Filippin terma jamoasi bosh murabbiyi Tomas Dyuley JCh saralashi doirasida O'zbekistonga qarshi kechadigan uchrashuv oldidan matbuot anjumanida ishtirok etdi va savollarga javob qaytardi.
- Albatta tarkibda muammolar bor. Ammo biz Toshkentga ushbu muammolarni bartaraf eta oladigan futbolchilar bilan tashrif buyurganmiz. Shunday ekan, tarkib borasida ortiqcha qiyinchiliklarga duch kelmaymiz, deb o'ylayman. Jamoamizda boshqalar o'rnini bosa oladigan futbolchilar etarli.
- Ertaga bo'ladigan o'yinda qanday natijaga umid qilmoqdasiz?
- Men odatda orzu qiladigan odamdan ko'ra ko'proq haqiqatga tik qaraydigan insonman. O'zbekiston - guruhdagi eng kuchli jamoa ekanini bilaman. Guruhimiz esa eng kuchli guruh. Shu sababli ham ertaga osmon qadar va'dalar bera olmayman, ammo har bir futbolchimiz bor kuchini ishga soladi. Biz saralash bahsi davomida safar borasida ko'p qiyinchiliklarga duch keldik. Koreya va Bahreynga uzoq muddat safar qildik. Yana ertaga bo'ladigan o'yindan so'ng yana uzoq yo'l bosib, safar o'yiniga borishimiz kerak. Ammo biz qo'limizdan kelgan barcha ishni qilamiz.
- Matbuot anjumaniga "Biz ishonamiz", deb yozilgan futbolkada kelibsiz. Siz nimaga ishonasiz?
- Men nimaga ishonaman? Men Filippin kelajakda Osiyoda futboli rivojlangan mamlakatlardan biri bo'lishiga ishonaman. Nima uchun? Shuning uchunki Filippin ahlining 40 foizini 14 yoshdan kichik bo'lganlar tashkil etadi. Demak, bu mamlakat futboli kelajagida rivojlanish uchun imkon bor. Masalan, basketbolga ishonmaslik mumkin, chunki mamlakat birinchiligida jamoalar ko'p emas va basketbol rivoji u qadar umidli emas. Ammo futbolda bo'y bo'lishi shart emas, shunchaki mahoratning o'zi kifoya qiladi. Filippinning 70 foiz aholisi kambag'allikda yashaydi. Ular uchun futbol juda katta umid manbai hisoblanadi. Filippin kelajakda futbol orqali o'zini dunyoga ko'rsata olishiga ishonaman.Yana bir narsaga ishonaman - tez orada biz Osiyo chempionati ishtirokchilari safiga qo'shilamiz va Qatarda bo'ladigan JCh saralashida ham o'z imkoniyatlarimizni yana bir bor namoyish etishiga ishonamiz.
- O'zbekiston terma jamoasini guruhda eng kuchli deb e'tirof etdingiz. Boshqa jamoalar bilan taqqoslaganda O'zbekistonning kuchi nimada?
- Men uchun O'zbekiston jismoniy va yoki boshqa biror jihatdan emas, balki hamma tomonlama guruhda eng kuchli jamoa hisoblanadi. O'zbekiston terma jamoasi tajriba borasida ham ba'zi jamoalardan ustun. Yana FIFA reytingi ham o'z o'zidan tuzilmaydi. Bunga o'ziga hos sabab bor va ochkolar orqali hammaning o'rni aniqlanadi. Yana bir narsani aytish lozim, Filippindagi o'yinni olsak. 1:5 hisobidagi mag'lubiyat men uchun kutilmagan sovg'a bo'lgan. Boisi o'sha o'yinga hozirlab qo'yilgan barcha rejalarimiz ilk daqiqadayoq yo'qqa chiqqan edi. Bu qadar kuchli jamoaga qarshi maydonga tushganda g'alaba qozonish juda qiyin yoki umuman mumkin emas. Yaxshi jamoa va juda yaxshi jamoa o'rtasida farq shundaki. juda yaxshi jamoa tarkibidagi futbolchilar kerak vaqtda to'g'ri qaror qabul qilishni biladi. Mana shunday futbolchilar bo'lsa, demak kuchlisan. O'zbekiston terma jamoasida Rossiya va boshqa kuchli chempionatlarda o'ynaydigan futbolchilar bor. Bu esa unga qo'shimcha kuch bag'ishlaydi.
- O'zbekiston terma jamoasining kuchli tomonlarini aytdingiz, ammo uning kuchsiz tomonlari nimada? Masalan Filippinda kuchli yomg'ir ham yordam bergan edi?
- Agar ob havoga qaytadigan bo'lsak. Filippindagi yomg'ir ta'sir o'tkazdi. deyish mumkin, ammo biz bunga ham tayyor edik. Qo'shimcha tarzda aytsak, biz o'sha o'yin oldidan sun'iy maydonda mashg'ulot o'tagan edik. O'zbekistonning kuchsiz tomonlariga kelsak, bunday jihatlar darhaqiqat bordir. ammo biz ulardan foydalana oladigan darajada kuchli emasmiz. Agar biz Germaniya terma jamoasi bo'lganimizda balki foydalana olar edik. O'zbekiston terma jamoasida kamchiliklar bor, ammo u minimal. Bu saralashda hamma turli maqsadda ishtirok etmoqda. Kimdir JChga chiqish uchun, yana boshqa kimdir esa chiroyli o'yin evaziga muxlislar ko'nglini xush qilish uchun o'ynamoqda.
- Tarkibda yo'qotishlar borligini inobatga olsak, ertaga bo'ladigan o'yin oldidan kayfiyat qanday?
- Kayfiyat yaxshi. Termaga chaqirilgan futbolchilar yo'qotishlar o'rnini bosishga shay.
- Ertaga ob havo yana buzilib, yomg'ir yog'sa. bunga tayyormisiz?
Biz bunday sharoitda o'ynaganmiz va har doim o'ynashga tayyormiz. O'zbekistonda iqlim futbol o'ynash uchun juda qulay. Mana ko'rib turibmiz, futbol o'ynash uchun juda qulay sharoit bor. Biz uchun faqat qor yog'masa bo'lgani, qolgani muammo emas. Biz O'zbekistonga kelish oldidan aynan qorli havodan qo'rqqan edik. Baxtimizga bunday bo'lmadi. Yana shuni qo'shimcha qilmoqchiman, futbolda hamma narsa bo'lishi mumkin. Biz uyga baxtli holatda qaytishni istaymiz.

— deya xabar beradi uff.uz nashri.