Devid Bekxem qanday ishga qo'l urmasin, uni qoyilmaqom darajada uddalaydigan insonlar toifasidan. Futbol? Beks «MYu» va «Real» kabi buyuk klublarda o'ynab, ChL g'olibiga aylangan. Moda sohasi? Devid Adidas va Armani mahsulotlarini binoyidek reklama qilgan, N&M roliklarida beqiyos ko'rinish bergan.
Kino olami? Eh, uni hali kinoda suratga tushishga ham taklif qilishsa, ajabmas. Reja bo'yicha Bekxemning yangi muvaffaqiyati Mayamida kuzatilishi kerak. U 2014 yilning fevralida shaharda yangi jamoa shakllantirishini e'lon qildi. Xullas, o'z maqsadi yo'lida Saymon Fuller («Xalq artisti» shousining amerikacha talqini muallifi) va Marselo Klaure (yirik mobil operatori - Spring egasi) bilan hamkorlikda Miami Beckham kompaniyasini tuzdi. Mana, oradan deyarli 2 yil o'tdi.
Ammo haligacha Bekxem jamoasining chempionatga qachon «zayavka» berishi bir yoqda tursin, uning nomi (gap-so'zlarga qaraganda, yangi klub ommaviy serial sharafiga Miami Vice, deb nomlanadi) ham noma'lum. Eng yomoni esa, klubda stadioni ham yo'q. Xullas, Beks uchun aynan stadion qurish bosh muammoga aylandi.
TARIX
Devid Bekxem «Marlins» beysbol jamoasi stadioni qurilishiga bog'liq ajabtovur voqealarni boshdan kechirgan shahar - Mayamida futbol klubi shakllantirishga bel bog'ladi. «Marlins»da muxlislar tashrifi bo'yicha yaqqol muammolari bor. Jamoa xo'jayini esa tarkibni kuchaytirish yo'lida umuman pul sarflamaydi. Shuning barobarida 2012 yili ochilgan «Marlins Park»ni ushlab turish soliq to'lovchilar va shaharga barcha kredit foizlarini hisobga olganda, naq 3 mlrd. dollarga tushyapti. Shunday holatda qandaydir badavlat yigitlar yangi qimmatbaho stadion qurishni rejalashtirishdi. Yumshoq aytganda, Beksning ushbu g'oyasi hammaga ham yoqmadi.
«INTRIGA»
Bekxem avvaliga stadion Mayami portiga yaqin joyda qad ko'tarishini aytdi. Biroq u mahalliy biznesmenlarning fikrlarini hisobga olmadi. Zero, ularda portga bog'liq o'z rejalari bor edi. Xullas, yangi stadion eng boy sayyohlik kompaniyalaridan biri - Royal Saribbeanning taraqqiyot loyihasiga xalaqit berishi darhol oydinlashdi. Keyin esa qaerdandir «Mayami dengiz portlari ittifoqi» tashkiloti o'rtaga chiqdi va o'zini fuqarolar manfaatini himoya etuvchi sifatida ko'rsatib, kelajak uchun qayg'urish lozimligini ta'kidladi.
Oddiy aytganda, ushbu tashkilot TV va gazetalar orqali ijtimoiy reklama berdi, internet tarmoqlarida maxsus aktsiya boshladi. Xullas, butun harakat shahar odamlarini Mayami portida stadion qurish yaxshi g'oya emasligiga ishontirishga qaratildi. Tez orada shaharliklar stadion qurilsa, yo'llarda tirbandlik yuzaga kelishidan xavotirlana boshlashdi. Keyinroq esa Royal Caribbean vitse-prezidenti va «Mayami dengiz portlari ittifoqi» rahbari bir kishi ekanligi oshkor bo'ldi. Lekin bu vaqtga kelib, Beks mag'lubiyatni tan olib ulgurgandi.
Davomi InterFUTBOL gazetasi blogida.
— deya xabar beradi uff.uz nashri.