Osiyo Chempionlar Ligasi yangi davr arafasida turibdi. Aniqrog'i, eski zamonlar qaytishi xavfi ham bor. Chunki oldinlari Osiyo Chempionlar kubogi guruh bosqichlari, ba'zan hattoki, «pley-off» bahslari ham bitta mamlakat hududida o'tkazilgan. Eron va arab mamlakatlari orasida yuzaga kelgan sovuqlik joriy mavsum boshlanmasdan turib, OFK oldida juda katta muammolarni keltirib chiqardi. Harqalay, Saudiya Arabistoni hukumati Eron bilan diplomatik aloqalarni uzgani, arab dunyosidagi ba'zi mamlakatlarning unga  ergashgani Osiyo futboli rivoji uchun ishlamaydi.
Voqealar rivoji
2 yanvar kuni S.Arabistonida shialar xatibi Nimr al Nimr qatl qilingach, Tehrondagi saudiyaliklar elchixonasi oldida norozilik namoyishi o'tkazildi va inshootga o't qo'yildi. 3 yanvar kuni S.Arabistoni hukumati Eron bilan diplomatik munosabatlarni uzgani haqida bayonot berdi. Shundan keyin Bahrayn, Sudan, Jibuti va Somali kabi davlatlar ham Eron bilan diplomatik aloqalarga chek qo'ydi. BAA, Quvayt, Qatar va Iordaniya rahbarlari esa Tehrondagi elchilarini ortga chaqirib olishdi.
OFK pozitsiyasi
Osiyo futbol konfederatsiyasi Eron va S.Arabistoni o'rtasidagi munosabatlarning keskinlashib ketgani sabab, OChL-2016 taqvimiga o'zgartirish kiritdi. Bu haqda 25 yanvar kuni OFK rasmiy saytida xabar berildi. Chunonchi, S.Arabistoni va BAA futboli rahbariyati yuzaga kelgan ushbu kelishmovchiliklar sabab, terma jamoalar hamda klublar o'rtasidagi barcha o'zaro uchrashuvlarni qoldirish yoki kechiktirishni so'ragandi. Bu iltimosga «Jamoalar va delegatsiyalar xavfsizligini ta'minlash maqsadida», deya izoh berildi.
O'z navbatida, Eron futbol federatsiyasi OFKdan siyosatni futbolga aralashtirmaslikni so'radi. Shuningdek, Eronning «Mintaqadagi eng xavfsiz mamlakatlardan biri» ekanligini ta'kidladi. EFF bayonotidan jumladan, shunday deyildi: «Eron tomoni turli xalqaro musobaqalarda qatnashadigan terma jamoalar va klublarning xavfsizligini ta'minlashga intiladi».
OFK Musobaqalarni o'tkazish qo'mitasi shundan kelib chiqib, Osiyo Chempionlar Ligasi guruh bosqichining fevral-mart oylariga belgilangan Eron va S.Arabistoni klublari o'rtasidagi uchrashuvlarini aprel-may oylariga ko'chirishga qaror qildi. Qo'mita joriy yil 15 martga qadar voqealar rivojini kuzatadi. Agar bu davrga kelib, Eron va S.Arabistoni o'rtasidagi munosabatlar barqarorlashmasa, ikki mamlakat klublari o'rtasidagi uchrashuvlarning barchasi betaraf maydonda o'tkaziladi.
Musobaqa avvalida
E'tibor bering, «A», «B», «C», «D» guruhlarida Erondan 3ta («Fulad», «Zob-Ohan», «Traktorsozi»), S.Arabistonidan 3ta («Al-Nasr», «Al-Hilol», «Al-Ahli»), BAAdan 2ta («Al-Nasr», «Al-Ayn») jamoa bor. Hali bu mamlakatlardan yana bittadan jamoa guruh bosqichiga yo'l olishi mumkin. Ahamiyatli tarafi shundaki, OFK baxtiga Eron klubi saralash raundidayoq BAA yoki Saudiya vakili bilan tushib qolmadi.
Xo'sh, bu holatda muammoning qanday echimlari bor?
Birinchi echim. Guruh bosqichini boshlash va bu mamlakatlar orasidagi munosabatlar yaxshilanishini kutish. Bu holatda guruhdagi ayrim bahslar keyinroq muddatda o'tkaziladi. Shunday sharoitda O'zbekiston klublariga nisbatan adolat tamoyillari buzilmaydimi? Rasmiy manbalarda aynan shu echim haqida ko'p gapirilyapti va hammasi shunga qarab ketmoqda. Har holda, OFK kutishni afzal ko'rib, ikki mamlakat klublari o'yinlarini 5-6-turlarga qoldirdi.
Ehtimoli: 60 foiz.
Ikkinchi echim. Har bir guruhdagi muammoli jamoalar uchun neytral mamlakat topish va ularning o'yinlarini o'sha erda o'tkazish. Bu holatda ham ayrim uchrashuvlar bizning klublar o'yinlarni tugatib bo'lishgandan so'ng o'tkazilishi ehtimoli yuqori. Betaraf hudud sifatida qaysi mamlakatlar tanlanadi? O'zbekiston, Hindiston, Malayziya, Turkmaniston va boshqalar. Xususan, O'zbekiston va Malayziya - ideal variant. Chunki har ikki mamlakatning Eron va arab dunyosi bilan siyosiy jihatdan muammosi yo'q.
Ehtimoli: 25 foiz
Uchinchi echim. OFK hech narsaga qaramay, klublarni belgilangan mamlakatlarga borishga majbur qilishi mumkin. Deylik, JCh-2018 saralashida S.Arabistoni termasi Falastinga borishi lozim edi. Lekin 2015 yil 13 oktyabrga belgilangan bu o'yin oradan bir oy o'tib, neytral maydonda tashkil etildi. O'shanda S.Arabistoni delegatsiyasi Falastinga uchish yo'lida Isroil havo hududidan o'tishni istamaganligi bois, o'yin sanasi cho'zilib ketgandi. Yakunda S.Arabistoni hukumati qat'iyatli chiqdi. O'yin Iordaniya poytaxti - Ammonga ko'chirildi va falastinliklar 0:0 hisobidagi  durang bilan cheklanib, qimmatli 2 ochkodan mahrum bo'lishdi.
Eron tomoni boshqa mamlakatlar klublarini qabul qilishda hech qanday muammo tug'ilmasligini ta'kidlayotgan bo'lsada, o'yin davomida muxlislarni to'laqonli boshqarishni uddalay olmasa kerak.
Davomi InterFUTBOL gazetasi blogida.
— deya xabar beradi uff.uz nashri.