Mavsum oralig'ida oliy liga jamoalari tayyorgarlikka zo'r berishgan. “Andijon” klubida olib borilayotgan ishlar bo'yicha jamoa direktori Bekzodbek Karimov bilan suhbatlashdik.
- Klub murabbiylar shtabida yana o'zgarishlar ro'y beribdi...
- To'g'ri, axborot vositalari o'tgan hafta “Andijon” jamoasi murabbiylar shtabida Usmon Toshev ish boshlagani haqida xabar bergan edi. Usmon aka Andijonga murabbiylik kurslarini o'tkazish uchun kelgandi va biz tajribali mutaxassisni mahalliy murabbiy Nozim Mullaoxunovga yaqindan yordam berish uchun taklif qilgan edik. Lekin,  u kishi bilan rasmiy shartnoma tuzilmagan bo'lib, Usmon Toshev ayni paytda jamoada faoliyat yuritayotgani yo'q. Viloyatimiz rahbarlari va klub mutasaddilari bilan kelishgan holda   “Andijon”ga Baxtiyor Ashurmatovni taklif qildik. O'ylaymanki, izlanuvchan murabbiyning kelishi jamoani har tomonlama ijobiy shakllanishiga xizmat qiladi.
- Jamoaga yangi futbolchilar kelishi kutilyaptimi?
- Klubimizda o'tgan mavsum tarkib o'zagini tashkil etgan bir qator futbolchilar bilan shartnoma imzolangan. Murabbiylar shtabida ham o'zgarishlar bo'lishi kutilmoqda. Yangi o'yinchilar masalasiga to'htaladigan bo'lsak, murabbiyning qarashlaridan kelib chiqib yarim himoya va hujum chizig'iga bir necha futbolchi taklif etilishi kutilmoqda. Yaqin kunlarda bo'lib o'tadigan yig'inda albatta yangi futbolchilar sinovdan o'tkaziladi.
- Tayyorgarlik yig'inlari qanday ketmoqda?
- Farg'onada bo'lib o'tayotgan Hokim Kubogi musobaqalarida klubning o'rinbosarlar tarkibi ishtirok etmoqda.  Asosiy tarkib 2 fevraldan Toshkentda  yig'inni boshlaydi.          
- Klub yangi mavsum oliy ligada o'z oldiga qanday vazifalarni qo'ygan?
- Avvalo, birinchi navbatdagi niyatimiz jamoani viloyatimizda etishib chiqayotgan iqtidorli mahalliy futbolchilar hamda yurtimizning tajribali o'yinchilari bilan mukammal shakllantirishdan iborat. Viloyatimiz rahbarlari klubimiz faoliyati to'laqonli bo'lishi uchun har tomonlama e'tibor qaratishyapti. Shunday ekan biz o'z oldimizga bu yil oliy liga musobaqalarida kuchli o'ntalikka kirish va undan yuqoriroq o'rinlarni egallashni maqsad qilib qo'yganmiz. Elmurod ERMATOV suhbatlashdi,
Andijondan Uff.uz sayti uchun maxsus
— deya xabar beradi uff.uz nashri.