Mamlakat kubogi finali oldidan har ikkala jamoa vakillari ishtirokida matbuot anjumani bo'lib o'tdi.
Dastavval, jurnalistlar savollariga “Bunyodkor” jamoasi rahbari Baxtiyor Boboev va himoyachi Anvar G'ofurov javob qaytardi.
- Ertangi bahs oldidan tarkibda yo'qotishlar bormi?
- Umuman olganda, final oldidan bizdagi mavjud tarkib o'zagini saqlab qolish asosiy maqsad edi. Biroq Jovlon Ibrohimov kutilmagan jarohatga yo'liqdi. Sardorimiz Xayrulla Karimov bo'lsa diskvalifikatsiyaga duchor bo'ldi. Shu bois har ikkala etakchimiz finalda jamoaga yordam bera olishmaydi. Ivan Miloshevich jarohatidan qutilib, o'yinga tayyor bo'lib qoldi.
- Jizzaxdagi stadion borasida qanday fikrdasiz?
- Bu arenada ikki oy ilgari kubok doirasida to'p tepgandik. O'shanda maydon holati yaxshi edi. Bugun mashg'ulotda uning hozirgi holatini bilib olamiz.
- “Bunyodkor” kelasi yilgi Osiyo Chempionlar ligasi guruh bosqichida ishtirok etish uchun kubokda g'olib chiqishi kerak. Jamoa oldida boshqa yo'l yo'q. Bunday muhim bahsga “qaldirg'ochlar” qay darajada tayyor?
- To'g'ri aytib o'tdingiz, chempionatda ko'p narsani boy berib bo'ldik. Shu bois kubokdan umidimiz katta. Osiyo Chempionlar ligasi guruh bosqichiga yo'llanma olish uchun yagona yo'l qoldi. Ushbu imkoniyatdan foydalanishga harakat qilamiz. Jamoadagi mas'uliyatni juda yaxshi tushunib turishibdi. Tarkibimizda mahoratli yigitlar bilan bir qatorda yoshlar ham ko'p. Barcha futbolchilarimizni qon-qoniga “Bunyodkor” jamoasi singib ulgurgan. “Bunyodkor” – jamoa a'zolari uchun bu hayot! Ertaga futbolchilarimiz butun vujudini berib o'ynashadi.
- “Nasaf” grandlar bilan himoyaviyroq o'yin ko'rsatadi. Ularni taktikasini munosabatingiz? Statistikadan ma'lumki, Shodiev ko'p o'yinlarda “Nasaf” darvozasiga to'p kiritib keladi. Shunday ekan ertaga Shodievga asosiy tarkibdan joy berasizmi?
- “Nasaf”ni hurmat qilaman. O'z vaqtida Qashqadaryoda ishlaganman. “Nasaf” tarkibida ko'plab shogirdlarim bor. Masalan Eldorbek Suyunov va Sherzod A'zamov. “Nasaf”ni taktikasiga kelsak, ularni doimo himoyadan o'ynaydi, demagan bo'lardim. Ular kerak payt hujumga o'tishadi, vaziyatga qarab himoyalanishadi. Qarshiliklarning standartlari judayam xavfli. Ayniqsa, Gevorkyan to'p oshirgan paytlarda raqib jamoalar uchun oson bo'lmaydi. Bizni ham bahsga o'ylab qo'ygan rejalarimiz bor. Kim omadliroq va yakka kurashlarda yutsa, o'sha jamoa kubokni qo'lga kiritadi. Vohid Shodievga kelsak, u jamoaning asosiy o'yinchisi. Mahorati baland yigit.
- Bugungi matbuot anjumaninin inobatga olganda finalni qanday his etyapsiz?
- Esingizda bo'lsa, 2008-2009 yillari final o'yinlari qanday bayramona o'tardi. O'sha finallardagidek tashkilotchilik bo'lsa bundan hamma xursand bo'lardi.
- Ertaga Qashqadaryodan juda ko'plab futbol muxlislari tashrif buyurishi kutilmoqda. “Nasaf”ga 12-o'yinchi yordam berarmikan yoki aksincha bu jamoaning zarariga ishlashi mumkinmi?
- Muxlislar qancha ko'p bo'lib, jamoani shuncha qo'llab-quvvatlab tursa, albatta bu ruhiy madad hisoblanadi. “Bunyodkor”ni ham o'z muxlislari bor. Ya'ni bizning ham 12-o'yinchilarimiz. Ular bizni, biz ularni qattiq xurmat qilamiz. Ishqibozlarimiz jon-jahdlari bilan doimo bizni qo'llab-quvvatlab kelishadi.
Anvar G'ofurov: “Biz “Nasaf”dan kuchliroqmiz va buni maydonda isbotlashimiz kerak”
- “Nasaf” tarkibida kuchli futbolchilar bor. Himoyachi sifatida aynan kimdan xavfsirayapsiz?
- “Nasaf”da yaxshi futbolchilar yig'ilgan. Ularning tarkibidagi istalgan futbolchidan xavf kutsa bo'ladi. Biroq men ham, jamoadosh sheriklarim ham hech kimdan cho'chmayapmiz. O'ylaymanki, biz “Nasaf”dan kuchliroqmiz va buni ertaga o'yinda isbotlashga harakat qilamiz.
- Bugungi matbuot anjumanini inobatga olmaganda finalni qanday his qilyapsiz?
- Istardimki saviya yanada oshishini. Xuddi Osiyo Chempionlar ligasidagidek munosabat bo'lishini.
- Ertangi bahsda jamoa etakchisi Xayrulla Karimov o'ynay olmaydi. Katta ehtimol bilan markazda Siz o'ynasangiz kerak. Zimmangizdagi mas'uliyatni qay darajada his qilyapsiz?
- Maydonga tushgach, hech bir pozitsiyada oson bo'lmaydi. Har qanday holatda ham o'zimni ishimni to'g'ri va aniq bajarishga harakat qilaman. Xayrulla Karimov garchi maydonda bo'lmasa ham, u Jizzaxga keladi va bizga ko'mak berib turadi.
— deya xabar beradi uff.uz nashri.