Bugun to'rt guruhdari o'yinlar bilan Osiyo Chempionlar Ligasi 2-tur o'yinlariga start beriladi.
Bu yilgi musobaqaning "A" guruhidan o'rin egallagan Toshkentning "Lokomotiv" klubi safarda "Al Ittihod" klubiga qarshi maydonga tushadi. Ushbu jamoalar o'rtasidagi ilk turdagi uchrashuvda Toshkentda 1:1 hisobi qayd etilgan edi.
Qayd etish joiz, Toshkentdagi uchrashuv "Lokomotiv" uchun mavsumdagi ilk rasmiy uchrashuv bo'lgan bo'lsa, Saudiya Arabistoni milliy chempionat o'yinlari davom etmoqda. "Al Ittihod" "Lokomotiv"ga qarshi uchrashuvdan oldin milliy chempionat 18-turi doirasida safarda peshqadam – "Al Hilol"ni 1:0 hisobida mag'lub etdi. Mazkur g'alabadan so'ng, Viktor Pitsurke jamoasi Saudiya Arabistoni chempionatida 39 ochko bilan uchinchi o'ringa ko'tarilib oldi.
"Lokomotiv" bosh murabbiyi Andrey Miklyaev uchrashuvdan oldingi matbuot anjumanida jamoa tarkibida yo'qotishlar yo'qligini va uchrashuvga tarkibdagi barcha futbolchilar tayyor ekanini ta'kidladi. Eslatib o'tamiz, "Lokomotiv" yarim himoyachisi Jasur Hasanov, avvalgi o'yinda maydondan chetlatilgani bois, "Al Ittihod"ga qarshi safardagi o'yinni o'tkazib yuboradi.
"Al Ittihod" hamda "Lokomotiv" klublari o'rtasidagi OChL-2016 "A" guruhi 2-turidan o'rin olgan uchrashuv, bugun Jidda shahrida bo'lib o'tadi. Uchrashuv Toshkent vaqti bilan soat 22:30da boshlanadi.
Avvalroq xabar berilganidek, mazkur uchrashuvni Kim Don Jin boshchiligidagi janubiy koreyalik hakamlar brigadasi boshqarib boradi. Ta'kidlash joiz, Kim Dong Jin bungacha "Lokomotiv" ishtirokidagi bitta uchrashuvda hakamlik qilgan. Osiyo Chempionlar Ligasining avvalgi mavsumi, guruh bosqichida "Lokomotiv" hamda "As Saad" klublari o'rtasidagi uchrashuvda aynan Kim Don Jin boshchiligidagi hakamlar brigadasi ishlagan edi. Mazkur uchrashuvda, "Lokomotiv" o'z raqibini yirik – 5:0 hisobida mag'lub etgan.
Toshkentning "Bunyodkor" klubi ham, bugun o'z uchrashuvini o'z maydonida Saudiya Arabistonining boshqa bir jamoasi – "An Nasr"ga qarshi o'tkazadi. Mazkur jamoalarning ilk uchrashuvida Ar Riyodda 3:3 hisobidagi durang natija qayd etilgan edi. Ta'kidlash joiz, mazkur jamoalar avvalgi mavsumda ham Osiyo Chempionlar Ligasi guruh bosqichida bir guruhdar o'rin olgan edilar. O'tgan mavsum Ar Riyod shahrida kechgan uchrashuvda jamoalar 1:1 hisobida durang o'ynagan bo'lsalar, Toshkentdagi uchrashuvda "An Nasr" 1:0 hisobida g'alaba qozongan edi. Mazkur uchrashuv, jamoalar uchun so'nggi ikki mavsumdagi o'zaro to'rtinchi uchrashuv bo'ladi.
"Bunyodkor" bosh murabbiyi Sergey Lushan o'yindan oldingi matbuot anjumanida "An Nasr"ga qarshi uchrashuvda jamoa hujumkor o'yin ko'rsatishini ta'kidlagan bo'lsa, "An Nasr" ustozi Raul Kaneda "Bunyodkor"ga qarshi uchrashuvda uning jamoasi guruhdagi ilk g'alabasini qo'lga kiritishga harakat qilishini aytdi.
Mazkur uchrashuvni malayziyalik Mohd Amirul Izvan bin Yoqub boshchiligidagi hakamlar brigadasi boshqaradi. Uchrashuv Toshkentdagi "Bunyodkor" stadionida bo'lib o'tadi.
OChL-2016
"A" guruhi, 2-tur.
1 mart. Jidda, Saudiya Arabistoni.
"Al Ittihod" (Saudiya Arabistoni) – "Lokomotiv" (O'zbekiston)
Hakamlar: Kim Don Jin (Janubiy Koreya).
Qanot hakamlari: Li Mun Ji (Janubiy Koreya), Son Bong Kun (Janubiy Koreya).
Zaxira hakami: Zaid Tamir (Iroq).
Nazoratchi: Ali Muhammad Said (BAA).
Komissar: Davlatmand Islomov (Tojikiston).
OChL-2016.
"B" guruhi, 2-tur.
1 mart. Toshkent. "Bunyodkor" stadioni.
"Bunyodkor" (O'zbekiston) – "An Nasr" (Saudiya Arabistoni)
Hakamlar: Mohd Amirul Izvan bin Yoqub (Malayziya)
Qanot hakamlari: Mohd Yusri bin Muhammad (Malayziya), Muhammad Muazi bin Zainal Abidin (Malayziya).
Zaxira hakami: Abdulkarim Said (Iordaniya).
Komissar: Omid Jamali (Eron).
— deya xabar beradi uff.uz nashri.