Xabaringiz bor, Angliyaning «Aston Villa» klubi APLning yaqindagina bo'lib o'tgan  «Liverpul»ga qarshi o'yinida raqibga 6:0 hisobida mag'lub bo'ldi. Ammo ushbu yirik mag'lubiyat «Aston Villa» himoyachisi Joleon Leskottga unchalik salbiy ta'sir o'tkaza olmadi. Chunonchi, u o'yinning ertasigayoq «tvitter»dagi o'z sahifasiga yangigina «Mersedes» avtoulovining suratini joyladi. Tabiiyki, bu jamoa muxlislarida katta norozilik uyg'onishiga olib keldi. Leskott esa o'zini oqlar ekan, «tvitter»dagi xabar tasodif natijasida «ketib qolganini», bu vaqtda telefon uning cho'ntagida bo'lganini ta'kidladi. Qarang, qanchalik «aqlli» smartfon-a?! Futbol tarixida esa bunday «o'xshamagan» bahonalar ko'plab topiladi. Mana, ularning ba'zilari...
1. Yovuz niyatli qurbaqalar
2006 yili Germaniya davlati mezbonlik qilgan jahon chempionati vaqtida ham juda qiziq voqea kuzatilgan. Ya'ni, mundialda ishtirok etayotgan Ukraina terma jamoasi Ispaniyadan 4:0 hisobida mag'lub bo'lgach, ukrainalik himoyachi Vladislav Vashuk jamoadoshlari nomidan bayonot berib, mag'lubiyatga ular joylashgan mehmonxonaning qurbaqalari (!) sababchi ekanini aytadi. Himoyachining so'zlariga ko'ra, jonivorlar kechasi bilan vaq-vaqlab, futbolchilarga uyqu bermaganmish. Bu g'ayrioddiy bayonotdan keyin mehmonxona xodimlari ham junbushga kelishdi va ular Ukraina terma jamoasi manziliga quyidagi murojaatni yo'llab, alamlaridan chiqishdi: «Mehmonxona yaqinidagi ko'lda qushlar borligi esingizdan chiqibdi-ku! Nima qilaylik, bu qushlarni ham tutib, qafasga solaylikmi?!»
2. Tomas Brolinning halokati
Qushlar haqida gap ketsa, beixtiyor shvetsiyalik mashhur sobiq futbolchi Tomas Brolin yodga tushadi. Negaki, u ham qushlardan jabr ko'rgan. Voqeaning aniq tafsilotlari mana bunday: 1997 yilning iyunida futbolchi «Lids»ning mavsumoldi tayyorgarligida qatnashish uchun aeroport tomonga yo'l oladi. U katta tezlikda ketayotgan bir vaqtda qandaydir qush yo'ldan chiqib qoladi va mashina oynasini sindirib kirib, Tomasning o'takasini yorib yuboradi. Natijada, futbolchi o'zini yo'qotib, jamoa mashg'ulotlarida qatnasha olmasligini bildiradi. «Lids» ustozi Jorj Grem esa shu arzimas bahona tufayli «mashqdan bo'yin tovlagan» Tomasni umumiy suratga tushish marosimiga chaqirmaydi.
3. Antiqa rahbar
Ma'lumki, futbol olamida qaysidir klub direktori xodimlarning ishga qabul qilinishi yoki vazifasidan ozod qilinishi haqidagi masalalarga javobgar hisoblanadi. Biroq «Sautgempton»ning sobiq rahbari Rupert Lou bundaylardan emas. Masalan, u klub ustozi Pol Starrokni atigi ikkitagina o'yindan so'ng ishdan haydadi-da, barcha aybni OAVlarga yukladi-qo'ydi. Kamiga, muxbirlarga do'q-po'pisa qilishni ham unutmadi:
- Mazkur ayanchli hodisaga sababchi bo'lganlar, o'zlaringga yaxshilab bir nazar solinglar!
Qizig'i shundaki, iste'foga qadar hech bir muxbir Polni tanqid qilib chiqmagandi.
4. Muni haqiqati
«Rotterem» klubining sobiq darvozaboni Kris Muni kunlarning birida to'pni oyoqlari orasidan o'tkazib yuboradi va uyatga qoladi. Lekin keyinroq ma'lum bo'lishicha, o'tkazib yuborilgan golda Krisning aybi yo'q ekan. Gap shundaki, u endigina zarbani qaytarishga chog'langan paytda uning yaqinida sochini taqir qilib oldirgan jamoadoshi Nik Smit paydo bo'lib qoladi va uning yaltillagan boshi darvozabonning ko'zlarini qamashtirib yuboradi. Bu qanchalik haqiqatga yaqin bilmadi­g-u, ammo Muni o'yindan keyin o'zini oqlash uchun xuddi shu bahonadan foydalanadi. Chakki emas-a?!
5. Kennining «bebosh» to'plari
«Nyukasl» jamoasi Angliya kubogi doirasida o'zidan anchagina kuchsiz hisoblangan kamtargina «Stivejeyj» klubi bilan durang o'ynab qo'ygach, «qarg'alar» ustozi Kenni Dalg­lish kutilmagan natija uchun to'plarni aybdor sifatida ko'rsatadi. Ya'ni, o'sha kuni foydalanilgan to'plar «haddan tashqari engil va sakrovchan» ekan...
6. Ta'timagan quvonch
Qit'alararo kubok o'yinida urilgan gol «Feyenoord» himoyachisi Yoop van Dal uchun faoliyatidagi katta burilish bo'lishi mumkin edi. Ammo gollandiyalik futbolchining quvonchi uzoqqa cho'zilmadi - goldan so'ng van Dal yoniga Oskar Malbernat kelib, uning ko'zoynagini yulib oladi-da, oyoqlari bilan tepkilab tashlaydi. Kamiga: «Futbolni ko'zoynak bilan o'ynashmaydi. Ayniqsa, Janubiy Amerikada», deydi.
7. Fergining tutqanog'i
1999 yili «Manchester Yunayted»ning sobiq ustozi ser Aleks Fergyuson o'z avtoulovini faqat favqulodda holatlar uchun mo'ljallangan yo'lda, katta tezlikda boshqarib ketayotgan vaqtda qo'lga olinadi. Shunda mashhur murabbiy bunga sabab sifatida tutqanog'i borligini ro'kach qiladi. Aytishlaricha, o'shanda ser politsiyachilar qo'lidan eson-omon qutulib ketgan ekan.
8. Dahoga halal bermang!
Angliya kubogining «Satton» va «Koventri» klublari o'rtasidagi bahsda «Satton» sensatsion tarzda mag'lub bo'ladi. Eng qizig'i, bu o'yinda «Satton» hujumchisi Adrian Brednam deyarli 100 foizli vaziyatdan foydalana olmaydi. O'yindan so'ng klub ishqibozlari uni tanqid qilishni boshlaydilar. Shunda hujumchi gol ura olmasligiga muxlislarning haddan tashqari shovqin ko'tarishlari sabab bo'lganini aytadi. Ming afsuski, o'zini oqlash uchun aytilgan bu gaplar forvardga yordam bermaydi. Aksincha, undan ishqibozlarning ko'ngli qoladi.
Davomi InterFUTBOL gazetasi blogida.
— deya xabar beradi uff.uz nashri.