“Bunyodkor”ning mavsum-2016dagi ilk rasmiy uchrashuviga bir haftadan kam vaqt qoldi.
Qit'amizning klublar o'rtasidagi eng nufuzli musobaqasi – Osiyo Chempionlar ligasi turniri uchrashuvi oldidan “qaldirg'ochlar” yangi futbolchilarning taqdimot marosimini o'tkazdi.
“Bunyodkor” stadioni anjumanlar zalida o'tkazilgan tadbirda Bosh direktor Baxtiyor Boboev so'z olib, yangi mavsum uchun olib borilgan tayyorgarlik jarayoni, tarkibga jalb etilgan yangi futbolchilar haqida so'zlab berdi. Shuningdek, jurnalistlarni qiziqtirgan boshqa savollarga batafsil javob qaytardi.
“Bunyodkor”ning tijorat direktori Ayniddin G'iyosov jamoaning 2016 yildagi yangi libosi haqida ma'lumot berdi.
Baxtiyor Boboev yangi futbolchilarga ularning “Bunyodkor” safida to'p tepadigan raqamlari aks ettirilgan futbolkalarni tantanali ravishda topshirdi. Unga ko'ra, Bahodir Nasimov – 14, Shahzodbek Nurmatov – 11, Aleksandar Alempievich – 71, Javlon Mirabdullaev – 15, Dilshodbek Ahmadaliev – 16, Sanjar Qodirqulov – 26.
Tadbir yakunida OAV vakillari uchun klub rahbari va jamoaning yangi futbolchilari bilan suhbatlar tashkil etib berildi.
— deya xabar beradi uff.uz nashri.