Xabaringiz bor, OChL «pley-off» bosqichidan o'tib, o'z guruhida ikkita o'yin o'tkazgan «Bunyodkor» hozircha 1 ochko to'plashga ulgurdi, xolos. Yaqinda RedPen internet nashri «qaldirg'ochlar» bosh murabbiyi Sergey Lushan bilan suhbatlashib, mutaxassisning yoshlarni tarbiyalash borasidagi fikrlari hamda klubning kelgusidagi rejalari bilan qiziqdi. Quyida ushbu intervyuni e'tiboringizga havola etamiz.
- «Bunyodkor» OChL «pley-off» bosqichidan o'tishni ajoyib tarzda uddaladi. «Al-Shabab»ga qarshi bahsda maydonga tushgan 11 futbolchidan 6 nafari 1995-1996 yilda tug'ilganlardan iborat edi. O'yindan oldin yoshlarning ishonch-ni oqlashlariga shubha qilmaganmidingiz?
- Akademiyamiz tarbiyalanuvchilarining birortasiga shubha bilan qaramaganman, keyinchalik ham shunday bo'ladi. Ular yaxshi ta'lim olishgan, taktik jihatdan mukammal tayyorgarlikka egalar. Bu yigitlar o'z yosh toifalarida O'zbekistonda eng kuchli futbolchilar hisoblanishadi. Hujumda Osiyoning eng yaxshi yosh futbolchisi nomiga da'vogarlik qilgan uch nafar o'yinchi to'p surishdi. Yakunda ushbu sovrin Doston Hamdamovga nasib etdi. Bular tayyor futbolchilar. O'z nav-batida, hali yuksak cho'qqini zabt etishga ulgurmagan bu iqtidorlarning potentsiali yuqori ekanini ta'kidlash joiz. Ularning bir-ikki yildan so'ng kattalar orasida Osiyoning eng yaxshi o'yinchilari qatoriga kirishlaridan umidvorman.
- Sizningcha, jamoadagi avlodlar almashinuvi jarayoni yakunlandimi? Aytmoqchimanki, o'tish o'yinida ishtirok etganlar ushbu mavsumda «Bunyodkor»ning asosiy kuchiga aylanishadimi?
- Chindan ham, ikki yildan buyon klubda avlodlar almashinuvi davom etmoqda. O'ylashimcha, bu jarayonni to'xtatmaymiz. Chunki har yili «Bunyodkor» akademiyasidan jamoamiz safini to'ldirishga qodir ko'plab futbolchilar etishib chiqishmoqda. Klub strategiyasiga binoan, 2-3 yildan so'ng tarkibimizning 80 foizini o'z tarbiyalanuvchilarimiz tashkil etishlari ko'zda tutilgan. Bizning akademiya nafaqat O'zbekiston, balki butun Markaziy Osiyoda eng yaxshilaridan biri sanaladi. Shunday ekan, yoshartirish va asosiy tarkibdagi raqobatni ta'minlash jarayoni davom etaveradi. Mening murabbiy sifatida birinchi galdagi vazifam nafaqat klubimiz, balki milliy termamizga ham sifatli futbolchilarni tayyorlab berishdan iborat. O'zbekistonning turli yoshdagi termalari tarkibiga nazar soling, o'smirlardan tortib, to bosh jamoagacha bo'lgan bosqichda «Bunyodkor» vakillari muhim rol o'ynashadi. Bu esa to'g'ri ishlayotganimizdan dalolat. Ha, doimo rivojlanish kuzatilmoqda, intilish o'zgarmoqda. 2008 va 2012 yillarda ishlab chiqilgan tayyorgarlik dasturlari hozirda eskirdi. Hozirda 2014 yilgi dastur bo'yicha ish yurityapmiz. Uning samara berayotganini inobatga olsak, o'zgartirish kiritishga hojat yo'q. Mabodo, nimadir o'xshamay qolsa, yangi dastur tuzishga kirishamiz.
- Akademiyaga bo'lajak futbolchilarni qabul qilish qay yo'sin amalga oshiriladi?
- 2008 yili maktabimizni tashkil etgach, mamlakatimizning turli hududlarida 22ta turnir o'tkazdik. O'shanda 15 mingga yaqin bolalarning harakatlarini kuzatib, ularning orasidan 36 nafarini tanlab oldik. Aynan o'sha yigitlar hozirda jamoamizning asosiy tarkibida to'p surishmoqda. Davlatimiz bizga shunday akademiyani hadya etgach, bolalarni shu erning o'zida qabul qilib, ularning o'yinlarini kuzatish imkoniga ega bo'ldik. Demak, endilikda hech qaerga borishimiz shart emas, ta'lim olishni xohlovchilar o'zlari kelishadi. Har yili turli yoshdagi 5 mingga yaqin bolalarni sinovdan o'tkazyapmiz.
Maxsus ilmiy guruhimizda 7 nafar murabbiy, shifokorlar va ruhshunoslar bor. Bo'lajak futbolchilarni qabul qilishdan oldin ularning tibbiy ko'rsatkichlari tekshiruvdan o'tkaziladi, ular bilan psixologlar ishlashadi. Keyin esa har bir mutaxassis o'z xulosasini beradi. Aniqroq aytganda, har bir bolakay haqida bamaslahat qaror chiqaramiz.
Bu mavzu haqida savol berganingiz yaxshi bo'ldi, zero farzandlari qabul qilinmagan ota-onalar tomonidan muntazam ravishda noroziliklarga duch kelamiz. Ehtimol ular o'z hududlarida eng yaxshidirlar, ammo bizda raqobat kuchli. Hozir bu erda 600ga yaqin futbolchilar tahsil olishmoqda. Ularning 4ta maydonda shug'ullanishayotganini hisobga olsak, uzzu-kun band bo'lishimiz turgan gap. Boz ustiga, iqlimimizning issiqligini ham yoddan chiqarmaslik kerak. Aytaylik, yozgi soat birlarda hech bir murabbiy shogirdlarini mashg'ulotga olib chiqmasligi tayin.
Asosiy vazifamiz - superyulduzlar emas, balki bolalarni tarbiyalash ekanini unutmaslik darkor. Vatan va sportga muhabbat ruhida tarbiyalash. Qolaversa, ularning sog'lig'i haqida ham qayg'urmog'imiz lozim. Ushbu 600 tarbiyalanuvchidan faqatgina 10-15 nafari haqiqiy futbolchi bo'lib etishib chiqadi. Bu jahondagi har qanday akademiya uchun yaxshi ko'rsatkich. Bolalarning hammasi ham ushbu sport turida faoliyatlarini davom ettira olishmaydi. Shu bois, qaytaraman, asosiy vazifamiz - ularni inson sifatida tarbiyalash.
Ota-onalarning shikoyatlariga kelsak, bu sport ekani va hamisha kuchli raqobat mavjudligini inobatga olishlarini so'rardim. Har qanday vaziyatda ham biz doimo imkoniyat yaratib beramiz. Birinchi imtihondan o'tolmagan bolakay, yarim yildan so'ng yana tashrif buyurishi mumkin. Misol uchun, 2015 yil yakunlariga ko'ra, qit'amizning eng yaxshi yosh futbolchisi nomini qo'lga kiritgan Doston Hamdamov ham birinchi sinovdan o'tolmagan. Keyingi safar kelib, o'zini ko'rsatgach, uni qabul qilgandik. Bu odatiy hol. Ota-onalar vaziyatni to'g'ri tushunib, farzandlariga vaqt ajratishlari lozim. Bolakay nimanidir eplay olmayaptimi, marhamat, otasi u bilan shug'ullansin. Biz individuval dastur bo'yicha ish ko'ramiz: yarim yildan so'ng bola o'sha darajani takrorlasa, bu ota-onasining u bilan shug'ullanmaganidan dalolat. Ayniqsa, bu gap otalarga taalluqli. Biz taqdim etgan individual dastur bo'yicha shug'ullantirishsa, bolakay albatta, o'sishga erishadi.
Davomi InterFUTBOL gazetasi blogida.
— deya xabar beradi uff.uz nashri.