Mashhur mutaxassis Hakim Fuzaylov bilan suhbatimiz aynan futzal bo'yicha Osiyo chempionati va unda Tojikiston termasini ishtiroki xususida boshlandi...
- Hakim aka, sizningcha, Tojikiston terma jamoasining omadsiz ishtirokiga nima sabab bo'ldi?
- Ochig'i, natija bunday bo'lishini kutmagandik. Tailandga qarshi kechgan o'yinda yigitlar juda yaxshi harakat qilishdi. Hatto, ushbu bahsda g'alaba qozonishimiz ham mumkin edi. Hisob bizning foydamizga 2:1 bo'lib turgan bir paytda yuzaga keltirilgan vaziyatlardan oqilona foydalanganimizda, hozir bunday holatga tushmas edik. Golga tortadigan uchta 100 foizlik imkoniyat ko'kka sovurildi. Katta futboldagi «Sen urmasang, senga urishadi», aqidasi futzalda ham o'z isbotini topdi. Futzalchilarimizning birga-bir vaziyatlardan unumli foydalana bilmasliklari raqibga qo'l keldi.
Tailandliklar xatoimizni kechirishmadi va aksincha, jazolashdi. Unutmaslik kerak, Tailand g'oliblik uchun asosiy da'vogarlar sirasiga kiradi. Qolaversa, bizning termamiz Osiyo chempionatidagi eng yosh tarkibga ega jamoalardan biri ekanligini ham unutmaslik kerak. Ikkinchi o'yinda esa muvaffaqiyatsizlik yigitlarimiz ruhiyatiga salbiy ta'sir qildimi yoki katta kuch yo'qotishgani uchun tiklana olishmadimi, yana mag'lubiyatga uchradik. Bu safar Vetnamga imkoniyat boy berilishi oqibatida, chorak finalga yo'llanma ola bilmadik.
- Osiyo chempionatiga olib borilgan tayyorgarlikdan qoniqqanmidingiz?
- Shunday desa ham bo'ladi. Dastlab Dushanbe shahrida shug'ullandik. Keyin O'zbekiston termasi bilan ikkita o'rtoqlik uchrashuvi o'tkazish uchun Toshkentga keldik. Dastlabki bahsda 1:1 hisobi qayd etildi. Ikkinchisida esa 2:11 hisobi bilan yutqazdik. O'xshashlikni ko'ryapsizmi, guruhning ilk o'yinida ham yigitlar o'zlaridan yaxshi taassurot qoldirishgandi. Ikkinchi uchrashuvda esa charchab qolish natijasida yirik hisobda yutqazdik. Aftidan, jismoniy tayyorgarlikda biroz muammolar borga o'xshayapti. Osiyo chempionatiga kelishdan avval esa Qayroqqumda qisqa muddatli yig'in tashkil etildi.
- Qit'a chempionatidagi tashkilotchilik haqida nima deya olasiz?
- Musobaqa yuqori saviyada o'tkazilyapti. Mashg'ulotlar uchun ajratilgan sharoitlar haqida ham ijobiy fikrdaman. Mehmonxonalar, transport xizmati, xullas, barchasi a'lo darajada. O'ylaymanki, O'zbekiston jahon chempionatiga ham bemalol mezbonlik qila oladi.
Davomi InterFUTBOL gazetasi blogida.
— deya xabar beradi uff.uz nashri.