizi murabbiyning tanlovi bo'lmagan, ammo shu bilan birga birorta xarid murabbiyning roziligisiz amalga oshirilmagan.
Ixtiyorida kim bo'lsa, o'sha bilan ishlashga majbur
Agar Rojers mavsum davomida emas, balki yozda vazifasidan ozod etilganida bu qaror ancha to'g'ridek ko'rinardi.
Endilikda FSG o'ziga yangi xarajatlarni kafolatlab qo'ydi (ehtimol, bu voqea qishdayoq ro'y berar). To'g'ri, ular Rojersga ham xuddi shunday imkoniyat yaratib berishgan. Ammo yozda sotib olingan futbolchilar ishonchni oqlay bilmasa, bunda birinchi navbatda FSG o'zini ayblashi lozim.
Klopp oddiy o'yinchidan noyob iqtidor egasini yuzaga keltira oluvchi futbol olamidagi kam sonli mutaxassislardan biri.
Hozir "Liverpul"da o'z salohiyatini to'la-to'kis ishga sololmagan kattagina iqtidorlar guruhi jamlangan. "Qizillar"ning transfer siyosatidagi eng asosiy kamchilik – bu jamoani tark etgan etakchining o'rnini o'z vaqtida va to'g'ri to'ldira olmaslik. Ushbu muammoni nemis mutaxassisining avvalgi va hozirgi jamoasiga xos "hislat" deyish mumkin. Ehtimol, jamoa o'yinini har yili yangi o'yinchi atrofida qurish Kloppning ham joniga tekkandir.
Yurgen Klopp mavsum yakuniga qadar tarkibni o'zgartirish va o'zi istayotgan o'yinchini sotib olishga faqat yanvarda qo'l ura oladi. Ungacha esa ixtiyorida kim bo'lsa, o'shandan foydalanib turishga majbur.
E'tiborlisi, "Liverpul"dagi bir qator o'yinchilar nemis mutaxassisi uchun juda ham yaxshi tanish. Jumladan, uning "Borussiya"si 2013 yili Bentekeni sotib olishga urinib ko'rgan va uzoq vaqt Firmino, Origi va Gomesni kuzatib kelgan.
Qolaversa, Kloppning "Liverpul"da qanday o'yin uslubini tanlashi hozirda ko'pchilikni qiziqtirayotgan savollardan biri. Ma'lum bo'lishicha, Yurgen "Borussiya"dagi 235 uchrashuvda 4-2-3-1 taktikasini tanlagan, shuningdek, 38 o'yinda 4-4-2 (romb), 15 o'yinda 4-5-1, 11 o'yinda 4-4-2, 10 uchrashuvda esa 4-3-3 taktik sxemasini afzal ko'rgan.
Himoyadagi muammolar
"Agarki jamoa o'z darvozasidan 62 ta to'p olib chiqsa, bu erda muammo faqat himoyada emas", - deya Klopp "Borussiya" himoyasidagi muammolar xususida fikr yuritgandi.
Joriy mavsumda "Liverpul" himoyada yo'l qo'yilgan xatolar (8) bo'yicha APL peshqadami bo'lib turibdi. Rojers davrida jamoa xavfli vaziyat yoki darvozaga zarba yo'llash bilan tugagan jami 116 ta xatoga yo'l qo'ydi.
Klopp "Borussiya"da futbol jamoatchiligiga o'zining "gegenpressing" (ma'nosi,  gegen – qarshi, ya'ni pressinga qarshi) uslubini taqdim etgandi.
Shunga o'xshash manzarani "Barselona" o'yinida ham kuzatish mumkin, bunda futbolchilar to'pni yo'qotgani zahoti ko'pchilik bo'lib kurashga qo'shiladilar. Bunday pressing vaqtida jamoa 5 soniya ichida tajokuzkor pressinga kirishadi va natijada raqib qarshi hujumni boshlay olmay, maydonning o'ziga tegishli bo'lgan hududda to'pni oldirib qo'yadi. Agar jamoa raqibdan to'pni olib qo'ya olmasa, qisqa vaqt ichida odatiy himoyalanish uslubiga qaytadi.
"To'pni qaytarib olish uchun eng yaxshi fursat bu uni yo'qotgan zahoti kurashga kirishish", - deya Klopp pressing xususida fikr yuritgandi.
Gegenpressing Klopp davrida temir intizom va yuqor jismoniy tayyorgarlikning asosi edi. Ayniqsa, bunga erishishda qishgi tanaffus vaqtidagi ispan quyoshi ostida o'tgan tinimsiz mashg'ulotlar muhim ahamiyat kasb etgan. Shu boisdan ham "Borussiya" chempiontning ikkinchi yarmida yanada kuchliroq o'yin namoyish qilgan.
Ammo APLda hech qanday qishgi tanaffus bo'lmaydi. Uning o'rniga jamoalar  Boxing day da maydonga tushadilar. "Liverpul" Rojersning 3 yillik murabbiylik davrida muntazam o'zining eng yuqori sport formasiga aynan chempinatning ikkinchi yarmida chiqqan va bunda hech qanday tanaffusga ehtiyoj sezmagan.
Hujumdagi muammolar
Mersisaydliklar ayniqsa, faqat himoya haqida o'ylaydigan o'rtamiyona jamoalarga qarshi uchrashuvlarda natijaga erisholmay kelmoqda.
Hatto Kloppning so'nggi mavsumida uning "Borussiya"si "Liverpul" singari bu kabi muammolarga ro'baro bo'lmagan. "Borussiya"ning 508 golidan faqat 39 tasi penalti yoki standartlardan keyin kiritilgan. Ushbu ko'rsatkich orqali Kloppning o'z futbolchilariga raqib himoyasini qay tariqa yorib o'tish mumkinligini muammosiz tushuntira olishini ko'rish mumkin. Mahmudjon AZIMOV tarjimasi Manba: arena.uz
— deya xabar beradi uff.uz nashri.