Ajoyib aktyor Leonardo di Kaprio nihoyat, kino olamining eng nufuzli sovrini - «Oskar»ni qo'lga kiritdi. Ammo uning bu yo'lda ancha sabr qilishiga to'g'ri keldi. Leoni  endi bemalol omadi yurishganlar qatoriga qo'shish mumkin - axir u bir necha urinishlardan so'ng asl niyatiga etdi, baribir.
Aytish joiz, di Kaprio «Oskar»ni yutish uchun naq chorak asr harakat qildi (kinoda 14 yoshida rol o'ynay boshlagan).Afsuski, futbolda «Oskar» sanaluvchi «Oltin to'p»ga ega chiqish uchun bunchalik ko'p vaqt berilmaydi. Millionlar o'yinida yorqin iz qoldirgan, ammo «Oltin to'p»ga qo'l uzatmagan ajoyib futbolchilar qancha? Ayniqsa, hozirgi davr yulduzlariga bir jihatdan omad kulib boqmagan - Lionel Messi va Krishtianu Ronaldu futboldagi bosh induvidual sovrinni sira begona qilishmayapti. Aslida «Oltin to'p»ga munosib boshqa ijrochilar ham bor, faqat ular Messi va Ronaldu soyasida qolib ketishyapti. Xullas, Championat.com sayti  yangi asrda futbolga o'zgacha fusun bag'ishlagan, ammo soha «Oskar»iga etisholmagan shunday «omadsiz» yulduzlarga e'tibor qaratdi.
Terri Anri
Tezkor oyoqlar egasi futbolda qoyilmaqom darajada faoliyat yuritgani bilan maqtanishga to'la haqli. Zero, frantsuz  klub miqyosida imkoni bor barcha sovrinlarni yutdi,  terma jamoasi bilan esa  Evropa chempioniga aylandi. Qisqasi, uning faoliyatida bitta kemtik borki, u ham bo'lsa, asosiy individual mukofot «Oltin to'p»ga ega chiqolmaganidir.  Anri «kanonir»  sifatida barchani «qiynagan» vaqtlarda so'rov natijalariga ko'ra, bir safar ikkinchi o'ringa munosib ko'rilgandi. Aniqroq aytsak, 2003 yilgi so'rovda Pavel Nedveddan ozroq ovoz to'plagandi. Terrini  2006 yili uchinchi yaxshi futbolchi bo'lganini ham qo'shimcha qilish o'rinli.
Janluiji Buffon
«Oltin to'p»ning 60 yillik tarixida unga asosan hujumkor futbolchilar ega chiqishgan. Deylik, darvozabonlardan atigi bir kishi - afsonaviy Lev Yashingagina  bu sovrinni bo'ysintirish nasib etgan. U 1964 yili futbol olamining tengsiz vakili sifatida e'tirof etilgandi. 2006 yilga kelib, Yashinning betakror  natijasini italiyalik betakror Jiji takrorlashi mumkin edi. Italyanlarning Germaniya-2006 mundialidagi jasoratlaridan hayratlanishgan ovoz beruvchilar asosan jamoaning ikki etakchisiga e'tibor qaratishdi. Ya'ni Buffon qatori «Moviy gvardiya»ning  «beton» himoyachisi Fabio Kannavaro ham sovringa bosh da'vogar sanaldi. So'rov yakunlariga ko'ra esa, markaziy himoyachi o'z vatandoshidan 50tacha ko'p ovoz jamg'arib, shaxsiy kollektsiyasini bebaho sovrin bilan boyitdi. Jiji bo'lsa, hamon armonda...
Zlatan Ibragimovich
Andrey Shevchenko yoki Jorj Vea misolida aytsak, «Oltin to'p»ga da'vo qilish uchun sovrindor va buyuk terma jamoada o'ynash shart emas. Zero, alohida holatlarda sovrinni qo'lga olish uchun klub futbolidagi qahramonliklarning o'zi kifoya qiladi. Xususan, ukrainalik hujumchi ildamroq harakat qilib, yosh Messi va Ronaldu bosh rollarni qo'lga olgunga qadar «oltin»ga burkanish ilojini topdi. Shvetsiyalik novcha va mag'rur Ibra esa shunday qilishga ulgurmadi. To'g'riroq ifoda etsak, uning eng yaxshi damlari  jahon futbolining asosiy yulduzlari ayni kuchga to'lgan vaqtlarga muvofiq kelib qoldi. Eng ajablanarli holat shuki, medallar va turli kuboklardan ko'zni qamashtiruvchi noyob kollektsiya  tuzgan goleador hujumchi loaqal «Oltin to'p»ga da'vogarlarning kuchli uchligiga ham  biror marta  kirgani yo'q. Shu ham adolatdanmi?
Andres Inesta
Inesta faxrli sovringa ikki marta juda yaqinlashdi, ammo har ikkisida klubdoshi  - Messini yuksak g'alabasi bilan tabriklashga majbur bo'ldi. Ayniqsa, 2010 yilgi so'rov natijalari ko'pchilik hafsalasini pir qildi. Inchunin, hamma «Oltin to'p» JChda shohsupaga ko'tarilgan ispanlardan biriga topshirilishini kutgandi. Biroq tanlov hay'ati  yana argentinalikni ustun ko'rdi. JAR mundialida oliy sifatni namoyish etgan odobli Andres esa «kumush» bilan cheklanib qoldi.
Davomi InterFUTBOL gazetasi blogida.
— deya xabar beradi uff.uz nashri.