Xabaringiz bor, «Bunyodkor» yangi mavsumdagi ilk vazifani sharaf bilan uddaladi. «Qaldirg'ochlar» OChL-2016 «pley-off» o'yinida BAAning «Al-Shabab» klubini engib, musobaqaning guruh bosqichiga yo'llanma olishdi.
Mazkur bahsda 3-4 nafar tajribali futbolchini inobatga olmaganda, maydonda asosan yoshlar o'ynashdi. Ayniqsa, hujum chizig'idagilar - Eldor Shomurodov, Zabihillo O'rinboev, Shahzodbek Nurmatov hamda Dostonbek Hamdamov har qanday himoya qo'rg'oniga jiddiy tashvish tug'dira olishlarini isbotladilar.
Shuningdek, yangi mavsum arafasida tarkibga qo'shilgan Bahodir Nasimovni ham unutmaslik kerak. O'zbekis­ton milliy termasiga nomzod forvard o'z vaqtida Samarqandning «Dinamo», Rossiyaning «Rubin», Ozarbayjonning «Neftchi», Eronning «Padideh» klublarida to'p surgan. Bosh jamoamiz safida 20ta o'yinda maydonga tushib, 5ta gol urgan. «Al-Shabab»ga qarshi kechgan uchrashuv yakunlangach, «Bunyodkor»ning yangi hujumchisidan intervyu oldik.
- Bahodir, «Bunyodkor»ning ushbu g'alabasi nimaning evaziga qo'lga kiritildi, deb o'ylaysiz?
- Birinchi galda g'alabaga bo'lgan kuchli ishtiyoq asqotdi. Qolaversa, tezkor gol jamoamiz foydasiga xizmat qildi. To'g'ri, shusiz ham raqib darvozasini ishg'ol etib, yakunda zafar quchishimiz mumkin edi. Lekin Eldor Shomurodovning dastlabki daqiqalarda to'p kiritishi ishimizni biroz engillashtirdi. Mavsumni chiroyli g'alaba bilan boshlash hamisha yoqimli. Ushbu muvaffaqiyat bizni OChLning guruh bosqich o'yinlari va milliy chempionat uchrashuvlarida ham ruhlantirishiga ishonaman.
- Nima deb o'ylaysiz, mazkur bahsda «Al-Shabab»ning o'yini qovushmadimi yoki ular uchrashuvga tayyor emasmidilar?
- Dubay klubi BAA chempionatida ham omadsiz ishtirok etyapti. Ketma-ket 4-5ta uchrashuvdan beri g'alaba nimaligini bilishmayapti. Aftidan, ular tushkun holatga tushib qolishgan. Ob-havoning keskin sovib ketishi jamoa o'yiniga keskin ta'sir qildi, deb o'ylamayman.
- «Bunyodkor» bilan kelishuv qanday amalga oshdi?
- Jamoaning mavsumga tayyorgarlik doirasidagi barcha mashg'ulotlarida ishtirok etdim. Shu paytning o'zida boshqa takliflar ham bor edi. Lekin hech ikkilanmay, «Bunyodkor» bilan shartnoma imzoladim. Chunki o'tgan yili futbol agentlaridan biri pand berib qo'ygandi. «Senga yaxshi takliflar tushyapti», dedi-yu, keyinchalik ko'p vaqtimning behuda o'tishiga sabab bo'lgandi. Shularni inobatga olib qaror qabul qildim. «Bunyodkor» bilan bitim tuzganimdan xursandman. Mana, joriy yil biz uchun omadli boshlandi. Bu g'alaba tasodifiy emasligini guruh bosqichida ham isbotlashimiz kerak. Barcha uchrashuvlarni yuqori saviyada o'tkazib, musobaqada imkon qadar uzoqroqqa borishni maqsad qilganmiz.
- O'tgan mavsum sizni jarohatlar biroz bezovta qilgandi...
- To'g'ri, ammo hozir jarohatlardan forig' bo'ldim, o'zimni ancha yaxshi his qilyapman. Maqsadim - mavsumni sermahsul o'tkazish.
- «Bunyodkor»ning o'yin uslubiga moslashib qolgandirsiz?
- Albatta. Bu futbolchilarni avvaldan bilaman. Klubda ham, terma jamoa tarkibida ham birgalikda maydonga tushganmiz. To'g'ri, murabbiylar shtabi o'yin uslubiga biroz o'zgarishlar kiritdi. Xususan, oldingi chiziqning o'zida uch xil sxemada o'ynayapmiz. Ba'zan hujumchi ortida harakat qilaman, ayrim uchrashuvlarda esa sof forvard vazifasini bajaraman. Bugungi kunda «Bunyodkor»ning yarim himoya va hujum chizig'ida kuchli raqobat yuzaga kelgan. Eldor Shomurodov, Doston Hamdamov, Zabihillo O'rinboev kabi kelajagi porloq yoshlar bor. Ularga tajribamdan kelib chiqib, tegishli ko'rsatmalar berish, yordam ko'rsatishga harakat qilyapman.
- Xo'sh, «Bunyodkor»dagi raqobatdan cho'chimayapsizmi?
- Yo'q. Axir «Chumchuqdan qo'rqqan tariq ekmas», deb bejiz aytishmagan. Shartnoma imzolayotgan paytda bularning bari inobatga olinadi: qanday jamoaga kelayotganingiz, hujum chizig'ida kimlarning o'ynashi... Boshqa tomondan, raqobatning borligi yaxshi. Aks holda, nafaqat futbol, balki boshqa sohada ham o'sish ko'zga tashlanmaydi.
- O'tgan mavsum uch oyga yaqin muddat katta futboldan tashqarida bo'ldingiz. To'p surishingizga jarohat to'sqinlik qildimi yoki buning boshqa sabablari bormi?
- Bilasizmi, jarohatim bor edi, desam yolg'on gapirgan bo'laman. «Padideh»da o'ynayotganimda agentim Qatar va Qozog'istondan aniq takliflar borligini aytdi. Ayniqsa, Qatar klubidagilar meni intiqlik bilan kutishayotgandi. Lekin to'satdan agentim uzoq vaqt ko'rinish bermadi. Na uning o'zidan, na takliflardan darak bor edi. Oqibatda, ikkinchi davraning uch oyini katta futboldan chetda o'tkazishga majbur bo'ldim.
Davomi InterFUTBOL gazetasi blogida.
— deya xabar beradi uff.uz nashri.