To'g'risini aytish kerak, barchamiz qaysi klubga muxlislik qilishimizdan qat'iy nazar ushbu mavsum Angliya premer ligasida shov-shuv ko'tarayotgan “Lester”ga hayrihohlik qilyapmiz. Bugungi ma'lumotlar romantik va samimiy o'yinlar ko'rsatib, ishqibozlar qalbini zabt etgan 11 yigit va ularning murabbiyi haqida...
Kasper Shmeyxel, darvozabon, 29 yosh
Bir vaqtlar “Manchester Siti”da darvoza posboni bo'lgan Peter Shmeyxelning o'g'li. Yanvar oyida juda murosasiz kechgan “Tottenxem”ga qarshi bahsda u qahramonlik ko'rsatdi. Endi o'sha mashhur “Tottenxem” o'tgan yili birov hisoblashmagan “Lester”ni turnir jadvalida quvish bilan band.
Denni Simpson, chap qanot himoyachisi, 29 yosh
«Manchester Yunayted» tarbiyalanuvchisi. U o'ng qanotdagi joyni “MYu”ning sobiq o'yinchisi Richi de Latadan tortib olgan.
Ues Morgan, markaziy himoyachi, 32 yosh
Yamaykalik himoyachi jamoa sardoridir. U Angliyaning quyi ligalarining afsonasiga aylangan bo'lib, Ues «Nottingem Forest» klubida 10 yil to'p surgan.
Robert Xut, markaziy himoyachi, 31 yosh
«Chelsi» klubining sobiq futbolchisi, Germaniya termasida 19 o'yinda maydonga tushgan. O'tgan yili “Stok Siti”ga kerak bo'lmay qolgandi.
Kristian Fuks, chap qanot himoyachisi, 29 yosh
Avstriya terma jamoasi sardori. U «Lester»ga tekinga tushgan. O'tgan mavsum “Shalke”da to'p surar edi.
N’Golo Kante, markaziy yarim himoyachi, 24 yosh
U o'tgan yilning avgust oyida Frantsiyaning “Kann” jamoasidan 8 million evro evaziga sotib olingan. O'ta shijoatli box-to-box, klubning Mahrez va Vardidan keyingi asosiy yulduzlaridan biri.
Deniel Drinkuoter, markaziy yarim himoyachi, 25 yosh
“MYu”da tarbiya olgan yana bir futbolchi. U deyarli butun faoliyatini chempionship(Angliya birinchi ligasi)da o'tkazgan. Vardiga uzoqdan turib to'p irg'itishni juda yaxshi ko'radi.
Mark Olbrayton, vinger, 26 yosh
Bundan bir necha yillar oldin o'zining qadrdon “Aston Villa”sida katta umidlar bildirilayotgan futbolchi. Lekin 2014-yilning yozida u bilan shartnoma uzaytirilmadi. Endi «Villa» chempionship tomon “Lester” esa chempionlik sari harakatda.
Rayyod Mahrez, vinger, 24 yosh
“Lester”ning bosh ijrochisi, Evropa mavsumining eng shov-shuv ko'targan o'yinchisi. Uni “Gavr”dan 350 ming evaziga sotib olinganini Angliya ligasining so'ngi besh yillikdagi eng zo'r xaridi deb atash mumkin.
Sindzi Okazaki, hujumchi, 29 yosh
Yapon futbolining yorqin yulduzi, o'tgan yozda 7 million funt evaziga klubga kelgan. Raneri tezkor Okazakini kuchli argentininalik strayker Leonardo Uloa bilan alishtirib maydonga tushiradi.
Jeymi Vardi, 29 yosh, hujumchi
Angliya chempionati va “Lester”ning eng zo'r to'purari. Hozir u haqida Gollivudda kinofilm olishga tayyorgarlik ko'rilmoqda. Aniq gap o'sha film juda kassabop bo'lishi mumkin. Vardi o'tgan hafta “Lester” bilan yangi shartnoma imzoladi.
Klaudio Raneri, 64 yosh, murabbiy
O'tgan yoz “Lester” nima sababdan Gretsiya termasi bilan hamma ishni barbod qilgan murabbiyni ishga olganini hech kim tushunmagan edi. Ayni paytda Raneriga umuman hech kanday savol yo'q.
Qani edi, bizning milliy chempionatimizda ham chempionlikka da'vogar klublarni “burnini ishqalab” qo'yadigan “Lester” kabi jamoa paydo bo'lsa. Nima dedingiz?.. Elmurod ERMATOV
— deya xabar beradi uff.uz nashri.