Avstraliyaning “Gold Kost Siti” futbol klubi yangi mavsum oldidan “Xolland Park Xoks” jamoasiga qarshi nazorat o'yini o'tkazdi. Uchrashuv gollarga boy bo'lishi bilan birgalikda, ajoyib stsenariyga ham ega bo'ldi. O'yinning 63-daqiqasiga qadar “Gold Kost Siti” 1:6 hisobida imkoniyatni boy berayotgandi. Uchrashuv o'rtoqlik maqomiga ega bo'lishiga qaramay, mag'lub bo'layotgan jamoa iroda va matonat namoyish qilib, asosiy vaqtda hisobni tenglashtirdi. Odatda, nazorat o'yinlarida qo'shimcha taymlarga murojaat etilmaydi. Ammo, o'yinga bo'lgan e'tibor shu darajada kuchayib ketdi-ki, tomonlar ekstra taymda g'olib nomini aniqlashni xohlashdi. Ekstra taymda “Gold Kost Siti” yana ikkita gol kiritdi va o'yin ularning 8:6 hisobidagi o'ta irodali g'alabasi bilan yakunlandi. Zahiradan maydonga tushgan Lindon Dayks to'rtta gol kiritib, jamoasining og'ir vaziyatdan chiqib, g'alaba qozonishiga o'z hissasini qo'shdi va chin ma'noda o'yin qahramoniga aylandi.  
— deya xabar beradi uff.uz nashri.