"Qo'qon-1912": Abdulloh Olimov va Abdul Aziz Yusupov bilan shartnoma tuzildi

Mashg'ulotlar Dang'ara tumanidagi o'yingohda bo'lib o'tayotgan edi. Bugun esa Murod Ismoilov shogirdlari Farg'ona tomon yo'lga chiqishadi. Vakillarimiz ertalab mashg'ulot o'tkazgach, kunning ikkinchi yarmida Farg'onaga jo'nab ketishadi. Klub azolari “777” mehmonxonasida istiqomat qilib, ananaviy tarzda bo'lib o'tadigan “Viloyat Hokimi Kubogi-2016” musobaqasida ishtirok etishadi.

Jamoadagi o'zgarishlarga kelsak, Toshkentdagi yig'inda “Qo'qon-1912” tarkibiga kelib qo'shilgan Abdul Aziz Yusupov bilan ikki yillik shartnoma imzolandi. Ushbu hujumchi o'tgan mavsumda “Oq-tepa” jamoasi sharafini himoya qilgandi.

SHuningdek, uchinchi yig'inda safimizga qo'shilgan Abdulloh Olimov bilan ham ikki yillik bitim imzolandi. Ushbu futbolchi o'tgan mavsumni “Andijon”da o'tkazdi.

Murabbiylar shtabida ham o'zgarish yuz bergan. 2015 yili “Qo'qon-1912”da faoliyat olib borgan va yangi mavsumda ham jamoamizda ishlashi kutilgan Vadim SHodimatov o'z arizasiga binoan klubimiz bilan hamkorlikni to'xtatdi.