Shu kunlarda Xalqaro suv sporti turlari federatsiya (FINA) rahbariyati, dunyoning etakchi sportchi va jamoalari hamda ushbu tashkilotga a'zo 208 davlat suv sporti bo'yicha milliy federatsiyalar rahbarlari Vengriya poytaxti Budapesht shahrida jam bo'lishgan.
Sababi bugun bu erda Xalqaro suv sporti federatsiyasi rahnamoligida o'tkazilgan so'nggi jahon chempionatining sarhisobi, 2016 yilda FINA boshchiligida o'tkaziladigan eng yirik sport musobaqalariga olib borilayotgan tayyorgarlik ishlari hamda 2021 va 2023 yillarda suv sport turlari (suzish, suvga sakrash, sinxron suzish, suv polosi va ochiq  suzish havzalarida o'tkaziladigan musobaqalar) bo'yicha o'tkaziladigan jahon chempionatlariga mezbonlik qiluvchi davlatlarni aniqlashga bag'ishlangan yig'ilish bo'lib o'tdi. Bundan tashqari bugungi tadbirlar dasturidan 2015 yilgi mavsumning eng yaxshi sportchi va jamoalarini taqdirlash marosimi ham o'rin oldi.
Ushbu yig'ilishda O'zbekiston suv sporti turlari federatsiyasining Bosh kotibi Alisher G'aniev ham ishtirok etdi.
Dastlab kunning birinchi yarmida Xalqaro suv sporti federatsiyasining 2015 yilgi mavsum yakunlari va istiqboldagi rejalariga bag'ishlangan yig'ilishi bo'lib o'tdi. Unda tashkilot rahbari Julio Maglione so'zga chiqib, yakunlangan mavsum ham FINA tarixi sahifalariga zarhal harflar bilan bitiladigan voqealiklarga boy bo'lganligini, bu esa o'z navbatida suv sporti turlarini butun dunyoda yanada ommaviylashuviga xizmat qilganligini  mamnuniyat bilan ta'kidlab o'tdi. FINA rahbari, shuningdek, bugungi kunda jahon sport olamida global masalalardan biriga aylangan dopingga qarshi kurash masalasiga ham alohida to'xtalib o'tdi.
Shundan so'ng, 2021 va 2023 yillarda o'tkaziladigan jahon chempionatiga mezbonlik qiluvchi shaharlarning nomlari e'lon qilindi. Unga ko'ra, suv sporti turlari bo'yicha 2021 yilgi jahon chempionati Yaponiyaning Fukuoka shahrida, 2023 yilgi dunyo birinchiligi esa Qatar poytaxti Doha shahrida o'tkazilishi e'lon qilindi.
Kunning ikkinchi yarmidan o'rin olgan yig'ilishda 2015 yili Rossiyaning Qozon shahrida suv sporti turlari bo'yicha bo'lib o'tgan jahon chempionatining hisoboti hamda yaqin kelajakda o'tkaziladigan yirik musobaqalar o'rin oldi.
Jumladan, joriy yilning avgust oyida Braziliyaning Rio-de-Janeyro shahrida o'tkaziladigan XXXI yozgi Olimpiada o'yinlarining suv sporti turlari bo'yicha o'tkaziladigan  musobaqalarga tayyorgarlik ishlari, bu borada “Rio-2016” hamda Xalqaro olimpiya qo'mitasi bilan hamkorlikda amalga oshirilayotgan ishlar va galdagi vazifalar haqida atroflicha so'z bordi. Ushbu yig'ilishda, shuningdek, 2016-2017 yillarda FINA shafeligida o'tkaziladigan yirik musobaqalar, unga olib borilayotgan tayyorgarlik ishlari yuzasidan ham hisobotlar tinglandi.
“Mazkur yig'ilish doirasida bo'lajak yirik musobaqalarning tashkiliy qo'mita vakillari hamda suv sporti turlari keng taraqqiy etgan qator davlat vakillari bilan uchrashib, bir qator muhim masalalar bo'yicha suhbatlashdik, - deydi O'zbekiston suv sporti turlari federatsiyasining Bosh kotibi Alisher G'aniev. Muloqot chog'ida mutaxassislar, murabbiy va hakamlarning o'zaro tajriba almashishi, shuningdek, hamkorlikda o'quv-mashg'ulot yig'inlarini tashkil etish, etakchi sportchilar ishtirokida mahorat saboqlari (master klass)ni o'tkazish borasida kelishib oldik. Shu bilan birga FINA hamda Vengriya suv sporti turlari bo'yicha federatsiyalar rahbariyati bilan bo'lib o'tgan muloqotlar ham samarali bo'ldi.  Albatta, yuqorida ta'kidlab o'tilgan sportning suv turlari rivojlangan davlatlar vakillari bilan kelishuvlarga erishish o'z-o'zidan bo'lmaydi. Chunki, suv sporti taraqqiy etgan davlat vakillari ham o'zlari bilan raqobatlasha oladigan yurt sportchilari bilan hamkorlikda o'quv-mashg'ulot yig'inlarini va turli darajadagi seminarlarni tashkil etishni xohlaydi. Shukurlar bo'lsinkim, O'zbekistonda barcha sport turlariga bo'lgani kabi suv sporti turlariga Davlatimiz va xukumatimiz tomonidan qaratilayotgan e'tibor, yaratib berilayotgan zarur shart-sharoitlar  natijasida mamlakatimizda suv sporti turlari ham yildan – yilga taraqqiy etib bormoqda. Shuni ishonch bilan aytish mumkinki, bugun olib borgan mulokotlarimiz ham O'zbekistonda sportning ushbu turlarini yanada taraqqiy etishiga xizmat qiladi. Ushbu tashrif doirasida 2017 yili Budapesht shahrida suv sporti turlari bo'yicha Jahon chempionati bahslari o'tkaziladigan suv havzasida olib borilayotgan qurilish ishlari bilan bevosita tanishdik va navbatdagi jahon chempionatini ham yuqori saviyada o'tkazish uchun katta xajmdagi ishlar amalga oshirilayotganligining shohidi bo'ldik”.
Shu o'rinda, mahalliy ommaviy axborot vositalari tomonidan suv sporti rivojlanayotgan qator davlatlarga qiziqishi yuqori bo'lganligini ham ta'kidlab o'tish lozim. Jumladan, mahalliy jurnalistlar O'zbekiston suv sporti turlari federatsiyasi Bosh kotibi Alisher G'aniev bilan bo'lib o'tgan suhbat chog'ida, mamlakatimizda suv sporti turlarini taraqqiy ettirish borasida amalga oshirilayotgan sa'y-harakatlar, shuningdek, mahoratli sportchilarni munosib o'rinbosarlarini tayyorlash borasida olib borilayotgan ishlar hususida suhbatlashdilar.  
Bevosita yana o'tkazilgan tadbirlar xususida so'z yuritadigan bo'lsak, kechki dasturda 2015 yil yakunlariga ko'ra turli nominatsiyalar bo'yicha eng yaxshilarni taqdirlash marosimi bo'lib o'tdi. Haqiqiy bayramona ruxda tashkil etilgan tadbirda yakunlangan mavsum qahramonlari munosib tarzda taqdirlandilar (taqdirlanganlar ro'yxati FINA rasmiy saytida berilgan). Shavkat Jalilov
Budapesht shahridan maxsus tayyorlandi
Manzil: O'zbekiston Milliy olimpiya qo'mitasi matbuot xizmati

— deya xabar beradi uff.uz nashri.