Bugun Frantsiyaning Parij shahrida dzyudo bo'yicha "Grand Slam 2016" musobaqasiga start berildi. Nufuzli turnirda 61 ta mamlakatdan kelgan jami 559 nafar (355 ta erkak va 204 ta ayol sportchilar) medallar uchun kurash olib borishadi. Parijda O'zbekistondan 9 nafar sportchi ishtirok etmoqda. Bular: Sharofuddin Lutfillaev (- 60 kg.), Rishod Sobirov (-66 kg.), G'iyosjon Boboev, Sharofiddin Boltaboev (- 73 kg.), Yahyo Imomov (- 81 kg.), Sherali Jo'raev (- 90 kg), Ramziddin Saidov, Soyib Qurbonov (- 100 kg.) va Abdullo Tangriev (+ 100 kg.) Ma'lumki, "Grand Slam 2016" turnirida “Rio-2016” olimpiadasi yo'llanmalari uchun reyting ochkolari ham o'ynaladi. Eslatib o'tamiz, 2013 yilda Parijdagi musobaqada hamyurtimiz Yahyo Imomov, o'tgan yili esa Shahzod Sobirov oltin medallarni qo'lga kiritishgan edi. Ma'lumot uchun, ikki karra olimpiada o'yinlari sovrindori Rishod Sobirov 2011 yilda aynan Parijda ikkinchi marotaba jahon chempionligini qo'lga kiritgan edi. Bugun dzyudochilar erkaklarda -60,-66,-73 kg, ayollarda esa – 48, -52, -57, -63 kg vaznlarda gilamga chiqishadi. Parij tatamilarida dzyudochilarimizga omad tilab qolamiz!
— deya xabar beradi uff.uz nashri.