Mazkur xabarlarga ko'ra, Yozyovon tumanining "Yozyovon-Lochinlari" jamoasi yangi mavsumda Pro-Liga musobaqalarida ishtirok etmaydi. SHu bois biz "Yozyovon-Lochinlari" jamoasi sardori Zoxid Ismoilov bilan bog'lanib, mazkur vaziyat yuzasidan intervyu oldik. Quyida ushbu intervyuning to'liq matni bilan tanishishingiz mumkin.
Zohid, shu kunlarda tarqalgan xabarlarga ko'ra "Yozyovon-Lochinlari" jamoasi yangi mavsumda Pro-Liga musobaqalarida ishtirok etmasligi malum bo'ldi. Mazkur vaziyatni qanday izohlaysiz?
Ha bu xabarlar haqida eshitdik. Ochig'i bu xolat sababini tushunganimiz yo'q. Mana 5 yildirki, Yozyovonda ko'plab muxlislarga ega jamoa futbol uchrashuvlarini o'tkazib kelayotgan edi, tumanimizda katta futbol havosi bor edi. O'zim ham shu tumanda istiqomat qilaman, tabiiyki deyarli barcha muxlislarni taniyman, ular bilan muntazam fikrlashib turamiz. SHu xabarlar chiqqandan beri uyali telefonimga juda ko'plab qo'ng'iroqlar bo'ldi. Hamma shu xolatni izohini so'ramoqda. Bu bo'yicha bugun jamoamiz rahbarlari bilan gaplashdik, bilishimizcha jamoamiz ro'yhatdan o'tish jarayoniga kech qolgan ekan. Bu masala bo'yicha biron narsa deyish qiyin, kimnidir ayblash ham noto'g'ri bo'ladi. Yangi mavsumga tayyorgarlik ko'rayotgan, bir nechta o'rtoqlik uchrashuvida maydonga tushgan jamoadoshlarimning shu xabardan keyin kayfiyati tushib ketdi.
Ayni damda jamoada vaziyat qanday?
Jamoamizda vaziyat yaxshi emas albatta. Barcha jamoadoshlarimiz bilan xayronmiz. O'tgan yilgi mavsumda Pro-Liga "V" guruhida ishtirok etib, mavsumni 5-o'rin bilan yakunlagandik. Uy uchrashuvlarimizda har doim ko'plab muxlislar tashrif buyurishardi.
Yaqinda bo'lib o'tgan Farg'ona viloyati "Hokim kubogi" musobasining biz ishtirok etgan guruh uchrashuvlari ham Yozyovon tumanida tashkil etildi. Bu musobaqada ham natijamiz yomon bo'lmagandi, guruhda birinchi o'rinni egallab, chorak finalda "SHerdor" jamoasiga penaltilar seriyasida mag'lub bo'lgandik. Bizda yangi mavsumga tayyorgarlik yaxshi tashkil etilayotgan edi. Bu yildan PFL talablariga ko'ra jamoamizning yoshlar jamoasi ham tashkil etilgan edi. Endi shuncha yosh futbolchi nima qiladi? Ular yangi mavsumni orziqib kutayotgan bir paytda shu xabar chiqib qoldi. Yozyovonda katta futbolning bo'lishi bir nechta iqtidorli futbolchilarni kashf etilishiga sabab bo'layotgan edi. Masalan Abdujamol Isroilov, Abror Ismoilovlar aynan bizning jamoa orqali futbolga kirib kelishgan.
Agar bu yilgi mavsumda "Yozyovon-Lochinlari" Pro-Liga uchrashuvlarida ishtirok etmasa, keyin qaytadan tashkil etish qiyin bo'ladi. SHuncha yangi mavsumdan umidvor bo'lib turgan yosh futbolchilar futboldan benasib qolishi turgan gap. Xullas hozirgi vaziyatni tushunish qiyin, kichkinagina tumanda bir necha yillardan beri tashkil etib kelinayotgan futbolni olib tashlash to'g'rimikan? Futbolsevar muxlislar, yosh futbolchilar uchun bizni Pro-Ligada ishtirok etishimizni taminlashning iloji bormi?
O'zbekistonda keyingi yillarda futbolni rivojlantirish masalasida ko'plab xayrli ishlar olib borilmoqda. SHuni aytishim mumkinki, biz O'FA va PFL qarorlarini har doim hurmat qilib kelganmiz va shunday bo'lib qoladi ham.
Hozircha 2019-yilgi Pro-Liga ishtirokchilari haqida PFL rasman malumot bergani yo'q. Balki yakuniy qarorda "Yozyovon-Lochinlari"ga ham imkon berilar?
Hali bu borada tasdiqlangan malumot yo'qmi?
Ha shunday. PFL bu borada rasmiy malumot bergani yo'q.
Umid qilamizki, O'zbekiston PFL bizga imkon beradi. Agar shunday bo'lsa yangi mavsum biz uchun juda qadrli bo'ladi. Kayfiyatni tushirmay yangi mavsumga tayyorgarlik ko'rishda davom etamiz.
Bekzod Tolibov yozib oldi.
Bosh sahifaga
1945