O'zbekiston chempionatining ikkinchi tur uchrashuvlari ham ortda qoldi. Biz ushbu turda qayd etilgan 14 ta g'alabali, g'alabasiz, mag'lubiyatli va mag'lubiyatsiz seriyalarni aniqladik va uni sizning e'tiboringizga havola etamiz.
1. “Paxtakor”ning g'alabali seriyasi
Amaldagi chempion Toshkentning “Paxtakor” klubi Oliy ligadagi oxirgi 6 ta uchrashuvni ham g'alaba bilan yakunladi. No'mon Xasanov shogirdlari o'tgan mavsumda “Dinamo” (6:0), “Mash'al” (2:1), “Nasaf” (1:0), “Andijon” (6:0), ushbu mavsumda esa “Andijon” (2:1) va “Qo'qon-1912” (4:0) jamoalari taslim etishdi. “Sherlar” oxirgi marta o'tgan mavsumda “Bunyodkor”ga yutqazishgandi.
2. “Paxtakor”ning o'z maydonidagi g'alabali seriyasi
Toshkentliklar “Qo'qon-1912”ga qarshi o'yinda yana bir yoqimli an'analarini davom ettirishdi. Ya'ni “Sherlar” Oliy liga doirasida o'z maydonlarida o'tkazgan ketma-ket 16-uchrashuvda g'alaba nashidasini surishdi. “Paxtakor” o'z maydonida oxirgi marta 2015 yilning 12-mart sanasida “Olmaliq” bilan o'yinda ochko yo'qotgan.
3. “Paxtakor”dan uchinchi seriya
“Paxtakor” Oliy ligada “Paxtakor” markaziy stadionida o'tkazgan oxirgi 34 ta o'yinda mag'lubiyatga uchramagan. “Sherlar” O'zbekiston chempionatida oxirgi marta o'z maydonida 2013 yilning 17-avgust sanasida Igor Shkvirin murabbiyligidagi “Olmaliq”dan mag'lub bo'lishgan edi.
4. “Andijon”ning g'alabasiz seriyasi
O'z maydonida “Lokomotiv”ga 1:3 hisobida imkoniyatni boy bergan “Andijon” Oliy ligadagi g'alabasiz seriyalari sonini 5 taga etkazdi. Andijonliklar ushbu mavsumda “Lokomotiv” va “Paxtakor”ga, o'tgan mavsumda esa “Paxtakor” va “Bunyodkor”ga yutqazib qo'yishgan bo'lsa, “Dinamo” bilan murosa ko'chasini tanlagan. E'tiborli jihati “Andijon” oxirgi 5 o'yinning 4tasini poytaxt jamoalariga qarshi o'tkazib, barchasida mag'lub bo'lgan.
5. “Buxoro”dan mag'lubiyatsiz seriya
“Buxoro” “Obod”ga qarshi o'yinda Oliy ligadagi g'alabali seriyasiga yakun yasadi. Klub oxirgi 4 o'yinda “Metallurg”, “Neftchi”, “So'g'diyona” va “Olmaliq” jamoalarini taslim qilgan edi. Shunday bo'lsa ham Buxorliklar endi O'zbekiston chempionatidagi mag'lubiyatsiz seriyalari sonini 5 taga etkazib olishdi.
Davomi Furqat Yusupov blogida.
— deya xabar beradi uff.uz nashri.