«Navbahor»ning 1996 yilgi tarixiy chempionlikni qo'lga kiritishida jamoaning o'sha paytdagi etakchi a'zolaridan biri Marat Dilmuhammedovning ham hissasi katta bo'lgan. 28 mart kuni 41 yoshga to'ladigan sobiq himoyachi professional faoliyatini 1992 yili Toshkent viloyatining «Politotdel-RUOR» jamoasida boshlagan.
1993-1995 yilgi mavsumni «Politotdel»ning asosiy tarkibida o'tkazgan Marat Radikovich 1996 yili «Navbahor»ga ko'chib o'tadi. O'sha yili u 23ta uchrashuvda maydonga tushib, jamoasi g'alabalariga katta ulush qo'shdi. Dilmuhammedov 1997 yilni ham Namanganda o'tkazdi. 2001-2003 yillarda «Do'stlik» sharafini himoya qilgan himoyachi keyinchalik Qozog'istonning «Taraz» klubi safiga borib qo'shildi. 2004 yili yana Toshkentga qaytib, uch mavsum davomida «Lokomotiv»da to'p surdi. 2011 yili Rossiyaning Barnaul shahriga ko'chib ketgan Marat Dilmuhammedov yana uch yilga yaqin vaqt mobaynida o'ynovchi murabbiy sifatida faoliyat yuritdi. Bugungi kunda u «Barnaul» akademiyasida murabbiylik qilyapti. Biz Namanganda o'tkazilgan «Navbahor» - chempion!» shou-dasturi yakunlangach, ushbu futbolchining fikrlari bilan qiziqdik.
- Marat Radikovich, tarixiy g'alabaning 20 yilligi bilan tabriklaymiz. Yana qadrdon do'stlar, jonajon stadion va muxlislarni ko'rib, ko'nglingizdan nimalar o'tdi?
- Bilasizmi, hissiyotlarimizni bir-ikki og'iz so'z bilan ifodalash qiyin. Taklif bo'lganida, hech ikkilanishsiz uni qabul qildim. Viloyat hokimligi, futbol federatsiyasi va jamoa rahbariyatining ushbu sanani eslagani - katta gap. Tadbirda ishtirok etish barcha do'stlarim qatori men uchun ham juda yoqimli bo'ldi. Bu - haqiqiy nostalgiya, chinakam bayram. 1996 yilgi mavsumda haqiqatan namanganlik muxlislarga ajoyib onlarni tuhfa etgandik. Eng katta yutug'imiz - jamoamizdagi ahillik edi. Bir-birimizni ko'z qarashidayoq tushunardik.
Bu shunchaki, balandparvoz so'zlar emas, fikrimni qolgan jamoadoshlarim ham tasdiqlashadi. Bir narsani aytishim kerak, «Navbahor»ning tarixiy yutug'ida rahmatli Hakimjon aka Hoshimovning xizmatlari cheksiz bo'lgan. U kishi haqiqiy futbol fidoyisi edilar. Millionlar o'yini deganda oilalarini ham esdan chiqarib yuborardilar. «Navbahor» tarkibini, umuman, jamoani saqlab qolib, uni kuchaytirishga aynan Hoshimjon aka sababchi bo'lgandilar. Bu sa'y-harakatlar 1996 yilda natijasini bergan. Farhod Magometov, Gennadiy Denisov kabi tajribali futbolchilar jamoaga jalb etilishgan. Oleg Shatskix, Zafar Musaboev, Tohir Madrahimov, Abduqahhor Ma'rufaliev, Ilhom Sharipov kabi etakchilar yuqori saviyada o'yin namoyish etishgandi. Deyarli 40-50 foiz o'yinchilar terma jamoa sharafini ham himoya qilishardi.
- O'sha yillari «Navbahor» uchun asosiy raqib «Neftchi» klubi hisoblanardi...
- To'g'ri aytasiz. «Vodiy derbisi»ga qiziqish jamoalar turnir jadvalining qaysi pog'onasini egallab turganligidan qat'iy nazar, yuqori bo'lardi. 1996 yilgi mavsumda bu ikki klub o'zaro o'yinlarda bittadan g'alabaga erishishgan. Namangandagi uchrashuvda biz 1:0 hisobida muvaffaqiyat qozongandik. Farg'onada kechgan o'yinda esa «Neftchi» 2:1 hisobida zafar quchgan. Shunga qaramay, chempionat yakunida oltin medallar bizga nasib etgan.
- Oradan 20 yil o'tdi. Shu vaqt mobaynida nimalar o'zgaribdi?
- O'sha yili dunyoga kelgan go'dak bu yil 20 yoshga to'ladi. Ayni navqiron va maydonda javlon urib futbol o'ynaydigan yosh. Bugungi avlod vakillarini ko'rib, o'sha o'zimiz o'ynagan davrlar yodimga tushib ketdi. Namangan shahri zamonaviy ko'rinish olib, yanada chiroy ochibdi. «Navbahor» stadionida ham katta o'zgarishlarga guvoh bo'ldik. O'zingiz ham ko'rdingiz, jamoa bazasida katta ta'mirlash ishlari olib borilgan. O'zimiz yashagan xonaga kirganimda, ko'zimdan beixtiyor sevinch yoshlari chiqib ketdi. Menga yoqqan tomoni, jamoa o'z an'analarini saqlab qolibdi. Viktor Romanovich bilan suhbatlashganimda, 25 yil davomida «Paxtakor», «Neftchi» va «Navbahor» oliy ligadan biror marta ham tushib ketishmaganini bildirdilar. Buni eshitib, juda xursand bo'ldim. Demak, viloyatda futbolga e'tibor o'zgarmagan. Darvoqe, Viktor Jalilov haqida so'z ochildi. «Navbahor»ning kuchli bo'lib shakllanishi, mazmunli o'yin namoyish etishida ushbu mutaxassis ham katta hajmdagi ishni amalga oshirgan.
Davomi InterFUTBOL gazetasi blogida.
— deya xabar beradi uff.uz nashri.