Madridning «Real» klubi bosh murabbiyi Zinedin Zidan va klub prezidenti Florentino Peres o'rtasida kelishmovchilik boshlandi. Kelishmovchilikka sabab - kelasi mavsum uchun tarkibni aniqlash borasida bo'lmoqda.
Peres «MYu»dan David De Xeani sotib olishni istamoqda. Ammo Zidan bunga hojat yo'qligi va Keylor Navas o'z ishini ajoyib tarzda uddalayotganini bildirgan. O'z navbatida murabbiy maydon markazida Pol Pogbani ko'rishni istamoqda. Ammo Pogbaning agenti Mino Rayola bilan «Real» o'rtasidagi munosabatlar yomonligi tufayli buning imkoni yo'qligi aytilmoqda.
Boz ustiga Zidan «Chelsi» yarim himoyachisi Eden Azarni sotib olishni maqsad qilgan. Peres esa Azarning beqaror o'yinini ro'kach qilib, buni rad etmoqda. Klub prezidenti hujumchi «Borussiya» futbolchisi Per-Emerik Obameyangni ko'rmoqchi. Zidan esa Borxa Mayoralga imkon berish tarafdori.
Peres va Zidan faqat bir masalada hamfikr bo'lib turibdi - ikkisi ham markaziy himoyachiga ehtiyoj borligini tushunmoqdalar va «Atletik» futbolchisi Emerik Laportni sotib olishni maqsad qilgan. Bu himoyachiga «Barselona» va «Manchester Yunayted»dan ham qiziqish bor.
— deya xabar beradi uff.uz nashri.