Farg'onada “Hokim kubogi” turniri qizg'in davom etmoqda. Musobaqaning “V” guruhida qatnashayotgan “Qizilqum” futbolchilari uchinchi turda mezbonlarning “FarDU-Futbol-info” jamoasi bilan kuch sinashdi. Garchi, o'yinda svaiya bobida navoiyliklar raqibiga nisbatan sezilarli darajada ustunlik qilishgan bo'lsa-da, “talabalar”  ayrim vaziyatlarda konchilarga etarlicha tashvish tug'dirishga urinishdi. Dastlabki daqiqalarda katta tashabbusga ega bo'lgan “Qizilqum” vakillari chiroyli tarzda hisobni ochdilar. Mezbonlar himoyachisi jarima maydonchasi yaqinida hujumchi Alisher Xoliqovga nisbatan qo'pollik qildi. Darvozadan chamasi 18-20 metrlar uzoqlikdan belgilangan jarima to'pini Ilhom Yunusov qoyilmaqom qilib darvoza to'riga joylab qo'ydi — 1:0. Oradan to'rt daqiqa o'tar-o'tmasdan mehmonlar burchak to'pini o'yinga kiritdi.  Jarima maydonchasi ichida doimo hoziru nozir hujumchi Bahriddin Vahobov qulay imkoniyatdan unumli foydalanib, raqib darvozabonini dog'da qoldirdi. Shundan so'ng, “Qizilqum” jamoasi a'zolari bir muncha xotirjamlikka berilishdi. 19-daqiqada jarima maydonchasi ichida himoyachilarning palapartish harakati “talabalar”ning hisobni qisqartirishi bilan yakunlandi. Gol muallifi — Nodir Kamolov. Tanaffusdan keyin uchrashuv shiddatli va hujumkor ruhda davom etgan bo'lsa-da, muxlislar atigi bir golga guvoh bo'lishdi. Ikkinchi bo'limda maydonga tushgan Vyacheslav Shevchenko jamoadoshining o'ng qanotdan havolatib uzatgan to'pini boshi bilan raqib darvozasiga aniq yo'llab, o'rtadagi farqni oshirdi — 3:1. Shunday qilib, “Qizilqum” jamoasi Farg'onadagi turnirda erishgan g'alabalarini ikkitaga etkazib oldi. Bungacha Hamidjon Aktamov rahbarligida navoiyliklar “Tsementchi” (Quvasoy) futbolchilari  bilan durang (0:0) o'ynab, “Neftchi-2” (Farg'ona) jamoasidan (2:1) ustun kelishgandi. Hakamlar hujjatidan ko'chirma: Hokim kubogi turniri “V” guruhi, 3-tur 2016 yil 1 fevral “Qizilqum” (Navoiy) — “FarDU-Futbol-Info” (Farg'ona) — 3:1 (2:1). Hakamlar: Jamoliddin Qosimov, Murodxon A'zamjonov, Ma'ruf Madvaliev (barchasi — Marg'ilon). “QIZILQUM”: Artyom Makosin, Georgiy Kvesieshvili, Fayzulla Qambarov, Akmal Rustamov, Mirjalol Qurbonov,  Otabek Narzullaev, Andrey Derkach, Samandar Shodmonov, Ilhom Yunusov, Alisher Xoliqov, Bahriddin Vahobov. Zaxiradan maydonga tushganlar: Sherali Jo'raev, G'ayrat Jumaev, Vyacheslav Shevchenko, Azizbek Usmonov. “FarDU-Futbol-Info”: Faxriddin Mirzaqosimov, Ma'mur Qosimov, Rustam Abduhamidov, Shodiyor Hojimatov, Abdulla Mirzaev, Bobur Aminjonov, Akmali Rahimzoda, Nodir Kamolov, Hojimurod Nasriddinov, Xayrulla Madaminov, Sherdor Turonov. Zaxiradan maydonga tushganlar: Zuhriddin Rahmatov, Shaxboz Abduraimov, Qahramon Mamadaliev, Abror Abdullaev, Mirzohid Egamberdiev, Usmon Soibov. Gollar: Ilhom Yunusov (4), Bahriddin Vahobov (8), Nodir Kamolov (19), Vyacheslav Shevchenko (76). Eslatib o'tamiz, guruh peshqadami nomiga oydinlik kiritib beruvchi uchrashuv 2 fevral kuni o'tkaziladi. Unda “Qo'qon-1912” — “Qizilqum” juftligi maydonga tushadi. Mazkur bahs Qirgulidagi “Neftchi” SK stadionida soat 15.00 da boshlanadi. Yana shuni alohida ta'kidlash kerakki, bugun “Qizilqum” mashg'ulotlariga tajribali yarim himoyachi Ruslan Vagapov (“Metallurg”) kelib qo'shildi. Farg'onada davom etayotgan mazkur o'quv-mashg'ulot yig'inida navoiyliklar murabbiylar shtabi nigeriyalik legionerlarni sinovdan o'tkazishni ham rejalashtirishgan. Bugun tunda Nigeriyadan bir nafardan yarim himoyachi va hujumchi Farg'onaga etib kelishadi. Bu haqda keyinroq batafsil ma'lumot beramiz.
— deya xabar beradi uff.uz nashri.