Xabaringiz bor, o'tgan haftada Angliya futbolida noodatiy hodisa kuzatildi. Ya'ni «Sanderlend» klubi futbolchisi Adam Jonson voyaga etmagan qizga tegajoqlik qilishda ayblanib, klubdan sharmandalarcha haydab yuborildi. Afsuski, bu voqea APLda birinchi bor kuzatilmayapti. Avvalroq ham premer-liganing "haddidan oshgan" ba'zi futbolchilari klublardan quvg'in qilingan. Quyida ana shular haqida hikoya qilamiz.
Li Xyuz
«Vest Bromvich»dagi faoliyati orqali tanilib kelayotgan Li 2004 yili avgustida mast holatda avtoulov boshqaradi va halokatga sababchi bo'ladi. Noxush voqea oqibatida qarama-qarshi yo'nalishda kelayotgan boshqa mashinadagi Duglas Grem ismli bir yo'lovchi olamdan o'tadi. Uning rafiqasi Morin va ularning haydovchisi Aleks Frisbilar og'ir ahvolda shifoxonaga etkaziladi. Shundan so'ng Li Xyuz olti yillik qamoq jazosiga hukm qilinadi. Futbolchi uch yil jazoni o'tagach, ozodlikka chiqariladi va «Olxxem» klubi bilan shartnoma imzolaydi. Keyin esa «Notts Kaunti» va «Port Veyl» jamoalarida to'p suradi. Xyuz hozirda «Uorchester Siti» nomli havaskorlar klubi sharafini himoya qilmoqda.
 
Lyuk Makkormik
«Plimut» darvozaboni Lyuk Makkormik ham mastlikda rulga o'tirish oqibatida klubdan haydalgan. Achinarlisi, Lyuk 2008 yilning iyulida ro'y bergan ushbu avtohalokat tufayli 8 va 10 yoshli ikki norasida qizaloqlar hayotiga nuqta qo'ydi. Jigarbandlaridan ayrilgan ota esa bir umrga nogiron bo'lib qoldi. O'sha kuni Makkormik mashina haydamasa ham bo'lardi. Ammo u to'yda keragidan ancha ko'p ichib olgach...
Mojaro oqibatida golkiper etti yillik qamoq bilan jazolandi. Lekin oradan to'rt yil o'tgach, u yana ozodlikka chiqdi. Shu tariqa, Makkormik sport formasini tiklab olgach, avvaliga «Truro Siti» va «Oksford Yunayted» klublari darvozasini qo'riqladi. 2013 yilning mayida esa yana «Plimut»ga qaytib, 2014 yildan jamoa sardori darajasiga ko'tarildi.
 
Marlon King
2009 yili «Uigan»dan quvg'in qilingan Marlon King zo'ravonlikda ayblanadi. Chunki u tungi klublarning birida notanish qizga tegajoqlik qilib, uning burnini sindiradi. Hodisa tafsilotlari o'rganib chiqilganidan so'ng sud futbolchiga 18 oylik qamoq jazosini belgilaydi.
- Bu juda qayg'uli voqea. Marlonning qilig'i ayniqsa, professional futbolchi bo'lishni istayotgan yoshlarga salbiy ta'sir o'tkazishi mumkin, - degandi o'shanda «Uigan» prezidenti Deyv Uigan.
King ozodlikka chiqqanidan so'ng «Koventri Siti» bilan kelishuvga erishadi. Keyin esa «Birmingem» va «Sheffild Yunayted» klublarida faoliyat yuritdi. 2014 yilning may oyiga kelib, Marlon mast holatda mashina boshqargani uchun yana 18 oyni panjara ortida o'tkazadigan bo'ldi.
 
Kevin Sent-Lyus
2013 yili «Kardiff» klubi frantsiyalik futbolchi Kevin Sent-Lyus bilan xayrlashishga qaror qildi. Chunki u tungi klublardan birida to'ygunicha ichib, keyin u erda janjal chiqargandi. Eng yomoni, Kevin mastlik oqibatida notanish bir ayolni shu qadar qattiq uradiki, zarbadan so'ng jabrlanuvchi hushini yo'qotadi. Lekin futbolchi bunga ham qoniqmay, yaqin-atrofda turgan yana bir ayolni besabab kaltaklaydi. Albatta, voqeani o'rganib chiqqan politsiya Kevinni aybdor deb topadi, biroq u «Uimbldon»ga ko'chib o'tish orqali jazodan qutulib qoladi. Hozirgi vaqtda futbolchi Frantsiyaning «Depp» klubida to'p surmoqda.
 
Ched Evans
Maqoladagi so'nggi qahramonimiz ham Adam Jonson singari, «muhabbat qurbonlari»dan. Zero Ched ham 2012 yilning aprel oyida axloqsizlikda ayblanib, «Sheffild Yunayted»dan quvilgan, kamiga, besh yillik qamoq jazosiga ham hukm qilingan edi. Mana shunday tarzda yomonotliqqa chiqqan Evans 2014 yilning oktyabriga kelib, ozodlikka chiqadi va jonajon klubiga qaytmoqchi bo'ladi. Ammo bu niyatdan xabar topgan klub muxlislari norozilik namoyishlari uyushtirib, gunohkorni «Bremoll Leyn» stadioniga yaqin yo'latishmaydi. 27 yoshga to'lgan futbolchi o'shandan beri o'ziga jamoa topolmay yuribdi. Jahongir tayyorladi Manba: www.intersport.uz
— deya xabar beradi uff.uz nashri.