Bu hafta futbol uchrashuvlariga boy bo'ldi. Unda klublarimiz OChLda o'z ishtiroklarini boshlashgan bo'lsa, EChL va ELda ham bellashuvlar davom ettirildi. Qiziq tomoni bizning jamoalarimiz birinchi turda Saudiya Arabistoni klublariga qarshi bahslarda maydonga tushishdi.
“Lokomotiv” va “Paxtakor” o'z uyida chempionatni boshladi. “Bunyodkor”, “Nasaf” esa safarda dastlabki o'yinlarini o'tkazishdi. Mazkur qarama-qarshiliklarda biz jami 3 ochko ishlab oldik xolos. Yutsa bo'ladigan bellashuvlarda vakillarimiz ochkolarni boy berishgani dilni biroz xira qildi. Lekin bizda hali mavsum boshlanmagani uchun bu natijalarni pashshadan fil yasashga shoshilmaganimiz yaxshi. Ya'ni, klublarimizning birinchi o'yinlarini o'rtacha baholasak bo'ladi.
Eng qizig'i “Nasaf” tarkibida Bobur Abduholiqov OChL o'zining debyut o'yinini o'tkazib gol urishga ham erishdi. Bu hujumchi yaqinda 19 yoshga to'ladi. Ro'ziqul Berdiev bu yosh futbolchini qo'rqmasdan o'yinlarda asosiy tarkibga kiritmoqda. U O'zbekiston super kubogi va OChL uchrashuvlarida maydonga boshlang'ich tarkibda tushdi. Superkubok bellashuvida Bobur Abduholiqov gol urmagan bo'lsada, OChLda o'zining dastlabki o'yinidayoq muvaffaqiyat qozondi. Shu kuni hujumchi yana gol ursa bo'ladigan vaziyatlardan foydalana olmadi. Aks holda “Nasaf” safardan kamida durang bilan qaytishi mumkin edi. Lekin asosiysi Bobir Abduholiqov o'zini yo'qotib qo'ymadi. Uning goli hozircha qandaydir ahamiyat kasb etmagandir. Biroq oxirgi turda o'zaro o'yindagi kiritilgan gollar sarhisobida as qotib qolishi mumkin.
Dostonbek Hamdamov OChL eng yaxshi o'yinini o'tkazdi desak, adashmagan bo'lamiz. “Bunyodkor” futbolchisi “Al Nasr”ga qarshi uchrashuvda 2 golga mualliflik qildi. U ajoyib o'yini bilan raqibga haqiqiy bosh og'rig'i bo'ldi. Jumladan tezkor kiritilgan gol mezbonlarni ancha havotirga solib qo'ydi. Lekin uning gollari yakunda g'alabaga etarli bo'lmadi. Biroq Dostonbek Hamdamov OChLda o'zining dastlabki dublini nishonladi va o'yinning eng yaxshi futbolchisi bo'ldi.
Ishlari yurishmayotgan “Manchester Yunayted” kechagi o'yini orqali muxlislariga biroz bzlsada tasalli bergandek bo'ldi. Mankunianliklar Evropa Ligasidan o'rin olgan “Midtyullann”ga qarshi birinchi bellashuvdan so'ng hamma ularni bu musobaqadan “badarg'a” qilgandi. Lekin Angliyadagi javob bahsida “qizil iblislar” ajoyib o'yin namoyish etish bilan birga muxlislarni biroz xushnud etishdi. Lui van Gal uchrashuvdan oldin jarohat orttirib olgan Marsial o'rniga yosh Markus Reshfordni asosiy tarkibda maydonga tushirdi. O'z navbatida 18 yoshli hujumchi dublga erishdi va murabbiy ishonchini oqladi. Qolaversa, uning harakatlari ham ishqibozlar uchun yangilik bo'ldi.
Davomi Sports.Uz blogida.
— deya xabar beradi uff.uz nashri.