Sir emaski, futbol jamoalari har yili selektsiya xizmatiga yirik mablag' sarflashadi. Yosh o'yinchilar harakatini kuzatish, skautlar safari, bolalar uchun turnirlar tashkil etish - bularning bari ko'p vaqt va kuch talab qilsada, klub atributlarining bir bo'lagiga aylangan. Hozirda Gollandiya­ning «Oss» klubi sharafini himoya qilayotgan futbolchi Istvan Baksning tarixi esa ushbu yo'nalishda o'ziga xos kashfiyotga aylandi. Ma'lum bo'lishicha, jamoaga bir daqiqa ichida yangi o'yinchi jalb etish mumkin ekan - shunchaki internet qidiruv tizimiga so'rov berilsa, kifoya...
Bu voqea to'qqiz yil muqaddam sodir bo'lgan. O'shanda yosh va jizzaki murabbiy Xeyn Vanxazebruk (u hozirda «Gent»ni boshqarmoqda) Belgiya ikkinchi divizioni vakili «Kortreyk» bilan shartnoma imzoladi. «Kortreyk»ni Angliyaning «Sautgempton»i yoki Ispaniyaning «Real Sosedad»iga qiyoslash mumkin. Jamoa tayyor yulduzlarga ishtiyoq sezmas, sovrinlarga da'vogarlik qilmas va asosan yoshlarni tarbiyalab, ularni mamlakatning nisbatan kuchliroq klublarga sotish bilan shug'ullanadi. Vanxazebrukning «Kortreyk»dagi birinchi galdagi vazifasi aynan o'sha yosh iqtidorlarni izlab topishdan iborat bo'lgan. Quyida e'tiboringizga havola etiladigan voqea esa ushbu mutaxassisning topqir ekanligiga ishora.
2007 yilning yozida etuklikka erishgan navbatdagi futbolchi «Kortreyk»ni tark etgach, murabbiyning oldida chap qanot hujumchisi topish vazifasi paydo bo'ldi. Klub byudjeti katta emasligi tufayli skautlik xizmati bor e'tiborini erkin agent qidiruviga qaratdi. Mamlakat bo'ylab shartnomaga ega bo'lmagan o'yinchilarni izlab topish «missiyasi» bir oy davomida naf keltirmagach, Vanxazebruk tavakkal qilishni ma'qul ko'rdi. Oqshom payti idorasidagi kompyuter ro'parasida o'tirarkan, qiziqish uchun internetdagi qidiruv tizimiga shunday so'rov kiritdi: «Futbol, erkin agentlar, Belgiya». Natijalarning dastlabkilarini o'rganish chog'ida Xeynning nigohlari loyiq nomzodni topa bildi.
21 yoshli Istvan Baks muhandislik universitetning uchinchi bosqichida tahsil olar, haftaning shanba kunlari esa oliy o'quv yurti jamoasi safida institutlar o'rtasidagi musobaqada qatnashardi. O'zining chap qanotida har qaysi raqibni dog'da qoldiruvchi yigitning salohiyati Vanxazebrukni befarq qoldirmadi. Rotterdam «Sparta»sining yoshlar jamoasi hamda Gollandiya o'smirlar termasida o'ynash tajribasi murabbiyning yangi topilmaga vaqt ajratishiga turtki vazifasini o'tadi.
Baksning tezligi va texnikasi ko'plab talabalar forumlarida muhokamalarga sabab bo'lgandi. Shu bois, Xeyn qahramon-talaba bilan uchrashishni maqsad qildi. E'tiborlisi, kuzatuv paytida Istvan o'zini har tomonlama ijobiy tomondan ko'rsata bildi, natijada esa tez orada u bilan professional shartnoma imzolandi. Mazkur voqea Belgiya OAVlarida shov-shuv ko'tardi. Ishqibozlar esa «Kortreyk»ning yangi vakiliga «Google-hujumchi» deb taxallus qo'yishdi.
Davomi InterFUTBOL gazetasi blogida.
— deya xabar beradi uff.uz nashri.