Kuni-kecha O'zbekiston olimpiya terma jamoasi Toshkentda tashkil etilgan qisqa muddatli o'quv-mashg'ulotlar yig'inini yakunladi. FIFA kunlaridan unumli foydalanish maqsadida tashkil etilgan yig'in "Jar" stadionida olib borildi. Viktor Jalilov shogirdlari 5 kun mobaynida bitta o'rtoqlik uchrashuvida ham maydonga tushishdi. 11 oktyabr kuni soat 11:00da aynan "Jar" stadionida boshlangan bahsda olimpiyachilarimiz "Navbahor" klubiga qarshi o'ynashdi. Baxtiyor Ashurmatov murabbiyligidagi namanganliklar ham tanaffusdan shu tariqa unumli foydalanishdi. Xullas, o'rtoqlik uchrashuvi har ikki jamoa uchun foydali bo'ldi, deyish mumkin.
Poytaxtda tashkil etilgan yig'in kelasi yilning yanvar oyida Qatar yashil maydonlarida bo'lib o'tadigan Osiyo chempionatiga tayyorgarlikning bir bosqichi vazifasini o'tab berdi. Rejaga ko'ra, O'zbekiston olimpiya jamoasi qit'a chempionati oldidan, ya'ni dekabr oyida BAAda 2ta yig'in tashkillashtiradi. Dubaydagi dastlabki mashg'ulotlar 2-14 dekabr kunlarida bo'lib o'tsa, ikkinchisi 17-28 dekabrga belgilangan. Shu ikki yig'in muhim musobaqa oldidan asosiy va so'nggi tayyorgarlik bo'ladi. Viktor Jalilovning aytishicha, Dubayda deyarli bir oy davom etadigan mashg'ulotlar doirasida jami 7ta o'rtoqlik uchrashuvi tashkil etiladi. Ayni payt bo'lajak raqiblardan 3tasining nomi ma'lum - Yaponiya, Avstraliya va Qatar.
Endi "Navbahor" bilan o'tkazilgan o'yin haqida ikki og'iz mulohaza. Viktor Jalilov shu kuni "Bunyodkor", "Nasaf" va "Neftchi" jamoalarining termaga nomzod futbolchilari xizmatidan foydalanolmadi. Sabab oddiy - bu klub futbolchilari kecha o'z jamoalari safida tur o'yinida maydonga tushishdi. O'zbekiston kubogi-2015 finali sabab, 25-tur doirasidagi "Dinamo"-"Bunyodkor" hamda "Nasaf"-"Neftchi" uchrashuvlari avval belgilangan vaqtdan oldinroq o'tkazildi. Natijada bu o'yinchilar o'rnini to'ldirish maqsadida kengaytirilgan tarkibga kiritilgan futbolchilardan bir guruhi terma jamoa yig'iniga chaqirildi. Ulardan biri 1-liga vakili "NBU-Osiyo" futbolchisi - Mirshohid Olimov.
O'yinning birinchi bo'limida olimpiyachilarimiz ustunligi salgina bo'lsada, sezilib turdi. Hujumlar va tabiiyki, xavfli vaziyatlar Akmal Ortiqov qo'riqlagan darvoza oldida ko'proq bo'ldi. Lekin vaziyatlardan foydalanolmaslik natijasida "Navbahor" darvozasi daxlsiz qoldi. Tanaffus chog'i Viktor Jalilov o'z yordamchisi Dilshod Nuraliev bilan tarkibni to'laligicha o'zgartirdi. Aynan zaxiradan maydonga tushirilgan Quvondiq Ro'ziev, Shohnazar Norbekov, Temur Hakimov, Hasan Asqarov kabi futbolchilar jamoa o'yinini kuchaytirishdi. Darvoqe, uzoq muddat jarohati sabab, yashil maydondan uzoqda yurgan "Paxtakor" yarim himoyachisi Jamshid Iskanderov ham ikkinchi bo'lim o'rtalarida safga qaytdi. To'g'ri, Jamshidning jismoniy holati hali talab darajasida emas. Lekin u zargarona to'p uzatishlari bilan jamoadoshlarini bir necha bor qulay vaziyatlarga chiqardi.
Bo'limdagi golga tortadigan dastlabki vaziyatni Doniyor Usmonov ko'kka sovurdi. Temur Hakimov chap qanotdan jarima maydonchasiga yaqinlashib kelib, to'pni qulay tarzda Usmonovga tashlab berdi. Ammo "Qo'qon-1912" hujumkor yarim himoyachisi chamasi 10 metrlar uzoqlikdan darvoza emas, osmonga qarata zarba yo'lladi. Oradan hech qancha vaqt o'tmay, Shohnazar Norbekov ham xavfli hujumdan samara chiqarolmadi. "Metallurg" vakili ochiq darvozani nishonga olish o'rniga jamoadoshlarining jarima maydonchasiga etib kelishlarini kutdi. Natijada uning bu antiqa qarori jamoamiz ziyoniga ishladi. Bunday golga tortadigan vaziyatlar Osiyo chempionati doirasida Janubiy Koreya termsiga qarshi kechadigan ilk uchrashuvda ko'p yuzaga kelishi qiyin. Shunday ekan, vaziyatlardan maksimal darajada samara chiqarish, ya'ni gol urishni o'rganish kerak.
Davomi InterFUTBOL blogida.
— deya xabar beradi uff.uz nashri.